දුවේ, පුතේ ඔයාලා අහල තිබෙනව ද මේ පින්තූරයේ තිබෙන විශේෂ සිදුවීම ගැන?

මේ කවි කියවන විට ඔයාලට මතක් වෙයි එ විශේෂ දවස. දැන් අපි හැමෝ ම මේ කවි තාලයට ගායනා කරමු‍ෙ

1. ජේසු සමිඳු ඇරියුම් කර - එක් දිනයක රාත්‍රියේ
ගෝලයො දොළස ම සමගින් - එක මේසෙක රැස්වූයේ
අන්තිම රෑ බොජුනට බව‍ - කිසිවෙක් නොම දැන සිටියේ
මහ බ්‍රහස්පතින්දා ලෙස - එදා තමයි නම් කෙරුවේ

2. නායකයා, සේවකයකු - විය යුතු බව පෙන්වා දෙමින්
ගෝලයන්ගේ පා සෝදා - සිඹ ගත්තේ කිතු සමිඳුන්
මහ බ්‍රහස්පතින්දා දින - එතුමාණන් කළ කී දේ
අද දක්වා සුදු සබයේ - පවතී නොවෙනස්ව මෙසේ

3. ජේසු සමිඳු රොටියක් ගෙන - තුති පුදමින් කෑලි කඩා
ගෝල පිරිසෙ සැමට දෙමින්‍ - පැවසු උතුම් වදන සදා
"මාගේ මේ ශරීරයයි - ඔබ උදෙසා දෙනු ලබනා
මා සිහි කරනා පිණිස ම - මෙය සැම දා සිදු වේවා!"

4. එලෙස ම භෝජනයෙන් පසු - කුසලානය රැගෙන එදා
නැවතත් තුති පුදමින් තම - ගෝල පිරිස දෙසම බලා
"මේ මාගේ රුධිරය වේ - ඔබ උදෙසා මා හෙළනා
මා සිහි කරනා පිණිස ම - මෙය සැම දා සිදු වේවා!"

5. දිව්‍ය සත්ප්‍රසාදය නම් - උතුම් නිධානයක් වෙමින්
පූජකවරයයි නම් ලත් - තවත් නිධානයක් ලෙසින්
මහ බ්‍රහස්පතින්දා දින - අන්තිම රෑ බොජුන තුළින්
ස්ථාපිත වූ ප්‍රසාදයේ - නිධානයන් තෑගි ලෙසින්

6. ශාරීරික සුවය සඳහා - කුසට අහර ඇවැසි ලෙසේ
ආත්මික සුවය පතා - හදට අහර ඇවැසි වෙතේ
ප්‍රේමයේ නිධානය වන - සිරි පූපය ලබන ලෙසේ
දිනපතා ම වෙහෙසෙමු අපි - රත්තරන් පුංචි දුවේ පුතේ

යාච්ඤාව
ආදර ජේසු සමිඳුනි, දිව්‍ය සත්ප්‍රසාද වහන්සේ තුළින් ඔබ
වහන්සේ හමුවීමට මම ආසයි. ඒ සඳහා හැකි සැම විට ම දිව්‍ය
පූජාවට සහභාගි වීමටත් ඔබ වහන්සේ බැහැදැකීමටත් යහපත්
කිතුනු දරුවකු වීමටත් මට පිහිට වුව මැනව.
ආමෙන්.