දරුවනේ, මම ඔයාලට කියා දෙන්න යන්නෙ ශුද්ධ වූ බයිබලයේ සඳහන් මරිය තුමියගේ මැදිහත් වීමක් ගැනයි.

ගලීලයේ කානා නම් නුවර එක් ගෙදරක විවාහ මංගල්‍යයක් පැවැත්වූවා. ජේසුස් වහන්සේගේ මව්තුම්ය වන මරිය තුම්ය එම උත්සවයට පැමිණ සිටියා. මරිය තුමිය එම මංගල උත්සවයේ කටයුතුවලට ගොඩක් උදවු කළා. ජේසුස් වහන්සේට සහ එතුමාගේ ගෝලයන්ටත් මංගල උත්සවයට ආරාධනා කර තිබුණා. උත්සවයට සහභාගි වූ සැම දෙනාට ම බීමට මිදියුස මදි වුණා. එහි සිටි මෙහෙකරුවන් හොඳට ම කලබල වුණා. එන අයට බෙදන්න මිදියුස නැති  නිසා ඔවුන් අපහසුතාවට පත් වෙලයි සිටියේ. ඒ බව මරියතුමිය දැනගත්තා.

ජේසුස් වහන්සේට මේ සිද්ධිය කීවොත් එයට විසඳුමක් ලබා ගතහැකි වෙතියි ඇයට සිතුණා.

මරිය තුමිය විගසින් ජේසුස් වහන්සේ වෙත ගොස් මිදියුස ඉවර වී ඇති බව පැවසුවා. සිදුවීමට යන ලැජ්ජාවෙන් මොවුන් බේරාගන්න කියා කිවුවා. උන්වහන්සේ මරිය තුමිය දෙසට හැරී "ඔබත් මාත් මේ ගැන කරදර වෙන්නෙ මන්ද? මගේ මොහොත තව ම පැමිණ නැහැනේ," කියා පැවසුවා. මරිය තුමිය මෙහෙකරුවන් අසලට ගොස් ඔවුන් අමතා "ජේසුස් වහන්සේ ඔබට කියන ඕනෑම දෙයක් වුව ද කරන්නැ"යි කිවුවා. ඔවුන් සතුටින් එය පිළිගත්තා.

එතැනට පැමිණි ජේසුස් වහන්සේ එහි තිබූ ගල් භාජන සියල්ලම වතුරෙන් පුරවන ලෙස සේවකයන්ට පැවසුවා. සේවකයන් ගල් භාජන සියල්ල ම වතුරෙන් පිරෙව්වා. පසුව ජේසුස් වහන්සේ, එම ගල් භාජන ආශිර්වාද කර "දැන්  මෙයින් ටිකක් සංවිධායක තැන වෙත ගෙන යන්න," කියා පැවසුවා. සංවිධායක තැන එහි රස බැලූවා. ඔහු පුදුම වුණා. එම මිදියුස ලැබුණ විදිය එයා දැන සිටියේ නැහැ. නමුත් සේවකයින් එ ගැන දැනගෙන සිටියා.

සංවිධායක තැන මනාල මහතා වෙත පැමිණ, හොඳ මිදියුස ළඟ තබාගෙන බාල මිදියුසවලින් සංග්‍රහ කළේ මන්දැයි ඔහුගෙන් ඇසුවා. කිසි ම දෙයක් ගැන නොදන්න මනාල මහතා පුදුම වුණා.

ඔහු මේ ගැන සොයා බැලූවා. සිදු වී ඇති සියල්ල ම ඔහුට දැනෙගන්න ලැබුණා. වතුර මිදියුස බවට හරවා තියෙන්නේ නාසරතයෙන‍් පැමිණි ජේසුස් වහන්සේ බව ආරංචි වුණා. ඒ මොහොතේ මරිය තුමිය මැදිහත් නොවන්න ලොකු ලැජ්ජාවක් වෙන්න ඉඩ තිබුණා. එතැන සිටි සියලූ දෙනා ම ජේසුස් වහන්සේගේ බලවන්තකම ගැන කතාබහ කළා. පුතාලා දන්නවාද ජේසුස් වහන්සේ කළ හාස්කම්වලින් පළමු වැන්න තමයි මේ ජලය මිදියුස බවට පත්කිරීමේ සිද්ධිය.

මේ සිදුවීම මගින් මරිය තුමියට අප වෙනුවෙන් මැදිහත් විය හැකි බව හොඳින් පෙනී යනවා.

යාච්ඤාව
ආදර දෙවි පියාණෙනි, පුංචි අපේ ජීවිතවල නොයෙකුත්
වුවමනාවන්වල දී අපට ඔබ වහන්සේ වෙත හැරී එන්නට වරම්
දුන මැනව. දේව අම්මේ, එසේ කරන්නට අපට කියා දුන මැනව.
ආමෙන්.