එක්තරා කාලයක මිසර දේශයට අලූත් රජෙක් පත් විය. ඔහුගේ නම පාරාවෝ ය. එම කාලයේ මිසර දේශයේ ම ඊශ්‍රායෙල් ජනතාවද පදිංචිව සිටියෝ ය. මෙම ඊශ්‍රායෙල් ජනතාව මිසර වාසීන්ට වඩා වැඩියෙන් සිටි බව දුටු පාරාවෝ රජතුමා බිය විය. එබැවින් ඔහු ඊශ්‍රායෙල් ජනතාවට උපදින සියලූ පිරිමි දරුවන් නයිල් ගඟට විසිකර දමන ලෙසට අණ කළේ ය. තව ද ඊශ්‍රායෙල් ජනතාවට බර වැඩ කිරීමට ද එතුමා අණ කළේ ය.

මේ අතර ඊශ්‍රායෙල් ජාතික පවුලක පිරිමි දරුවෙක් ඉපදුණේ ය. ඔවු හු මාස තුනක් පමණ රහසින් දරුවා රැක බලා ගත්තෝ ය. තවදුරටත් එසේ කිරීමට අපහසු වූ බැවින් දරුවා ආරක්ෂා සහිත පන් පෙට්ටියක බහා නයිල් ගඟේ බට පඳුරු අතර සඟවා තබන ලදි. ඒ අවස්ථාවේ නයිල් ගඟට දිය නෑමට පැමිණි රජතුමාගේ දූ කුමරිය මේ පන් පෙට්ටිය දුටුවා ය. ඇය ඒ පෙට්ටිය ඇර බලා ලස්සන පිරිමි දරුවකු බව දැක ඔහු තම දරුවකු මෙන් හදා ගැනීමට රැගෙන ගියා ය. දරුවා ජලයෙන් ගොඩ ගත් නිසා ඔහුට මෝසෙස් යන නාමය තබන ලදි.

මෙසේ රජ වාසල තුළ සියලූ සැප සම්පත් සහිතව රජ කුමරකු ලබන සැම ශිල්පයක් ම ඉගෙන ගනිමින් ජීවත් වීමට දෙවියන් වහන්සේ මෝසේස්ට ඉඩ සැලසූ සේක. ඔහුට දුක් විඳින ජනතාව වෙනුවෙන් මැදිහත් වීමට සිදුවීම නිසා රටින් පලා යාමට සිදුවිය. එසේ පලාගොස් මිදියන් දේශයේ පදිංචි විය. එහි දී තම මාමණ්ඩියගේ බැටළු පට්ටිය රැක බලා ගනිමින් සිටිය දී නොදැවෙන ගිනි පඳුරක් ආකාරයෙන් දෙවියන් වහන්සේ මෝසෙස්ට දර්ශනය විය.

නැවත මිසරයට ගොස් පාරාවෝ රජුගේ වහල්කමින් ඊශ්‍රායෙල් ජනතාව පොරොන්දු දේශය කරා ගෙන යන ලෙස දෙවියන් වහන්සේ මෝසෙස්ට අණ කළ සේක. එහෙත් පාරාවෝ රජු තම හිත දැඩි කර ගෙන ඊශ්‍රායෙල් ජනතාවට පිටව යාමට ඉඩ නොදුන්නේ ය. එම නිසා දෙවියන් වහන්සේ ඊශ්‍රායෙල් ජනතාව මුදා ගැනීම සඳහා මිසර වාසීන් වෙත වසංගත එවීමට සැලැස්වූහ.

වසංගත දහය

1. වතුර ලේ වීම        6. ගඩු උවදුර
2. මැඩි උවදුර          7. ගල් වර්ෂා උවදුර
3. කිනිතුලූ උවදුර      8. පළඟැටි උවදුර
4. මැසි උවදුර          9. ගනඳුරු උවදුර
5. ගව සම්පත වැනසීම 10. කුළුඳුලන් මැරීම

පසුව මෝසෙස් තුමා අවංකව කැපවීමෙන් හා දේව කරුණාවෙන් ඊශ්‍රායෙල් ජනතාව මුදා ගෙන පොරොන්දු දේශය කරා ගෙන ගියේ ය. එ නිසා මෝසෙස් තුමා ඊශ්‍රායෙල් ජනතාවගේ වීරයකු ලෙස සැලකේ.

මෝසෙස් තුමාගේ ගුණාංග

• දෙවියන් වහන්සේ කෙරෙහි විශ්වාසය
• දෙවියන් වහන්සේට දැක්වූ කීකරුකම
• එඩිතරකම
• ජනතාවට දැක්වූ අනුකම්පාව හා ආදරය
• ඉවසීම

යාච්ඤාව
ආදර දෙවි පියාණෙනි, මෝසෙස් තුමා මෙන් අවංකව හා එඩිතරව
මට පැවරෙන වගකීම් ඉටු කිරීමට මා උනන්දු කළ මැනව.
ආමෙන්.