15 - ශුද්ධවන්ත ජීවිතයක් ගත කරමු
අම්මා : පුතා... දුව... තේ බොන්න එන්න.
පුතා : අම්මේ, මේ බලන්න අපේ ටීචර්ගේ නම "ළමා ප්‍රදීපය" පත්තරේ තියෙනවා.
දුව : අම්මේ, අපට ආගම උගන්වන්නෙත් ඒ ටීචර් ම තමයි.
අම්මා : කෝ... බලන්න. ආ... ටීචර් පත්තරේට ලිපියක් ලියලා. වටිනා ලිපියක් වගේ. පුතා කියවන්නකො එක අපටත් ඇහෙන්න.
පුතා : "ශුද්ධවන්ත ජීවිතයක් ගත කරමු."
දුවේ, පුතේ, දිව්‍ය සත්ප්‍රසාද වහන්සේ කියන්නේ උතුම් ම ප්‍රසාද නිධානයයි . ප්‍රේමයේ ප්‍රසාද නිධානය කියන්නේත් දිව්‍ය සත්ප්‍රසාද නිධානයට මයි. ඉතිං ජේසු සමිඳු හැම දා ම අපට හමුවන්න පුළුවන් හොඳ ම විදිහ තමයි දිව්‍ය සත්ප්‍රසාද වහන්සේ. දිව්‍ය සත්ප්‍රසාද වහන්සේ ලබා ගන්න අප හොඳ සූදානමකින් යන්නඕනෑ. විශේෂයෙන් නිවැරදි පාපෝච්චාරණයක් කිරීම ඉතා ම වැදගත්. හේතුව අප අතින් දැනුවත්ව හෝ නොදැනුවත්ව නිතර ම වැරදි සිදු වෙනවා. ඒ වගේ ම ජේසු සමිදු ලබා ගන්න යන විට ඉතා ම ගෞරවයෙන් හා භක්තියෙන් දෑත් එකතු කර වැඳගෙන යන්න ඕනෑ. දිව්‍ය සත්ප්‍රසාද වහන්සේ තුළින් ජේසු සමිඳු අප සමග ජීවමානව වැඩ සිටින බව පිළිගන්න ඕනෑ.
දිව්‍ය පූපය තුළ ජේසු සමිඳු ජීවමානව වැඩ සිටින බව සමහරු විශ්වාස කරන්නේ නැහැ.
මම දුවලා, පුතාලට කියන්න යන්නේ අවිශ්වාසය නිසා සිදු වූ ප්‍රාතිහාර්යයක් පිළිබඳවයි. මෙම ප්‍රාතිහාර්යය සිදු වූයේ 1374 වර්ෂයේ නිරිතදිග නෙදර්ලන්තයේ මිඩ්ල්බර්ග් ප්‍රදේශයේ ය.
දිව්‍ය සත්ප්‍රසාද වහන්සේ ගැන කිසි විශ්වාසයක් නැති, ජෝන් කියලා දඩබ්බර තරුණයෙක් සිටියා. මොහු පාපොචිචාරණය කළෙත් නැහැ. එත් චතාරික කාලයේ එක් ඉරු දිනක මොහු දිව්‍ය සත්ප්‍රසාද වහන්සේ ලබා ගන්නට දිව්‍ය පූජාවට ගියා.
හරි ම පුදුමයක්, ජෝන් ජේසු ලබා ගත් විට එයාට දැනුණා එයාගේ කටේ මස් කෑල්ලක් වැනි දෙයක් තිබෙන බව. ජෝන් කාටත් හොරෙන් දිව්‍ය පූපය හැපුවා. ජෝන්ගේ කට පුරා ම ලේ. මේ සිදුවීමත් සමග ජෝන්ගේ ජීවිතය වෙනස් වුණා. ඔහු හොඳට ම ඇඩුවා. පසුව දෙව් මැඳුරේ සිටි හැමෝට ම ඇහෙන්න කෑගහල‍ා පාපෝච්චාරණය කළා. එදා සිට ඔහු යහපත් ජීවිතයක් ගත කළා.
ඉතින් දුවේ, පුතේ, යහපත් ජීවිත ගත කරන්නට අපට හැකිවන්නෙත් වැරදි දේ වලින් සහ නපුරු දේ වලින් ඈත් වීමට හැකි වන්නෙත්, ඇත්ත කතා කරන්න පුළුවන් වන්නෙත් දිව්‍ය සත්ප්‍රසාද වහන්සේ ලබා ගැනීමෙන් බව ඔබට වැටහෙනවා නේද? ඒ නිසා දිව්‍ය සත්ප්‍රසාද වහන්සේට සැම මොහොතක ම ගෞරව කරන්න, ඔබ සැමට ජේසු පිහිටයි.
අම්මා : හරි ම වටිනා ලිපියක්. පුන්චි ඔයාලට විතරක් නෙවේ වැඩිහිටි අපටත් වැදගත් කරුණු මේ ලිපියේ තිබෙනවා.
යාච්ඤාව
දිව්‍ය සත්ප්‍රසාද ජේසුනි, හැකි සැම විට ම විශ්වාසයෙන් ඔබ
වහන්සේ ලබා ගැනීමට අපට පිහිට වුව මැනව. එමගින් අපේ
ජීවිතය ලස්සන කළ මැනව. නපුරු බලවේගවලින් අප ආරක්ෂා
කළ මැනව.
ආමෙන්.