ශු. මාක් 2 : 1-12

දිනක්  ජේසුස් වහන්සේ කපර්ණවුම නම් ගමට ගිය සේක. මේ ගමේ අංශභාග රෝගය වැළඳුණු  රෝගියෙක් සිටියේ ය. මොහුට, ජේසුස්වහන්සේ ගැන බොහෝ සේ විශ්වාස කළ මිතුරෝ සතරදෙනෙක් වූහ. පුංචි දුවේ, පුතේ, බලන්නකෝ මේ මිතුරන්  සතරදෙනා කළ දේ!

ලොවට උතුම් ජේසු තුමන් කළ කී දෑ මේ අහන්න
ලෙඩ දුක් ඇති අසරණ අය සුව කෙරු බව සිතට ගන්න
එලෙස කරපු පුදුම දෙයක් දෙව් වදනින් අරන් මෙන්න
අංශභාග රෝගියාගේ කතා පුවත දැන් අසන්න

අංශභාග වූ රෝගියා යහනක වැතිරී සිටියා
හොඳ මිතුරන් සතර දෙනෙක් මේ රෝගියා හට සිටියා
මේ අතරේ ජේසු තුමන් කපර්ණවුමේ වැඩ සිටියා
යහනේ සිටි මිතුරා රැගෙන ජේසු තුමන් වෙතට ගියා

අංශභාග රෝගියාව යහන සමග ගෙන ආවා
ඇතුළුවෙන්න බැරි තරමට සෙනඟ සිටින බව දුටුවා
වහලෙට නැග සෙවිල්ල හැර පියස්ස කඩලා දැමුවා
රෝගිව සිටි මිතුරා සමග ඇඳ පහළට බැස්වූවා

දුවේ පුතේ මේ කතාව පුංචි ඔබේ සිතට ගන්න
ඔබ සැමගේ යහළුවන්ට සැම විට යහපත කරන්න
දෙවිඳුන් වෙත ඇදහිල්ලෙන් පුංචි ඔබත් දිවිගෙවන්න
මිතුදම් රකිනා අගනා දෙව් දරුවන් මෙන් වැඩෙන්න

ජේසු සමිඳු හට හැකි විය සැම ලෙඩ දුක් සුව කරන්න
අසරණ වූ ජනතාවට නිරතුරු සහනයක් වෙන්න
මේ ඔවදන් පුංචි ඔබත් තව දුරටත් සිතට ගන්න
දුවේ පුතේ පුංචි ඔබත් විශ්වාසෙන් කල්ගෙවන්න

පුංචි මමත් හොඳ මිතුරෙක් වෙමි; ඇදහිල්ලෙන් ජීවත් වෙමි.

ආදරණිය දෙවි පියාණෙනි,
ඔබ වහන්සේ කෙරෙහි ඇදහිල්ලෙන් ජීවත් වන්නට පුංචි මටත්
උදවු කළ මැනව. ඔබ වහන්සේ මට දී ඇති මිතුරන් ගැන ස්තූති
කරන අතර ඔවුන්ගේ අවශ්‍යතා උදෙසා සංවේදීවීමට මට උපකාර
කළ මැනව.
ආමෙන්.