එස්තර් 4 : 13-16

බයිබලයේ සඳහන් වන එස්තර් ඉතා ම නිර්භීත කාන්තාවක් වූවා ය. ඇය ජුදෙව් ඉතිහාස කථාවේ ඉතා ම වැදගත් කාන්තා චරිතයකි. ජුදෙව් කාන්තාවක වූ එස්තර් හට අහෂ්වේරෝෂ් රජුගේ බිසව වීමට අවස්ථාවක් ලැබිණි. එය සැබවින් ම දෙවියන් වහන්සේගේ මහ සැලස්මෙහි ප්‍රතිඵලයක් ලෙස අපට හඳුනා ගත හැකි ය. ඇය තුළ තිබූ නිර්භීතකම නිසා ම ඈ ජුදා ඉතිහාසයේ වීරවරියක ලෙස හඳුන්වනු ලබයි.

හාමාන් විසින් අහෂ්වේරෝෂ් රජතුමා නොමඟ යවා ජුදා ජාතිකයින් විනාශ කරන ලෙස රාජාඥාවක් ලියවා නිකුත් කර හරින ලදි. එයට හේතුව වූයේ මොර්දෙකයි නම් තැනැත්තා ඔහුට හිස නවා ආචාර නොකළ නිසා ඇති වූ වෛරයයි.

එවිට එස්තර්ගේ ඥාතියෙකු වන මොර්දෙකයි විසින් අහෂ්වේරෝෂ් රජුගේ සිත වෙනස් කිරීමට මැදිහත් වන ලෙස, එස්තර්ට දන්වා හරින ලදි.

ජුදා ජාතික එස්තර් බිසව රජු ඉදිරියට යෑමට තරම් නිර්භීත වූවා ය. එසේ නිර්භීත තීරණයකට එළඹීම කාන්තාවක ලෙසට ඉතාමත් අපහසු කාර්යයකි. ඇය ප්‍රශ්න ඉදිරියේ දී යාච්ඤාව හා දේව මඟපෙන්වීම සෙවූ කෙනෙකු බව පැහැදිලි වෙයි. එම නිසා තමා වෙනුවෙන් නිරාහාරයෙන් සිට විශ්වාසයෙන් යුතුව යාච්ඤා කරන ලෙස සූසාහි සෙනඟට ඇය පැවසුවා ය. මොර්දෙකයි ඇතුළු සූසාහි සිටින සියලු ජුදෙව්වරු එස්තර් වෙනුවෙන් මැදහත්ව දෙවියන් වහන්සේට යාච්ඤා කළහ. එම යාච්ඤාව ඉතා සුවිශේෂී වේ. ඒ මන්ද යත් ඔවුන් නිරාහාරව දවස් තුනක් එනම් රූ සහ දවල් තුනක් එක්සත්ව, එක්සිත්ව යාච්ඤා කිරීමයි.

කටපාඩම් පදය
හිමි සඳ මාගේ ආලෝකය හා විමුක්තියයි. මම
කිසිවෙකුට බිය නොවෙමි. හිමි සඳ මාගේ ජීව
ශක්තියයි. මට භීතියක් නැත.
ගිතාවලිය 27:1