1 සාමුවෙල් 3 : 1-10

නිසල්ගේ මව ගුරුතුමියට දුරකතනයෙන් ඇමතුමක් ලබා දෙයි.

මව : අපේ නිසල්ගේ සබත් පාසලේ ටීචර් ද කතා කරන්නේ?

ගුරුතුමිය: ඔව්, අනෝජා ටීචර් තමයි කතා කරන්නේ.

අම්මා : අනේ ටීචර් බලන්නකො, නිසල්ට සබත් පාසලට යන්න කියලා කොච්චර කිව්වත් එයා බැහැ කියනවනේ.

ගුරුතුමිය: ඒ මොක ද හේතුව? කෝ පුතා?

අම්මා : ටීචර්ට යවන්න කියල ලිපියක් ලියනවා.

ගුරුතුමිය: හොඳයි එහෙනම් එවන්න කියන්නකෝ ලිපිය.

(ලිපිය ලැබුණ විගස ම ගුරුතුමිය නිසල්ගේ නිවසට පැමිණියා ය)

ගුරුතුමිය: කෝ නිසල්, නිසල් පුතා! මට ඔයාගේ ලිපිය ලැබුණා. ඒ නිසයි මම ආවේ. ඔයා හොඳ කීකරු දරුවෙක්. ඔයා කුඩා සාමුවෙල් වගේ ම වෙනවා දකින්න මම සතුටුයි.

නිසල් : සාමුවෙල් වගේ! ඒ කවුද ටීචර්?

ගුරුතුමිය: සාමුවෙල් ඔයා වගේ ම පොඩි පිරිමි ළමයෙක්. හැදී වැඩුණේ ඒලී පූජකයා ළඟ. දවසක් සාමුවෙල්ට තම නම කියා කවුදෝ කතා කරන හඬ ඇසුණා. සාමුවෙල් ඒලී පූජකයා වෙත ගොස් "ඔබ මට කතා කළෙහි ද?" යි ඇසුවා. එවිට තමා කතා නොකළ බව ඒලී පූජකයා සාමුවෙල්ට පැවසුවා. මෙසේ තුන්වන වතාවටත් කතා කරන හඬ ඇසුණා. එලෙස කතා කරන්නේ දෙවියන් වහන්සේ බව දැනගත් ඒලී පූජකයා දෙවියන් වහන්සේගේ හඬට ඇහුම්කන් දෙන ලෙස දන්වා සිටියා. හතරවන අවස්ථාවේ තම නම කියා කතා කළ විට සාමුවෙල් මෙසේ පැවසුවා. "කතා කළ මැනව. ඔබ වහන්සේගේ මෙහෙකරුවා සවන් දී සිටී" යනුවෙන් සාමුවෙල් බොහොම හොඳට කීකරු වචනයෙන් දෙවියන් වහන්සේට පිළිතුරු දුන්නා.

නිසල් : අනේ මටත් සාමුවෙල් වගේ වෙන්න ආසයි. මටත් දෙවියන් වහන්සේ කතා කරයි ද?

ගුරුතුමිය: ඔව්, පුංචි ඔබත් දෙවියන් වහන්සේ විශේෂ වැඩ සඳහා තෝරාගෙන තියෙනවා. අවශ්‍ය වන්නේ එතුමාට කීකරුව සවන් දී සිටීමයි. දෙවියන් වහන්සේගේ අරමුණු විවිධයි. ඒවා විවිධ පණිවිඩ ආකාරයෙන් ලබා දීමට පුංචි ඔබත් තෝරා ගන්න පුළුවන්. හැබැයි ඒ පණිවිඩ දැනගන්න නම් යාච්ඤාවෙන් දෙවියන් වහන්සේට ළංව ජීවත් වෙන්න ඕනෑ.

නිසල් : දෙවියන් වහන්සේ ට ළංව ජීවත් වන්නේ කොහොම ද ටීචර්?

ගුරුතුමිය: එදා කුඩා සාමුවෙල් පුංචි පුංචි වැඩ කරමින් දේව මාළිගාවේ ම ජීවත් වුණා. එයා දෙවියන් වහන්සේට ළංව සිටි බව නම් හොඳට ම විශ්වාසයි. යාච්ඤාවෙන් දෙවියන් වහන්සේට ළං වුණා. දෙවියන් වහන්සේ ඔබෙන් බලාපොරොත්තු වෙනවා උන්වහන්සේට ළංව සිටිමින්, සේවය කිරීම. මට හොඳට ම විශ්වාසයි උන වහන්සේට සේවය කිරීමට ඔබවත් තෝරාගෙන තිබෙන බවට.

නිසල් : මේ මාව?

ගුරුතුමිය: ඇහුම්කන් දීගෙන ඉන්න. ඔබට දෙවියන් වහන්සේ කතා කරලා ඉවරයි. දේව වචනය මගින් කතා කරන්නට දේව මඟපෙන්වීම ලබා දෙන්නට දෙවියන් වහන්සේ ඔයා වෙනුවෙන් මඟ බලාගෙන ඉන්නවා. මේ වගේ දෙවියන් වහන්සේට කීකරු වන්නට ඔයා කැමතියි නේද?

නිසල් : සාමුවෙල් වගේ මමත් කීකරු වෙනවා. සබත් පාසලට ඇවිත් දේව හඬට ඇහුම්කන් දෙන්න මම ඉගෙන ගන්නවා. ගෙදරදිත් යාච්ඤා කරනවා; දෙවියන් වහන්සේ මාවත් සුවිශේෂී වැඩවලට තෝරා ගනිවි.

හිමියනි කතා කරන්න
ඔබ මෙහෙකරුට
යොමුව ඇත මගේ කන්
ඔබ හඬ අසන්නට
කතා කරන් ස්වාමිනේ
කිම්ද ඔබ කියන්නේ

යාච්ඤාව
ආදර දෙවි පියාණෙනි,
දේව වචනය තුළින් ඇසෙන ඔබ වහන්සේගේ හඬට කීකරු
වීමට ද දෙමාපියන්ටත්, ගුරුවරුන්ටත් කීකරු වීමට ද මට පිහිට
වුව මැනව. ඔබ වහන්සේගේ සේවා ඉටු කිරීමට මට ශක්තිය දුන
මැනව.
ආමෙන්.