9 - දෙවිඳු පසසමු දෙවිඳු නමදිමු
දෙවියන් වහන්සේගේ පේමය කියා නිමකළ නොහැකි තරම් විශාල ය; ගැඹුරු ය. උන් වහන්සේ අපට දක්වන දේව ප්‍රේමයට අප ප්‍රතිචාර දැක්විය යුතුයි. ඒ කිතුනු ගුණාංග අනුව ජීවත් වීමට අපි නිතර උන්වහන්සේ සමග සමීප සම්බන්ධතාවක් පවත්වා ගත යුතු වෙමු.
ජේසුස් වහන්සේ මේ ලෝකයේ ජීවත් වූ කාලයේ දෙවි පියාණන් වහන්සේ සමග නොකඩවා තම සම්බන්ධතාව පවත්වා ගැනීමට දිනපතා යාච්ඤා කළ සේක. නිවසේ දී, මුහුදු වෙරළේ දී කඳු මුදුනේ දී ජේසුස් වහන්සේ යාච්ඤා කළ බව ශුදධ බයිබලයේ සඳහන් වේ.
උන් වහන්සේ අපට දිනපතා ලබා දෙන ආරක්ෂාව, විවේකය සහ සියලූ ආශිර්වාදවලට අපි ස්තූතිවන්ත වෙමු. යාච්ඤා කරමින් එයට ප්‍රතිචාර දක්වමු.
එලෙස ම ජේසුස් වහන්සේ තම සේවය ආරම්භ කිරීමට පෙර, දින හතළිහක් පාළුකරයේ යාච්ඤාවෙන් නිශ්චල කාලයක් ගත කළ බව ශුද්ධ බයිබලයේ සඳහන් වේ. අපේ ජීවිතවල සියලූ ම වැදගත් අවස්ථාවල දී ද වැදගත් තීරණ ගැනීමේ දී ද උන් වහන්සේගේ මඟපෙන්වීම ලබා ගැනීම අවශ්‍ය වේ. ඒ සඳහා නිරතුරු යාච්ඤා කිරීම සහ ශුද්ධ බයිබලය කියවා, ඒ ගැන මෙනෙහි කිරීම,භාවනාවට යොමුවීම වැදගත් වේ. ඒ තුළින් උන්වහන්සේ අපට නිවැරදි මාර්ගය පෙන්වා දෙන සේක.
දෙවියන් වහන්සේට අප ප්‍රශංසා කරන විට උන්වහන්සේ සතුටු වන සේක. දෙවියන් වහන්සේ අපට ලබා දෙන සියලූ ආශිර්වාද ගැන අපි උන්වහන්සේට ප්‍රශංසා කළ යුතු වෙමු.
ගීතිකා ගායනා කිරීමෙන් අපට දෙවියන් වහන්සේට ප්‍රශංසා කළ හැකි ය. එමෙන් ම, ඒ සමග වාදනයෙන් ද අපට උන් වහන්සේට ප්‍රශංසා කළ හැකි ය. උන් වහන්සේගේ ප්‍රේමයට ප්‍රතිචාර දැක්විය.
දාවිත් රජතුමා නටමින් දෙවියන් වහන්සේට ප්‍රශංසා කළ අන්දම ශුද්ධ බයිබලයේ සඳහන් වේ. අපටත් රංගනයෙන් දෙවියන් වහන්සේ පැසසීමට හැකි ය. මුවින් වචන ප්‍රකාශ කරමින් පමණක් නොව අභිරූපණයෙන් ද දෙවියන් වහන්සේට ප්‍රශංසා කළ හැකි ය.
දක්ෂ චිත්‍ර ශිල්පීහු සහ කැටයම් ශිල්පීහු තම ප්‍රශංසාව දෙවියන් වහන්සේට පිළි ගැන්වීමට නොයෙක් ආකාරයේ අලංකාර නිර්මාණ කරති. සමහර දේවස්ථානවල බිත්තිවල ඇඳ ඇති සිතුවම්, අඹා ඇති රූප සහ කැටයම් ආදිය මගින් ඔවුන්ගේ ප්‍රශංසාව දෙවියන් වහන්සේට පුද කරති.
ශ්‍රවණාබාධ, කථනාබාධ හා දෘශ්‍යාබාධ ඇති අය ද අප අතර සිටිති .ඔවුන්ට ද දෙවියන් වහන්සේ පැසසීමට රංගනය සහ අභිරූපණය හෝ ඔවුන්ට ම ආවේණික ක්‍රම හෝ යොදා ගත හැකි ය. එමඟින් ඔවුන් ට ද දෙවියන් වහන්සේ දක්වා ඇති ආදරය වෙනුවෙන් ප්‍රතිචාර දැක්වීමට බාධාවක් නොවනු ඇත. (උදා : දෘශ්‍යාබාධ ඇති පිරිස් බ්‍රේල් ක්‍රමය භාවිත කරමින් දෙවිඳුන් පැසසීම, කථනාබාධ ඇති අය, ඒ අය වෙනුවෙන් ම වෙන් වූ දේවස්ථාන නමස්කාර පිළිවෙත්වලට සහභාගී වීම)
මාගේ දෑත්, දෙපා, මුඛය සහ දෙ ඇස් යොදා ගෙන මම දේව
ප්‍රේමයට ප්‍රතිචාර දක්වමි.
කටපාඩම් පදය
ගීතාවලිය 150:4
රඟපාමින් හා කිකිණි රබානෙන්
එතුමන් පසසන්න
වීණාවෙන් හා නළාවෙන්
එතුමන් පසසන්න