1 රාජාවලිය 17 : 1-7

ඊශ්‍රායෙල් දේශය විවිධ කාලවල දී විවිධ රජවරුන් විසින් පාලනය කරන ලද බව ශුද්ධ බයිබලයේ සඳහන් වෙයි. එම රජවරුන් අතරින් ආහබ්, දෙවියන් වහන්සේ ඉදිරියේ නපුරු දේවල් කළ රජ කෙනෙකි. එසේ ම ආහබ්, රට පාලනය කළ කාලයේ ඊශ්‍රායෙල් දේශයේ සිටි දිවැසිවරයා වූයේ එලියා ය.

ඉදිරි කාලයේ පැමිණෙන්නට තිබෙන නියඟය පිළිබඳව දෙවියන් වහන්සේ එළියාට දේව පණිවිඩයක් මගින් දැනුම් දුන් සේක. එම පණිවිඩය එලියා ආහබ් රජුට දැන්වී ය.

දෙවියන්  වහන්සේ එලියාට පණිවිඩයක් ලබා දෙමින් "මෙතැනින් පිටත්ව පෙරදිගට ගොස් ජොර්දාන් ගඟට නැගෙනහිරින් තිබෙන කෙරිත් නම් ඔය ළඟ සැඟවී සිටින්න. එම ඔයෙන් බොන්න පුලුවන. එහි දී නුඹට කෑම දෙන්නට කපුටුවන්ට මම අණ කරමි."යි කී සේක.

දෙවියන් වහන්සේගේ හඬට කීකරු වූ එලියා කෙරිත් නම් ඔය ළඟ සැඟවී සිටියේ ය. දෙවියන් වහන්සේ එලියාට පොරොන්දු වූ ලෙස ම උදය කාලයේ ද සවස් කාලයේ ද කපුටුවෝ රොටි හා මස් එලියාට ආහාර පිණිස ගෙනාවෝ ය. ඔහු එම ආහාර අනුභව කළ අතර පිපාසයට කෙරිත් ඔයෙන් ජලය රැගෙන බීවේ ය.

දෙවියන් වහන්ස‍ේ එලියාට බොහෝ සේ ආදරය කළ සේක. උන්වහන්සේ කපුටුවන් මගින් පවා එලියා පෝෂණය කළ සේක. එම අවස්ථාවේ දී එලියා දේව සංරක්ෂණය නිරතුරු ලැබුවේ ය.

ඔබත්

• එලියා මෙන් දෙවියන් වහන්සේට ආදරය කරන්න.
• එලියා මෙන් දෙවියන් වහන්සේ තුළින් පෝෂණය ලබන්න.
• එලියා මෙන් ඔබේ ජීවිතය තුළ දේව ක්‍රියාකාරීත්වය හා දේව සංරක්ෂණය නිරතුරු අත්දකින්න.

මම දෙවියන් වහන්සේට ආදරය කරමි; දෙවියන් වහන්සේ තුළින්
නිරතුරුව පෝෂණය ලබමි.

කටපාඩම් පදය
"නුඹට කෑම දෙන්නට කපුටුවන්ට මම අණ කළෙමි"
1 රාජාවලිය 17:4