සඳුන් : සරෝජා... අර බලන්න, ලස්සන දේදුන්නක්

සරෝජා : ඔව්, හරි ම ලස්සන දේදුන්නක්.

සඳුන් : බලන්න සරෝජා, දේදුන්නේ ලස්සන පාට ගොඩාක් තියනවා නේද?

සරෝජා : ඔව් සඳුන්, රතු පාට, තැඹිලි පාට, කහ පාට, කොළ පාට, නිල් පාට, ඉන්ඩිගෝ පාට, දම් පාට. මේ පාට හත ම දේදුන්නේ තියනවා.

සඳුන් : දේදුන්න කියන්නේ දේව පොරොන්දුවේ සංකේතයක් කියලා අපේ අම්මා මට කියලා දුන්නා.

සරෝජා : දේව පොරොන්දුවේ සංකේතයක් කියන්නෙ මොකක් ද?

සඳුන් : මම ඔයාට කියල දෙන්නම්කෝ. ඔයාට මතක ද අපි තුන වසරේ දී ඉගෙන ගත්තා දැහැමි පුද්ගලයෙකුව සිටි නෝවා ගැන.

සරෝජා : ඔව් මට මතකයි. දෙවියන් වහන්සේ නෝවාට කිව්වා නැවක් හදන්න කියලා. නෝවා දෙවියන් වහන්සේට කීකරු වෙලා නැවක් හැදුවා. නැව හදලා දින හතකට පස්සේ ඇති වූ වර්ෂාව නිසා මහා ජල ගැල්මක් ඇතිවුණා. මේ ජලගැල්ම දින හතළිහක් පුරා පැවතුණා. නෝවාත් නෝවාගේ පවුලේ අයත් නැවේ සිටි සතුනුත් පමණයි ජලගැල්මෙන් බේරුණේ.

සඳුන් : ඔව් ඔයා හරියට ම හරි. ඒ ජලගැල්මෙන් පස්සේ දෙවියන් වහනස්සේ මිහිපිට ජීවත් වන සැම මනුෂ්‍යයෙකුටත්, සැම සත්වයෙකුටත් පොරොන්දුවක් දුන්නා.

සරෝජා : දෙවියන් වහන්සේ අප සමග ඇති කරගත් පොරොන්දුව මොකක් ද?

සඳුන් : ආ... ඒ තමයි මින් මතු කවදාවත් ජලගැල්මකින් මිහිපිට ජීවත් වන මනුෂ්‍යයන්වත් සතුන්වත් විනාශ නොකරන බව. ඒ විතරක් නෙවෙයි දෙවියන් වහන්සේ දුන් දේව පොරොන්දුවේ සංකේතය තමයි දේදුන්න. දේදුන්න දකින සැම මොහොතක ම අපට ලබා දුන් දේව පොරොන්දුව උන්වහන්සේ සිහිපත් කරනවා.

සරෝජා : ඇයි එහෙනම් නාය යෑම්, ගං වතුර, සුනාමි වගේ ස්වාභාවික ආපදා මගින් මිනිසුන් විනාශ වෙන්නේ?

සඳුන් : මිනිස්සුන් විනාශ වෙනවට දෙවියන්  වහන්සේගේ කිසි ම කැමැත්තක් නැහැ. දෙවියන් වහන්සේ මිනිසාට ආදරෙයි. නමුත් මිනිසා ලෝකයේ පවතින ස්වාභාවික සම්පත් ආරක්ෂා නොකිරීම නිසයි ආපදා ඇති වී මිනිසුන්  විනාශ වෙන්නේ.

සරෝජා : දෙවියන් වහන්සේ අපට ගොඩක් ආදරය කරනවා නේද?

සඳුන් : ඔව් සරෝජා. දෙවියන් වහන්සේ අපට ගොඩක් ආදරෙයි. ඒ වගේ ම අපට හැම මොහොතක ම රැකවරණය ලබා දෙනවා.

සරෝජා : ඔයාට බොහොම ස්තූතියි සඳුන්. මට මේ විස්තරෙ කිව්වට. අපි තව තවත් උන් වහන්සේට ආදරය කරන්න ඕනේ.

දෙවි පියාණන් වහන්සේ ලබා දුන් පොරොන්දුවලට
විශ්වාසවන්තව සිටීමට පුංචි අපිත් පුරුදු වෙමු.

ආදරණීය දෙවි පියාණෙනි,
ඔබ වහන්සේ අප ආරක්ෂා කිරීමට පොරොන්දුවක් දී තිබෙන
නිසාත් අපට අසීමිතව ආදරය කරන නිසාත් ස්තූතියි.
ආමෙන්.