නික්මයාම 13 : 21-22

ඊශ්‍රායෙල් සෙනඟ මිසර දේශයේ වහලූන් ලෙස වසර ගණනාවක් ජීවත් වූහ. ඔවුන්ට මිසරයේ සිටිය දී විවිධ දුක් පීඩාවලට මුහුණ දීමට සිදුවිය. ඒ නිසා ඔවුන් දෙවියන් වහන්සේට යාච්ඤා කළ අතර දෙවියන් වහන්සේ එම යාච්ඤාවලට ඇහුම්කන් දුන් සේක. ඊශ්‍රායෙල් සෙනඟ මිසරයෙන් පිටතට ගෙන ඒම පිණිස දෙවියන් වහන්සේ මෝසෙස් නමැති මනුෂ්‍යයා නායකත්වයට තෝරා ගත් සේක. දෙවියන් වහන්සේ ඊශ්‍රායෙල් සෙනඟ මිසර දේශයෙන් මුදවාගෙන පොරොන්දු දේශය කරා ගෙන ගියේ ය.

එම ගමනේ දී සුවිශේෂී සිදුවීම් රැසකට මුහුණ දීමට ඔවුන්ට සිදු විය. ඊශ්‍රායෙල් සෙනඟට පාළුකරය ඔස්සේ ගමන් කිරීමට ද සිදු විය. එහි දී දෙවියන් වහන්සේ ඔවුන්ට මඟපෙන්වීම ලබා දුන් ආකාර දෙකක් ශුද්ධ බයිබලයේ සදහන් වේ.

1.වලා ටැඹ

දෙවියන් වහන්සේ දිවා කාලයේ දී ආකාශයේ වලා ටැඹක් තුළින් ඊශ්‍රායෙල් ජනතාවට ගමන් කිරීමට මඟපෙන්වූ සේක.

2.ගිනි ටැඹ

එසේ ම දෙවියන් වහන්සේ රාත්‍රී කාලයේ දී ආලෝකය ලබා දෙමින් ඊශ්‍රායෙල් ජනතාවට ගමන් කිරීමට ගිනි ටැඹකින් මඟපෙන්වූ සේක.

දිවා රෑ දෙකේ දී ම වලා ටැඹ හා ගිනි ටැඹ ඊශ්‍රායෙල් ජනතාවට පෙරටුවෙන් ගමන් කරමින් මඟපෙන්වී ය. පොරොන්දු දේශය කරා යන ගමනේ දී දෙවියන් වහන්සේගේ දේව ආදරය, දේව රැකවරණය හා දේව මඟපෙන්වීම අත් දකින්නට ඊශ්‍රායෙල් සෙනඟට හැකි විය.

පුංචි අපිත් හැම විට ම දේව ආදරය, දේව රැකවරණ‍ෙ අත්දකින්නට පුරුදු වෙමු.

කටපාඩම් පදය
දවල් කාලයේ දී වලා ටැඹ ද රාත්‍රි කාලයේ දී ගිනි ටැඹ ද සෙනඟ
ඉදිරියෙන් පහ නොවී ය.
නික්මයාම 13:22