ශු. මතෙව් 14 : 22-33

ජේසු පිහිටයි!

ආදරණීය දරුවනේ,

මේ ලිපිය කියවන ඔයාලා හැමෝට ම ජේසු පිහිටයි මම ජේසුස් වහන්සේගේ ගෝලයා, පේදුරු. ජේසුස් වහන්සේට මම හරි ම ආදරෙයි. මම මේ කියන්න හදන්නේ මගේ ජීවිතය තුළ මුහුණ දුන් පුදුම සහගත අත්දැකීමක් ගැනයි.

දිනක්  ජේසුස් වහන්සේ, තමන් වහන්සේට පෙර ඔරුවට නැඟී එගොඩට යන්න කියා අපට පැවසුවා. ඉන් පසු ජේසුස් වහන්සේ යාච්ඤා කිරීමට අපගෙන් වෙන් වී කන්දකට ගියා. ඒ කියපු ලෙසට ම අපි උන් වහන්සේට කීකරු වෙලා ඔරුවට නැඟලා එගොඩට ගමන් කරමින් සිටියා. එගොඩට යමින් තිබුණු ඔරුව මුහුද මැදදී සැඩ සුළංවලට හසු වී මුහුදු රැලි වල හැපෙමින් ඒ මේ අතට හැරෙමින් තිබුණා. අපි හුඟාක් බයවුණා. කුමක්  කරන්නද ද කියලා අපට තේරුණේ නැහැ.

ඉන් පසු අපි දැක්කේ පුදුම සහගත දෙයක්. ඒ තමයි කවුදෝ කෙනෙක් මුහුද මත ඇවිදගෙන අප ළඟට එනවා. හැබැයි ඒ එන්නේ ජේසුස් වහන්සේ කියලා අපි මුලින් අඳුනා ගත්තේ නැහැ. අපි බයෙන් කෑ මොරදෙන්නට පටන්  ගත්තා. නමුත් ජේසුස් වහත්සේ ඒ වෙලාවේ දී "ධෛර්යවත් වන්න: මේ මමය; බිය නොවන්න," යැයි  පැවසුවා.

ජේසුස් වහන්සේගේ වචනය තුළ ධෛර්යවත් වූ මටත් ඕන වුණා මුහුද මත පයින් ගමන් කරමින් ජේසුස් වහන්සේ ළඟට යන්න. "ස්වාමීනී, ඔය ඔබ වහන්සේ නම් වතුර මත ඔබ වෙත එන්නෙ මට අණ කළ මැනැව"යි කියා මම ජේසුස් වහන්සේට කිවුවා. එවිට උන්වහන්සේ, 'එන්න!' යැයි මට පැවසුවා.

මම ඔරුවෙන් බැහැලා ජේසුස් වහන්සේ වෙතට වතුර මත ඇවිදගෙන යන්න පටන් ගත්තා. ඒක නම් පුදුම අත්දැකීමක්! මම ජේසුස් වහන්සේ දිහා බලාගෙන ටික දුරක්  ගමන්  කළා. එත්  පසුව මුහුදේ රැලි එන්න එන්න ම වේගවත්  වූ නිසා මම බයවුණා. එ විතරක් නෙවෙයි මා ගිලෙන්නට පටන්  ගත්තා.

"ජේසුස් වහන්සේ, මා බේරා ගන්න!" කියලා මා කෑගැසුවා. ජේසුස් වහනසේ මගේ අත ඒ වෙලාවේ ම අල්ලාගෙන ඔබේ ඇදහිල්ල කෙතරම් හීන ද? සැක කළේ මන් ද? යැයි මාගෙන් විමසුවා.

ජේසුස් වහන්සේ මට ගිලෙන්න නොදී ගලවා ගෙන මාත් සමග ඔරුවට පැමිණියා. ඉන් පසු තදින් හැමූ  සුළඟ ද නැවතුණා. මේ සිද්ධිය කවදාවත්  මට අමතක වෙන්නේ නැහැ.

ඒ දිනයේ දී ජේසුස් වහන්සේ මුහුද මත පයින් ගමන් කිරීමෙන් සහ මා ගිලෙන්නට නොදී ගලවා ගැනීමෙන් උන්වහන්සේ පුදුම සහගත දේව වැඩ සිටීම මම අත්දැක්කා. ඉතින් පුංචි දුවේ පුතේ, ඔබ මුහුණ දෙන ගැටලූවල දී ඔබත්  ධෛර්යවත් වෙන්න.

ජේසුස් වහන්සේ තුළ ඇදහිල්ලෙන් ගමන් කරන්න. හැම කරදරයකදී ම ජේසුස් වහන්සේට කතා කරන්න. උන් වහන්සේ අප ළඟට ම ඇවිත් අපට උත්තර දෙනවා. ඔබ සැමට ජේසු පිහිටයි!

මම ආදරණීය,
පේදුරු තුමා.

පුංචි මමත් ඇදහිල්ලෙන් ජීවත් වන්නට පුරුදු වෙමි.

යාච්ඤාව
ආදරණීය දෙවියන් වහන්ස,
පුංචි මමත් ඔබ වහන්සේට ආදරෙයි. ඔබ වහන්සේ මා
ධෛර්යවත් කළ මැනව; ඇදහිල්ලෙන් ගමන් කිරීමට
උපකාර කළ මැනව. ඔබ වහන්සේගේ දේව වැඩවිසීම
අත්දකින්නට මට පිහිට වුව මැනව.
ආමෙන්.