ශු. ලුක් 15 : 3-7

ගුරුතුමිය : එක්තරා බැටළු එඬේරෙකුට තම බැටළු රැළේ බැටළුවන් සියයක් සිටියා.

කිතුණි : කවුද ටීචර්, එඬේරෙක් කියන්නේ?

ගුරුතුමිය: එඬේරෙක් කියන්නෙ පුතේ, බැටළුවන් බලා ගන්නා තැනැත්තාටයි. ඔන්න එක දවසක් ඔය රැළේ එක බැටළුවෙකු අඩු වී ඇති බව එඬේරාට තේරුණා.

ළමයි : අනේ පව් නේද?

ගුරුතුමිය: හොඳයි, කියන්න බලන්න එඬේරා මොනවා කරන්න ඇද්ද කියලා?

මානෙල් : ඒ බැටළුවා සොයන්න ඇති.

ගුරුතුමිය: අන්න හරි.

නෙතුල් : එතකොට අර අනූනව දෙනාට මොක ද වෙන්නෙ?

ගුරුතුමිය: ඒ බැටළුවන් ඉතා ආරක්ෂිතව තියලා එඬේරා නැති වුණ බැටළුවා සොයමින් ගියා.

ලහිරු : ඉතින් හම්බ වුණා ද ටීචර්?

ගුරුතුමිය: ඔව්, එඬේරා ඒ නැති වුණු බැටළුවා සම්බ වන තුරු ම සොයලා බැටළුවා සොයා ගත්තා.

යොහාන් : අනේ අපිටත් හරි ම සතුටුයි.

ගුරුතුමිය: අන්න හරි. එඬේරාටත් ඒ වගේ ම ලොකු සතුටක් ඇති වුණා. දන්නවා ද එඬේරා කරපු දේ?

ලහිරු : නැති වී සම්බ වූ බැටළුවා කරේ තියාගෙන එන්න ඇති.

ගුරුතුමිය: හරියට ම හරි. එඬේරා බැටළුවා නිවසට ගෙනැවිත් තමාගේ මිතුරන් කැඳවා තම නැති වූ බැටළුවා සම්බ වූ බව පවසා ප්‍රීති ප්‍රමෝද වුණා.

කිතුණි : හරි ලස්සන උපමා කතාවක්.

ගුරුතුමිය: හොඳයි, කියන්න බලන්න උපමා කතාවේ එඬේරාට සමාන කරන්නේ කවුද කියලා?

යොහාන් : ජේසුස් වහන්සේ නේද ටීචර්?

ගුරුතුමිය: ඔව්, ජේසුස් වහන්සේ තමයි, අපේ යහපත් බැටළු එඬේරා.

සෞභාග්‍ය: එතකොට අර නැති වුණ බැටළුවා කවුද?

ගුරුතුමිය: ඒ තමයි වැරදි කරන, අකීකරු වන අය. ජේසුස් වහන්සේගේ ආදරයෙන් ඉවත්ව ගිය අය. බලන්න ජේසුස් වහන්සේ එක ම බැටළුවෙකු වත් නැති වෙන්න ඉඩ නොදී රැක ගත්තා. අප නොමඟ යනවාට උන්වහන්සේ කැමැති නැහැ. එසේ වීමට ඉඩ නොදී නැති වුණ බැටළුවා සොයා ගියාක් මෙන් ජේසුස් වහන්සේ අප සොයා එනවා. ඒ උන් වහන්සේගේ අසීමිත කරුණාව නිසයි. උන් වහන්සේ ඔබ ආදරයෙන් උසුලාගෙන, අසීමිතව කරුණාව පා ඔබ රැක ගන්නවා ඇත.

මෙම පාඩමෙන් ගත හැකි ආදර්ශ

• ජේසුස් වහන්සේගේ ආදරය හා රැකවරණය අපට නිරතුරුව ලැබෙන බව
• අප වැරදි කිරීමෙන් ජේසුස් වහන්සේගෙන් ඈත් වූ විට උන්වහන්සේ අප සොයා එන බව
• අප සම්බ වන තුරු ම සොයන බව
• සොයාගත් විට ජේසුස් වහන්සේ බොහෝ සේ ප්‍රීති වන බව
• ජේසුස් වහන්සේගේ අසීමිත කරුණාව අප කෙරේ ඇති බව

යාච්ඤාව
ආදරණීය ජේසුස් වහන්ස, ඔබ වහන්සේ මාගේ යහපත් එඬේරාණෝ ය. මා අතින් සිදු වන වැරදිවලට සමාව දුන මැනව. ඔබ වහන්සේ ළඟ මා රඳවා ගත මැනව.
ආමෙන්.