11 - ශ්‍රාවක පිරිසට එක් වූ කාන්තාවෝ
ජේසුස් වහන්සේ මේ ලෝකයේ සිටි කාලයේ සෙනගට දේශනා කළ සේක. විවිධාකාර ලෙඩ රෝගවලින් පෙළුණු අය සුව කළ සේක. එපමණක් නොව ශුභාරංචිය පකාශ කරමින් නගරවල සහ ගම්වල සැරිසැරූ සේක. උන් වහන්සේ සමග ප්‍රේරිතයන් දොළොස් දෙනා ද නිතරම ගමන් ගත්හ. උන්වහන්සේ සමග ගමන් ගත් ශ්‍රාවක පිරිස අතර කාන්තාවෝ ද සිටියහ.
ජේසුස් වහන්සේ සමග සිටි ශ්‍රාවක කාන්තාවෝ උන්වහන්සේගේ සේවයට උදවු කළෝ ය. උන් වහන්සේ කුරුසි පත්වීමට නියමිත අවස්ථාවෙී දී ඔවුහු ජේසුස් වහන්සේ ළඟ සිටියහ. ජේසුස් වහන්සේ උත්ථාන වූ පසු මුලින්ම ප්‍රකාශ වූයේ මරියා ඇතුළු කාන්තා පිරිසට ය. උන්වහන්සේ මළවුන්ගෙන් උත්ථාන වීමෙන් පසු, පළමු වෙන් සාක්ෂි දැරීමටත්, ඒ පුවත අන්‍යයන් වෙත ගෙනයෑමටත් කාන්තාවන් තෝරා ගත් සේක.
දුෂ්ටාත්ම හත්දෙනෙකු වැසීසිටි මග්දලේනා නම් ලත් මරියා නම් කාන්තාවක් වූවා ය. ජේසුස් වහන්සේ ඇය සුව කළ සේක. ඈ සුවය ලැබූ පසු ජේසුස් වහන්සේගේ ශ්‍රාවක කාන්තාවන් අතරට එක් වූවා ය.
හෙරොද් රජතුමාගේ භාණ්ඩාගාරිකගේ නම කුසා ය. කුසාගේ භාර්යාව ජෝවන්නා නම් කාන්තාවකි. ජෝවන්නා ද ජේසුස් වහන්සේගේ ශ්‍රාවක කාන්තාවන් අතර සිටි තවත් කෙනෙකි.
ජේසුස් වහන්සේගේ ශාවක කාන්තාවන් අතර සුසානා නම් වූ තවත් කාන්තාවක් ද වූවා ය.
මේ සියලූ කාන්තාවෝ උන් වහන්සේ පසු පස යමින් උන් වහන්සේගේ සේවාවන්ට සහාය වූහ. එපමණක් නොව සිය සම්පතින් උන්වහන්සේට උපස්ථාන කළෝ ය. මේ අනුව ඔවුන් උන්වහන්සේගේ ශ්‍රාවිකාවන් සේ කටයුතු කළ බව පෙනී යයි.
ජේසුස් වහන්සේ පසුපස ගමන් කරන උන්වහන්සේගේ
සේවාවන්ට සහාය වන මම ද ශ්‍රාවකයෙක් වෙමි.
කටපාඩම් පදය
ශු. ලුක් 8:3
හෙරොද්ගේ භාණ්ඩාගාරික වන කුසාගේ භාර්යාව වන
ජෝවන්නා ද සුසානා ද සිය සම්පතින් උන්වහන්සේට
උපස්ථාන කළ තවත් බොහෝ ස්ත්‍රීහු ද සිටියහ.