ගුරුතුමිය : අද මට හරි සතුටු දවසක්. අද උදෙන් ම ඔයාලට ඒක කියන්නයි මම ආවේ. විදුහල්පති තුමයි ඒ පණිවිඩය දෙන්න කීවේ.

රෙබෙකා : මොකක් ද ටීචර්? අපිත් දැනගන්න ආසයි. ටීචර් හරි ‍සතුටින් බව පේනවා.

සිසුන් : මොකක් ද ටීචර් ?

ගුරුතුමිය :ඔයාලට මතක ද, අපේ පුස්තකාලයේ ඉපැරණි‚ පොත්පත සංරක්ෂණය කරන වැඩපිළිවෙළක් තිබුණා. අපේ පංතියෙන්, අපේ විෂයයට අදාළව රෙබෙකා, සඳුනි, පාලිත, කාලිංග, ධර්මේන්ද්‍ර අපි එකට තෝරාගත්තා.

කාලිංග : ඔව් ටීචර්, අපට පැවරුණේ පුස්තකාලය භාර සර්ගේ මඟපෙන්වීම යටතේ එහි තිබුණු බයිබල් අටුවා, පැරණි බයිබල්, ඒ ආශිත ඉපැරණි පොත් පත් පිළිවෙළට සකස් කරන එකයි.

ධර්මේන්ද්‍ර: මේ වැඩය අපට හරි ම අපහසු කාර්යයක් ලෙස දැනුණා. සමහර පොත් පරණයි, කොළ ගැලවිලා. ඒවා පිළිවෙළට සකස් කරන්න අපට හරියට මහන්සි වෙන්නත් සිද්ධ වුණා. ඒත් අපි ඉවසීමෙන් ඒ වැඩය කළා. අක්කලා අයියලාත් අපට උදවු කළා.

ගුරුතුමිය : අන්න ඒක ගැන තමයි මම කතා කරන්නේ. ඔයාලා ඒ වැඩය ඉතා ම ඕනැකමින්, විශ්වාසවන්තව ඉටු කළා කියලා පුස්තකාල භාර සර් විදුහල්පති තුමාට දන්වලා තියෙනවා.

සඳුනි : ටීචර්, ඒ වැඩේ කරන කොට අපිට බයකුත් ඇති වුණා. සර් කිවුවා මේ පුස්තකාලය තමයි ඉතා වැදගත් ඉපැරණි පොත් ආරක්ෂා වෙලා තියෙන පුස්තකාලය කියලා. එහි සමහර පොත් වෙන කොහෙවත් නැහැ කියලා කිවුවා.

කාලිංග : ඔව් ටීචර්, අපි හැම දා ම ඒ වැඩේට යනකොට පුස්තකාලයට මෙහා තියෙන අඹ ගහ යටට ගිහින් යාච්ඤා කරලා ගියා. ටීචර් අපිට කලින් කියලා තිබුණේ හැම වැඩක් ම විශ්වාශවන්තව, කලබල නොවී, කල්පනාවෙන් සිත යොමු කරගෙන කරන්න කියලා.

ගුරුතුමිය :ඔව් කාලිංග, ඔයාලට මතක ද මීට කලින් පංති වලදී ශුද්ධාත්ම ඵලයට සම්බන්ධ ගුණාංග හයක් ගැන ඉගෙන ගත්තා.

ධර්මේන්ද්‍ර: මට නම් මතකයි. ප්‍රේමය, ප්‍රීතිය, සාමය

රෙබෙකා : මමත් කියන්නම්. ඉවසීම, කරුණාව, යහපත්කම.

ගුරුතුමිය :හරියට ම හරි. ශුද්ධාත්ම ඵලයට සම්බන්ධ තවත් ගුණාංග තුනක් තමා විශ්වාසකම, මෘදුකම හා ආත්ම දමනය. ඔයාලා හතර දෙනා ළඟ ඒ ගුණාංග තිබුණ නිසයි ඉවසීමෙන් හැමෝ ම එක්ක කරුණාවෙන්, මෘදු මොළොක් වචන කතා කරමින් ඒ ව්‍යාපෘතිය සම්පූර්ණ කළේ. මට හරි ම සතුටු යි. අපි ඔක්කොම මේ හතර දෙනාට අත්පොළසන් දෙමු.

ජේසුස් වහන්සේට අයිති දරුවෙකු වීමෙන්, මගේ ජීවිතයෙන්
ශුද්ධාත්ම ඵලයට අයත් ගුණාංග ප්‍රකාශ වන බව මම විශ්වාස
කරමි.

යාච්ඤාව
ආදරණීය ජේසුස් වහන්ස, ඔබ වහන්සේ මගේ හදවතට
ඇතුළු වන්න. එහි වැඩ වසන්න. ඒ තුළින් ශුද්ධාත්ම ඵලයට
අයත් ගුණාංග මා තුළ වර්ධනය කළ මැනව.
ආමෙන්.