2 රාජාවලිය 22 : 1-2

ඊශ්‍රායෙල් දේශයේ බිහිවුණු පුංචි වීරයෙකු ගැන ශුද්ධ බයිබලයේ සඳහන් වේ. ඔහුගේ නම ජොෂියා ය. ජොෂියා රජුගේ මව ජෙදිදා ය. ජොෂියා වයස අවුරුදු අටේ දී රජකමට පත් වූ අතර ඔහු කුඩා දරුවෙකු වුවත් දේව සැලැස්ම ඉටු කිරීමට කුඩා කාලයේ දී ම දෙවියන් වහන්සේ විසින් ඔහු තෝරා පත් කරගනු ලැබිණි.

ශුද්ධ බයිබලයේ සඳහන් වන ආකාරයට ඔහු කුඩා කාලයේ පටන් දෙවියන් වහන්සේ ඉදිරියේ නිවැරදි දේ කිරීමට කටයුතු කළේ ය; දාවිත් රජතුමා ආදර්ශයට ගනිමින් දෙවියන් වහන්සේ ඉදිරියේ යහපත්ව සිටියේ ය. දාවිත්ට පොරොන්දු වූ ආකාරයට දාවිත්ගේ වංශය ඉදිරියට ගෙන යාමට දෙවියන් වහන්සේ කුඩා ජොෂියා රජතුමා තෝරා ගත් සේක.

දස පනතේ ඇති නීති රීති හා ආඥාවලට කීකරු වී ජීවත් වූ කුඩා ජොෂියා රජු ඔහුගේ ජීවිතය තුළ දේව නීතිය ප්‍රතිපත්තියක් කර ගනිමින් ජීවත් විය.

මෙසේ ජොෂියා රජතුමා දෙවියන් වහන්සේට ආදරය කළ බවත් කුඩා කල පටන් ඔහු යම් විශේෂ වැඩකට තෝරා පත් කළ බවත්, ඔහුට එය කළ හැකි වූ බවත් අපට පෙනී යයි.

පුංචි ඔබත් ජොෂියා රජු මෙන්,

• දෙවියන් වහන්සේ ඉදිරියේ නිවැරදි දේ කරන්න.
• කුඩා වයසේ සිට දෙවියන් වහන්සේට පමණක් නමස්කාර කරන්න.
• දේව නීති රීති, ආඥා රකින්න.
• නිර්භීතව දේව කැමැත්ත ඉටු කරන්න.
• යහපත් චරිත ආදර්ශයට ගන්න.
• දේවස්ථානයේ ඔබට පැවරී ඇති වැඩ යහපත් ලෙස සිදු කරන්න.
• නිරතුරු අන්‍යයන්ට ආදර්ශයක් වන්න.

ජොෂියා රජුගේ ජීවිතයෙන් පුංචි ඔබේ ජීවිතයටත් බොහෝ යහපත් ගුණාංග ලබා ගත හැකි ය. එම ගුණාංග ඔබේ ජීවිතය තුළින් වර්ධනය කර ගනිමින්, දෙවියන් වහන්සේ ඉදිරියේ නිවැරදි දේ කරමින්, ස්වර්ග රාජ්‍යයේ කිරුළක් පුංචි ඔබත් හිමි කර ගන්න.

පුංචි මමත් දේව පනත් ඉටු කිරීමට ක්‍රියා කරමි.

ආදරණීය දෙවියන් වහන්ස,
පුංචි මටත් නිවැරදි දේ කරන්නට පිහිට වුව මැනව. දේව
කැමැත්තට කුඩා කල පටන් අවනත වීමටත්, යහපත් ආදර්ශවත්
ජීවිතයක් ගත කිරීමටත් මට ආශීර්වාද කළ මැනව.
ආමෙන්.