(වේදිකාවේ තිරය විවෘත විය. සිසුහු "නායකයා" නම් නාට්‍යය රඟදැක්වීම ආරම්භ කළහ.)

ගැල් නායකයා - සුනිමල ඊයේ රෑ මට නින්ද ගිය නිසා ගොනුන් ට අණ දෙන්න කෙනෙක් නැති වුණා. ඒ නිසා ඊයේ හවස අපි හිටපු තැනට ම ගොන්නු ගැල් අරගෙන ඇවිත් තියෙනවා.

සුනිමල - නායකතුමනි, අපි දැන් මොක ද කරන්නේ? මිනිස්සුන්ට ගොන්නුන්ට කොහොම ද මේ නිරුදක කාන්තාරේ අපි වතුර සොයා ගන්නේ?

නන්දිමිත්‍ර - තව එක දවසකින් ගමන ඉවර වෙන නිසා ඊයේ ඉතුරු වතුර විසි කරලා දැම්මනේ. මේ කාන්තාරෙ අපට වතුර නැතිව මිය යන්න සිද්ධ වේවි ද?

ගැල් නායකයා - අපි දැන් මුහුණ දීලා ඉන්නේ ලොකු කරදරේකට. ගැල් සාත්තුවේ නායකයා විදියට මං හැම කෙනකුගෙ ම ජීවිත බේරගන්න විදියක් කල්පනා කරන්න ඕනෑ. පහුගිය දවස්වල මගේ නායකත්වය, මගේ තීරණ කවුරුත් කැමැත්තෙන් පිළිගත්තා. ඒ විදියට වැඩ කළා. නායකයා විදියට මට ලොකු වගකීමක් තියෙනවා ඔබ සැම දෙනාගෙ ම ජීවිත ගැන. මේ අවස්ථාවේ අපි හැමෝම එකතු වෙලා මේ කරදරයෙන් බේරෙන්න උත්සාහ කරමු.

සුනිමල - ඔව් අපි සියලූ දෙනා එකතු වී නායකතුමාට උදවු කරමු.
(ගැල් නායකයා හාත්පස මනාව පරීක්ෂා කර බලයි)

ගැල් නායකයා - ආ..... අර ඈතින් පේනවා නේද ඊතණ පඳුරක්. යමු අපි එතැනට ගිහින් බලමු.

සුභූති - ඔව්, හොඳට වැඩුණු ඊතණ පඳුරක්. 

ගැල් නායකයා - කාන්තාරේ ඊතණ පඳුරක් වැඩෙනවා නම් මෙතන වතුර තියෙන්න ම ඕනේ. අපි මේ පඳුර ගලවලා දාලා පොළොව හාරලා බලමු.

නන්දිමිත්‍ර - එහෙමයි නායකතුමනි.

ගැල් නායකයා - සුනිමල, ගිහිං ගැල්කරුවන් කීපදෙනෙක් අඬගහගෙන එන්න. කරත්තවල තියෙන පොළොව හාරන්න පුළුවන් උපකරණත් අරගෙන එන්න.

සුනිමල - එහෙමයි නායකතුමනි.

ගැල් නායකයා - නන්දිමිත්‍ර, සුභූති අපි මුහුණ දීලා ඉන්න කරදරෙන් ගැලවෙන්න නම් අපි එකමුතු වෙන්න ඕන. වෙහෙසයි කියලා හිත දුර්වල කරගන්න එපා. අපි කවුරුත් එකතු වෙලා පඳුර ගලවලා දාලා පොළොව හාරලා බලමු. මෙතන වතුර තියෙන්න ම ඕනෑ.

නන්දිමිත්‍ර සහ සුභූති - හොඳමයි අපි එහෙම කරමු.

(සුභූති හා නන්දිමිත්‍ර එකතු වී පඳුර ගලවා දමා එතැන පොළොව හාරන්නට පටන් ගනිති. තවත් ගැල් කරුවන් කීප දෙනෙකුත් ඒ සඳහා එකතු වී වැඩ කරති. සෑහෙන වේලාවකට පසු ව ගැඹුරු වළක් කැණීමට ඔවුනට හැකි වෙයි. එහෙත් අවසානයේ පතුලේ කළු ගලක් හමුවීමෙන් ඔවුහු මන්දෝත්සාහී වෙති.)

සුභූති - හරි ම මහන්සියි. අපි කොච්චර පොළොව හෑරුවද? දැන් තියෙන්නේ විශාල ගලක් විතරයිනේ.

(ගැල් නායකයා වළට බැස පතුළේ ඇති ගලට කන තබා බලයි.) 

ගැල් නායකයා - මේ ගල යටින් වතුර පාරක් ගලන හඬක් ඇහෙනවා. අපි මේ යකඩ මිටිවලින් ගහලා ගල බිඳිමු.

ගැල්කරුවෝ - මේ ගල බිඳින්න පුළුවන් වෙයි ද නායකතුමනි?.

ගැල් නායකයා - අපි උත්සාහ කළේ නැත්නම් මේ කාන්තාරේ ම අපට මිය යන්න සිද්ධ වේවි.

නන්දිමිත්‍ර - ඔව්! ඔව්! අපේ නායකතුමා කවදාවත් අපට වැරැදි දෙයක් කියලා නෑනේ.

සුනිමල - හයියෙන් ගහලා ගල බිඳිමු. ඔන්න එහෙනම් එකයි... දෙකයි.... තුනයි....

සුභූති - ආ.... මෙන්න ගල බිඳුණා. මෙන්න.... මෙන්න.... වතුර එනවා.

(ගැල්කරුවෝ ප්‍රීතියෙන් ඔල්වරසන් දෙති.)

ගැල් නායකයා - කවුරුත් මං කියන දේ ඇහුවා. එකතු වෙලා වැඩ කළා. අපි අපේ අභියෝගය ජය ගත්තා. දැං ඉතින් කවුරුත් නාලා, කෑම උයලා, කාලා බීලා ගොනුන්ටත් වතුර පොවලා, නාවලා, කන්න දීලා හවසට ගමන පිටත් වෙමු. අද සවස ආපසු පිටත් වෙනකොට මෙතැන සලකුණක් තබලා යමු.

සුනිමල - ඒ මොකට ද නායකතුමනි?

ගැල් නායකයා - මේ කාන්තාරේ ප්‍රසිද්ධ නිරුදක කාන්තාරේ කියලනේ. නිරුදක කියන්නේ වතුර නෑ කියන එකනේ. අපි මෙතැන කොඩියක් ඔසවලා වතුර තියෙන තැනක් බව දන්වමු. කාන්තාරේ හරහා යන අනිත් අයටත් මෙතනින් වතුර ලබාගන්න පුළුවන් වේවි.

ගැල්කරුවෝ - ඒක බොහොම හොඳ අදහසක්. අපි එහෙම කරමු.

(වණ්ණුපථ ජාතක කථාව ඇසුරින් රඟ දක්වන ලද නායකයා නම් නාට්‍යය අවසන් කරමින් වේදිකාවේ තිරය වැසිණ.)