19 - ශ්‍රමය දීම දානයක්
"ආයුබෝවන් !
තෙරුවන් සරණයි ! දුවේ පුතේ.
"ආයුබෝවන් !
තෙරුවන් සරණයි ! ගුරු මෑණියනි.”
"දූලා, පුතාලා දන්නවා ද ත්‍රිවිධ පුණ්‍ය ක්‍රියා කියන්නේ මොනවා ද කියලා? යි” ගුරුතුමී ඇසුවා ය.
"මම දන්නවා. ත්‍රිවිධ පුණ්‍ය ක්‍රියා තමයි, දාන, සීල, භාවනා කියන්නේ,” සිතුල පිළිතුරු දුන්නේ ය.
"බොහොම හොඳයි පුතා. අපි හැමෝ ම දානමය පින්කම් කරලා තියනවානේ. ඒ දානවල දී ආහාර වර්ග, පොත්පත්, ඇඳුම් පැලඳුම් වගේ දේවල් දන් දුන්නා මතක ඇති. අද මම දූලා පුතාලට කියලා දෙන්නේ විශේෂ දානයක් ගැන. තමන්ගේ වෙහෙස මහන්සිය යොදවලා පොදු කටයුත්තකට සහභාගි වීමක් තමයි මේ දානය. ඒ කියන්නේ අපේ ශ්‍රමය යොදවලා පොදු දෙයකට සහභාගි වෙලා අපට පින් රැස් කර ගන්න පුළුවන්. අපි ඒ පින්කම හඳුන්වන්නේ ශ්‍රමදානය කියලයි.”
"ඇයි ගුරුතුමී අපි තුන්වන ශ්‍රේණියේ දී පන්සල පිරිසිදු කළේ ශ්‍රමදානයකින්," ධනුක කීවේ ය.
"අපේ දහම් පාසලෙන් වැඩිහිටි නිවාසයකට ගියා අම්මලා තාත්තලාත් එක්ක. අපි හැමෝම එකතුවෙලා ලොකු ශ්‍රමදානයක් කළා,” නිපුන් කීවේ ය.
"එහෙනම් නිපුන් පුතේ යාළුවන්ට දැනගන්නත් එක්ක පුතා ඒ ශ්‍රමදානය කළ හැටි කියන්නකෝ,” ගුරුතුමී කීවා ය.
නිපුන් ශ්‍රමදානය කළ හැටි විස්තර කළේ ය.
"එළිමහනේ තිබූ බංකුවල ආච්චිලා සීයලා එක්කරගෙන ඇවිත් වාඩි කළා. සමහර අය එක්කරගෙන ආවේ රෝද පුටුවලින්. අපි ආච්චිලා සීයලා සමග ටික වේලාවක් කතා බහ කරමින් හිටියා.
"තාත්තලා නිවාසයේ මකුළු දැල් කඩලා අතුගාලා සෝදා පිරිසිදු කළා. ඇඳන්වල කොට්ට මෙට්ට අව්වට දැමුවා. ඇඳ ඇතිරිලි හා කොට්ට උර සෝදා පිරිසිදු කළේ අම්මලා.
"ආච්චිලා සීයලා කන බොන පිඟන් කෝප්ප සෝදන්න අපිත් උදවු කළා. සමහර ආච්චිලා සීයලාට තනියම නාගන්න බැහැ. අම්මලාගේ උදවු ඇතිව අපි ඒ අයව නහවා පිරිසිදු කළා. දූලා පුතාලා හැම දෙනාට ම නීරෝගී සුවය ප්‍රාර්ථනා කරනවා. අපට කළ උදවු උපකාරවලට බොහෝම පින් කියා ආච්චිලා සීයලා අපට කිවුවා.
"මිදුලේ වල් පැළ ගැලෙව්වේ අපි. තාත්තලා තණකොළ උදලූ ගාලා වත්ත පිටිය පිරිසිදු කළා. මුළු වැඩිහිටි නිවාසය ම පිරිසිදු කර හැමෝම එක තැනකට රැස් වුණා.
අප රැගෙන ගිය කෑම බීම ආච්චිලා සීයලාට දුන්නා. ඒ අය හරි ම සතුටින් කෑම කෑවා. සමහර අයට අපේ අම්මලා කෑම කැවුවා. අපි ගීත ගයමින් නටමින් ආච්චිලා සීයලා සතුටු කළා. ඒ අයත් ගීත ගයමින් අත්පොළසන් දුන්නා. එක සීයා කෙනෙක් අප කළ ශ්‍රමදාන පින්කම ගැන ස්තුති කතාවක් කළා. අපි ඒ හැම දෙනාට ම වැන්දා. අප වැන්ද විට ආච්චිලා සීයලා අපට "බුදු සරණයි, තෙරුවන් සරණයි!” කියා ආශීර්වාද කළා.”
"බොහොම හොඳයි නිපුන් පුතේ. ශ්‍රමදාන පින්කම ගැන පුතා අපට ඉතාම හොඳින් කියා දුන්නා”
"ඉතිං දූලා පුතාලා කැමැති ද පුංචි ශ්‍රමදානයක් කරන්න?”
"ඔව් ගුරුතුමී,” සිසුහු එක හඬින් කීහ.
"එහෙනම් දුවේ පුතේ අපිත් එකතුවෙලා පාසල් වත්ත පිරිසිදු කිරීමේ ශ්‍රමදාන පින්කමක් ලබන සතියේ කරමු.”