ආච්චිලා, කිරි අම්මලා මුනුපුරු මිනිපිරියන්ට හරි ම ආදරෙයි. දවසක්දා කිරි අම්මා කෙනකු ලියුමක් ලියන හැටි මුනුපුරෙක් බලා ගෙන උන්නා. කිරි අම්මා ලිවුවේ ලස්සන පැන්සලකින්.

කිරි අම්මා ලියන හැටි බලා ගෙන සිටි මුනුපුරා කිරි අම්මාගෙන් මෙහෙම ඇහුවා.

"කිරි අම්මා ඔය ලියන්නේ අපි කරපු දේවල් ගැන ද? මං ගැනත් ලියනවාද?”

කිරි අම්මා ලිවීම නවත්තලා මුනුපුරාට මෙහෙම කිවුවා.

"ඇත්තටම මං ලියන්නේ ඔයා ගැන තමා. ඒත් ඒ ලියන වචන වලට වැඩිය මං පාවිච්චි කරන මේ පැන්සල වටිනවා. ඔයා ලොකු වුණා ම මේ පැන්සල වගේ වෙයි කියලා මං හිතනවා.”

"මොකද්ද ඒ කතාවේ තේරුම?" මුනුපුරා පුදුම වෙලා පැන්සල දිහාබැලූවා. ඒකෙ කිසිම අමුත්තක් එයා දැක්කෙ නෑ.

"ඕක මං දැකලා තියෙන ඕනෑ ම පැන්සලක් වාගෙයි නේ!” කියා මුනුපුරා කිවුවා.

"ඒ ඔයා ඒක දිහා බලන හැටියටයි. ටිකක් හිතලා බලන්නකො. පැන්සලක තියෙනවා ගුණාංග පහක්. ඔයාත් ඒ ගුණාංග පහ පුරුදු පුහුණු කළොත් ඔයාත් අනාගතයේ දී හොඳ මනුස්සයෙක් වෙයි.”

අනේ කිරි අම්මෙ, කියන්නකො හොඳ මනුස්සයෙක් වෙන්න ඕනෑකරන ඒ ගුණාංග පහ මොනවා ද කියලා.” කිරි අම්මා පැන්සලේ ගුණ කියන්න පටන් ගත්තා.

පළමුවැනි ගුණාංගය

පැන්සලකින් ලියන්න නම් ඒක අල්ලාගන්න අතක් ඕනෑ. පැන්සලකට බෑ තනියෙන් ලියන්න. කාගෙ හරි අතක් ඕනෑ ඒක අල්ලා ගන්න. අන්න ඒ වගේ වැඩවල දී සහයෝගයෙන් කටයුතුකරන්න ඔයා ඉගෙන ගන්න ඕනෑ. එතකොට තමයි ඔයා කරන දේ සාර්ථකවෙන්නේ.

දෙවැනි ගුණාංගය

ලියන කොට ලියන කොට පැන්සලේ තුඩ මොට වෙනවා. එහෙම වුණා ම ලිවීම නවත්තලා ඒක ආයෙත් උල් කර ගන්න ඕනෑ. උල් කරන කොට පැන්සලට ටිකක් රිදේවි. ඒත් ඊට පස්සෙ ඒක වඩාත් හොඳින් ලියාවි. ඒ වගේ ඔයාටත් ඉඳහිට සුළු සුළු දුක් වේදනා ඉවසාගන්ට සිදු වේවි. හැබැයි ඊට පස්සෙ ඔයා වඩාත් හොඳ කෙනෙක් වේවි.

තුන්වැනි ගුණාංගය

පැන්සලෙන් ලියන කොට මොකක්හරි වැරැද්දක් වෙන්න පුළුවන්. එහෙම වුණොත් මකා ගන්න පුළුවන්. අන්න ඒ වගේ ඔයා අතින් වැරැද්දක් වුණොත් ඒක හදා ගන්න ඕනෑ. වැරැද්දක් හදා ගැනීම නරක දෙයක් නොවෙයි. අපිට හරි පාරේ යෑමට ඒක උදවු වේවි.

හතරවැනි ගුණාංගය

පැන්සලේ වටිනා ම කොටස මොකක් ද? එළියෙ පෙනෙන්න තියෙන හැඩරුව ද? පාට ද? නෑ, ඒ එකක් වත් නොවෙයි, ඒක ඇතුළෙ තියෙන මිනිරන් කූරයි. අන්න ඒවගේ ඔයාගේ වටිනා ම කොටස ඔයාගේ පෙනුමවත් හමේ පාටවත් නෙමේ. ඔයා තුළ තිබෙන හොඳ ගතිගුණයි.

පස්වැනි ගුණාංගය

පැන්සලෙන් යමක් ලිවුවා ම ඒ ලියාපු දේ ඉතුරු වෙනවා. අන්න ඒ වගේ ඔයා යමක් කළා ම ඒ කරපු දේත් ඉතුරු වෙනවා. ඒ නිසා ඔයා කරනහැම දෙයක් ම කල්පනාවෙන් කරන්න.

මේ අදහස් උපුටා ගත්තේ පාවුලෝ කොයියෝ (Paulo Coelho) නම් බ්‍රසීල ලේඛකයාගේ ගලන ගඟ වගේ (Like the flowing River) නම් ඉංග්‍රිසි පොතේ ‘පැන්සලේ කතන්දරය’ (The Story Of The Pencil) නම් පරිච්ඡේදයෙන්

ඒ පහට තවත් ගුණාංගයක් එක් කරන්න පුළුවන්.

හයවැනි ගුණාංගය තමා පැන්සලේ හැඩය. පැන්සල හරි කෙළින්. ඉදිකටුවක් වගේ. ඔබත් පැන්සලක් වගේ හරි කෙළින් ඉන්න, කෙළින් කටයුතු කරන්න. වංක නොවී අවංක වෙන්න.

(මහාචාර්ය ජේ. බී. දිසානායකගේ පරිවර්තනය ඇසුරෙනි.)