අල්ලාහ් මිනිසුන්ට යහමඟ පෙන්වීම සඳහා "ආගම්" සහ "සුහුෆ්" පිරිනැමුවේ ය. ඒවා විශ්වාස කිරීම සැම මුස්ලිම්වරයකුගේ ම වගකීමක් වන්නේ ය. ඔහු පිරිනැමූ අවසන් ආගම "අල් කුර්ආනය" වේ. එය මෙලොව විනාශ වී යන තෙක් ස්ථීර ලෙස පවතින්නකි. එය ගැඹුරු දැනුමක් සහිත ආශ්චර්යයකි. එහි මහිමය අල් කුර්ආනය ද සුන්නාව ද ඉතා අධිකව පැහැදිලි කර ඇත්තේ ය.

සැබැවින් ම මෙම අල් කුර්ආනය ඉතා නිවැරදි දෑ වෙත මග පෙන්වන්නේ ය. (17:9)

"මිනිසුනි, නුඹලාගේ පරමාධිපතිගෙන් වූ උපදේශයක් හා සිත් තුළ ඇති දෑට නිවාරණයක් ද විශ්වාසිකයින්ට මඟ පෙන්වීමක් හා දයාවක් ද (වන අල් කුර්ආනය) නුඹලා වෙත පැමිණ ඇත." (10:57)

අල් කුර්ආනයේ මහිමය පිළිබඳව නබි සල්ලල්ලාහු අලෛහි වසල්ලම්තුමා පවසා ඇත්තේ ය.

"නියත වශයෙන් ම මෙම අල් කුර්ආනය අල්ලාහ්ගේ බලවත් කඹයක් ලෙස ද යහමඟ පෙන්වන ආලෝකයක් ලෙස ද ප්‍රයෝජන ගෙන දෙන ඖෂධයක් ලෙස ද වර්ණනා කර ඇත්තේ ය. එය ස්ථීර ලෙස අල්ලා ගන්නා තැනැත්තන්ට එය ආරක්ෂාව ද ලබා දේ. එය අනුගමනය කරන්නන්ට ජය ද ලබා දේ. නැමී ඇල වී ගිය දේ කෙළින් පිහිටුවයි. වැරදි දේ නිවැරදි කරයි. එහි ආශ්චර්යයන් නිමා නොවේ. නැවත නැවත පාරායනා කරන හේතුවෙන් එය ඉපැරණි වන්නේ ද නැත. එනිසා එය ඔබ පාරායනා කරමින් සිටින්න. එහි සෑම අක්ෂරයකට ම ඔබට කුසල් දහයක් හිමි වේ." (හාකිම්).

මෙතරම් මහිමයෙන් යුත් අල් කුර්ආනය ශබ්දය මගින් ද අක්ෂර මගින් ද ආරක්ෂා කරමින් පැමිණ ඇත. මිනිස් සිත් හා මුස්හෆ්වල ද (පුස්තකවල) සටහන් කරමින් කිසිදු වෙනස් වීමකින් තොරව පැවතීම ද එහි විශේෂ මහිමයන් ය.

නබි සල්ලල්ලාහු අලෛහි වසල්ලම්තුමාණන් ජීවත්ව සිටි කාලයේ අල් කුර්ආනය පහළ වෙමින් තිබූ නිසා එය මුළුමනින් ම ග්‍රන්ථාරූඪ කරනු නොලැබිණි. කලීෆා අබූබක්ර් රලියල්ලාහු අන්හුතුමාගේ පාලන කාලයේ අල් කුර්ආනය කට පාඩම් කළ හාෆිල්වරු සටන්වල දී වීර මරණයට පත් වූවෝ ය. එය දුටු උමර් රලියල්ලාහු අන්හුතුමා එය එක්රැස් කර ග්‍රන්ථාරූඪ කිරීමේ අවශ්‍යතාව කලිෆාතුමාට යෝජනා කළේ ය. එය පිළිගත් අබූබක්ර් රලියල්ලාහු අන්හුතුමා අල් කුර්ආනය ග්‍රන්ථාරූඪ කිරීමේ කර්තව්‍යය සයිද් ඉබ්නු සාබිත් රලියල්ලාහු අන්හුතුමාගේ නායකත්වය යටතේ සිදු කිරීමට නියම කළේ ය. එතුමා එම සේවය අතිසාර්ථක ලෙස නිමා කළේ ය.

කලීෆා උස්මාන් රලියල්ලාහු අන්හුතුමාගේ කාලයේ නොයෙකුත් රටවල් සහ ගෝත්‍රිකයෝ ඉස්ලාම් දහම වැලඳ ගත්තෝ ය. අල් කුර්ආනය පාරායනය කිරීමේ දී ඔවුන් තුළ යම් යම් වෙනස්කම් දක්නට ලැබිණි. සෑම කණ්ඩායමක් ම තමන් පාරායනා කරන ආකාරය නිවැරදි යැයි තර්ක කිරීමට පෙලඹුණෝ ය. මේ හේතුවෙන් මුස්ලිම්වරුන් අතර මතභේද ඇති වීමට පටන් ගැනිණි. මෙය දුටු හුදෙයිෆා ඉබ්නු යමානි රලියල්ලාහු අන්හුතුමා කලීෆා උස්මාන් රලියල්ලාහු අන්හුතුමා වෙත මෙමගින් මුස්ලිම් උම්මත් භේද විය හැකි බවට අනතුරු ඇඟවූයේ ය.

කලීෆා උස්මාන් රලියල්ලාහු අන්හුතුමා මෙහි බැරෑරුම්කම වටහා ගත්තේ ය. එතුමා සෙයිද් ඉබ්නු සාබිත් රලියල්ලාහු අන්හුතුමාගේ නායකත්වයෙන් යුත් කණ්ඩායමක් පත් කර අබූබක්ර් රලියල්ලාහු අන්හුතුමාගේ කාලයේ ග්‍රන්ථාරූඪ කළ පළමු පිටපත බලා පිටපත් ගණනාවක් ලියන මෙන් නියෝග කළේ ය. ඒවා බොහෝ රටවලට යැව්වා පමණක් නොව එය පාරායනය කරන ආකාරය කියා දීම සඳහා කාරිවරුන් ද පිටත් කර යැව්වේ ය. ඔවුහු තමන් ගමන් කළ ප්‍රදේශවල ජනතාව එක ම ආකාරයෙන් අල් කුර්ආනය පාරායනය කිරීමට කියා දුන්නෝ ය. මෙමගින් ඔවුහු මුස්ලිම්වරුන් අතර අල් කුර්ආනය පාරායනය කිරීමේ ඒකාකාර භාවයක් ඇති කළෝ ය.

මෙනිසා කලීෆා උස්මාන් රලියල්ලාහු අන්හුතුමා ජාමිඋල් කුර්ආන් යැයි අමතනු ලැබුවේ ය.