ඉස්ලාමයේ මූලික යුතුකම්වලින් සතර වැන්න උපවාසයයි. මෙය "අස් සව්ම්" යැයි අමතනු ලබන්නේ ය. මෙම යුතුකම ඉස්ලාමීය දින දර්ශනයේ 9 වන මාසය වන රමළාන් මාසයේ ඉටු කෙරේ.

"රමළාන් මාසය කෙබඳු මාසයක් ද කිවහොත් මිනිසාට ඍජු මාර්ගය පැහැදිලි ලෙස පෙන්නුම් කරන, හොඳ නරක වෙන්කර දැන ගැනීම සඳහා වූ අල් කුර්ආනය පහළ වූ මාසයයි. එබැවින් ඔබ අතරින් කවරෙකු එම මාසය හිමිකර ගන්නේ ද ඔහු එහි උපවාසයේ යෙදෙත්වා" අල් කුර්ආන් (2:185)

රමළාන් මාසය උපවාසයේ යෙදෙන මාසය වශයෙන් ද අල් කුර්ආනය පහළ වූ මාසය වශයෙන් ද විශේෂත්වයක් ගනියි.

මෙම මාසය පිළිබඳව නබි සල්ලල්ලාහු අලෙයිහි වසල්ලම්තුමාණෝ පහත පරිදි පවසා ඇත්තෝ ය. රමළාන් මාසයේ මාගේ උම්මත්වරුන්ට විශේෂ ලක්ෂණ පහක් පිරිනමනු ලබන්නේ ය. ඒවා අපට පෙර සිටි කිසිදු නබිවරයකුට පිරිනැමුවේ නැත.

1 රමළාන් මස පළමු රාත්‍රියේ අල්ලාහ් උපවාසයෙහි යෙදෙන්නන් දෙස (රහ්මත් හි බැල්මෙන්) බලන්නේ ය. මෙලෙස අල්ලාහ් කවරකු දෙස බලන්නේ ද ඔහු අල්ලාහ්ගේ වේදනාවට ලක් නොවන්නේ ය.

2 උපවාසයෙහි නිරත වන්නන්ගේ මුඛයෙන් පිටවන දුගඳ අල්ලාහ් වෙත කස්තුරිවලටත් වඩා සුවඳවත් දෙයක් ලෙස පවතින්නේ ය.

3 රමළානයේ සෑම රාත්‍රියක ම හා දිවා කාලයෙහි උපවාසයෙහි නිරත වන්නන් වෙනුවෙන් මලාඉකාවරු පව් සමාව අයදමින් සිටින්නෝ ය.

4 අල්ලාහ් ස්වර්ගය දෙස බලා පහත පරිදි අණ කරයි. "අපගේ ගැත්තන් පිළිගැනීම සඳහා නුඹ සරසා ගැනීමට සූදානම් වන්න. ඔවුන් මෙලොව අපහසුතාවන්ගෙන් මිදී මාගේ දයාදයෙහි සුවය ලබන කාලය ළං වී ඇත්තේ ය."

5 රමළානයේ අවසන් රාත්‍රිය පැමිණි විට අල්ලාහ් ඔවුන් සියලූ දෙනාගේ පව් කමා කරන්නේ ය. එවිට එහි සිටි අයගෙන් කෙනෙක්, එය ලයිලතුල් කද්ර් රාත්‍රිය දැයි නබි සල්ලල්ලාහු අලෙයිහි වසල්ලම්තුමාගෙන් විමසුවේ ය. එයට නබි සල්ලල්ලාහු අෙලෙහි වසල්ලම්තුමා 'නැත, කම්කරුවෝ වැඩ කරති. ඔවුන්ගේ වැඩ අවසන් වූ පසු ඔවුන්ගේ කුලිය ඔවුන්ට ගෙවිය යුතු නොවේ ද?' යැයි පිළිතුරු දුන්නෝ ය (බයිහකී).

• තවද සව්මයෙන් මිදෙන අවස්ථාවේ සව්ම්ධාරීන් කරනු ලබන ප්‍රාර්ථනා අල්ලාහ් පිළිගනී.

උපවාසය රැකීමෙන් අපට බොහෝ යහපත් දේවල් හිමි වන්නේ ය.

• අපගේ පව් කමා කරනු ලබන්නේ ය.
• අප සිත්වල "තක්වා හෙවත් දේව භක්තිය" වර්ධනය වන්නේ ය.
• සිරුරට නීරෝගී සුවය ලැබෙන්නේ ය.
  
• ඉවසීම හා ඉන්ද්‍රිය පාලනය සඳහා මනා පුහුණුවක් ලැබෙන්නේ ය.
• මාස දහසක් සිටගෙන සලාතය ඉටු කිරීමට සමාන වූ රාත්‍රිය හිමි කර ගන්නා භාග්‍යය ලැබෙන්නේ ය.
  
• "රයියාන්" නම් දොරටුවෙන් ස්වර්ගයට යාමේ භාග්‍යය හිමි වන්නේ ය.

එබැවින් රමළාන් මාසයේ විශේෂත්වය හඳුනා ගෙන එහි ප්‍රයෝජන මුළුමනින් ම ලබා ස්වර්ගයට යාමට අල්ලාහ් අපට කරුණාව ලබා දෙත්වා !