අපි වෙළඳසැල්වල විවිධ ඇසුරුම්වල ඇති භාණ්ඩ මිල දී ගන්නෙමු. ඇසුරුම්වල සටහන් කර ඇති කල් ඉකුත් වන දිනය තෙක් පමණක් එම භාණ්ඩ පාවිව්චි කළ හැකි බව ද ඉන් පසු එම භාණ්ඩ කල් ඉකුත් වී යන බව ද අපි දනිමු. භාණ්ඩ වල කල් ඉකුත් වීමේ දිනය සඳහන් කළ හැක්කේ කෙසේදැයි අපි සිතා බැලූවෙමු ද?

භාණ්ඩ නිෂ්පාදකයෝ තමන් නිෂ්පාදනය කරන භාණ්ඩ පිළිබඳව හොඳින් ම දනිති. එම භාණ්ඩය කල් ඉකුත් වන්නේ කවදා ද යන්න දැන එය ඊට පෙර ම සටහන් කිරීමට හැකි වූයේ එනිසා ය.

මෙලෙස ම මැවුම්කරුවාණන් වන අල්ලාහ් තමා මැවූ පණ ඇති හා පණ නැති යනාදි සියල්ල පිළිබඳව හොඳින් දැන සිටින්නේ ය. එනිසා ඔහු ඒ හා සම්බන්ධ සියලූ කරුණු කාරණා කල් වේලා ඇතිව ලියා තබා ඇත්තේ ය. සියල්ල සිදු වන්නේ ඔහු ලියා තැබූ පරිදි ය. මෙලෙස ලියා තැබීම අල්ලාහ්ට ඉතා පහසු කටයුත්තකි.

විශ්වයේ ඇති මැවීම් වන හිරු, සඳු, අප ජීවත් වන පෘථීවිය සහ තාරකා යනාදියෙහි සෙලවීම්, ඒවායේ අවසානය යනාදිය අල්ලාහ් කල් වේලා ඇතිව ම ලියා ඇත්තේ ය.

කුඩා ගස්වල විශාල ගෙඩි ද විශාල ගස්වල කුඩා ගෙඩි ද අල්ලාහ් සිදු කර ඇත්තේ යම්කිසි සැලැස්මකට අනුව ය.

අව්ව, වැස්ස, සුළඟ, ඉඩෝරය, ස්වාභාවික ආපදා යනාදිය කවදා කොතැනක දී සිදුවේ ද යන්න පිළිබඳ අල්ලාහ් කල්තියා ම සඳහන් කර ඇත්තේ ය.

ජීවීන්ගේ උපත, මරණය, වර්ධනය, ඔවුන්ගේ ආහාරය යනාදිය කවදා කොතැන කොපමණ ද, යන්න ද අල්ලාහ් කල්තියාම සඳහන් කර ඇත්තේ ය. මිනිසුන්ට ඇති වන ලාභ අලාභ, දුක සැප හා ඔහුගේ ක්‍රියාකාරකම් සියල්ල ද අල්ලාහ් කල්තියාම සඳහන් කර ඇත්තේ ය.

අල්ලාහ් කල්තියා ම සඳහන් කර ඇති සියල්ල එලෙස ම සිදු වේ ය යන්න පිළිගැනීම 'කළා කද්ර් පිළිබඳ විශ්වාසය' යැයි හැඳින්වේ. මෙය ඊමානයේ හය වන කරුණ ය. කළා කද්ර් විශ්වාස නොකරන්නා මුඃමින් කෙනෙකු වන්නේ නැත.

දුක සැප රෝගී - නීරෝගී යන සියල්ල ද අල්ලාහ්ගේ සැලැස්ම අනුව ම සිදුවේ.

අල්ලාහ් 'කළා කද්ර්' සඟවා තබා ඇත්තේ ඇයි දැයි පහත දැක්වෙන උදාහරණය ඇසුරෙන් සිතා බලන්න.

ඔබ විභාගයක් ලිවීමට යන්නේ යැයි සිතමු. එම විභාගයෙන් ඔබ සමත් වීමට යන්නේ යැයි අල්ලාහ් ලියා ඇති බව ඔබ දැන ගන්නෙහි යැයි, සිතමු. එසේනම් ඔබ වෙහෙස මහන්සි වී පාඩම් කළ යුත්තේ ඇයි?

එසේ නැතහොත්:

ඔබ විභාගයෙන් අසමත් වන්නෙහි යැයි අල්ලාහ් කලින් ම ලියා ඇත්තේ ය, යන්න ඔබ දැන ගන්නෙහි යයි සිතා ගනිමු. එවිට ඔබ වෙහෙස මහන්සි වී පාඩම් කිරීමෙන් ඇති ඵලය කුමක් ද?

මිනිසුන් 'කළා කද්ර්' ගැන දැන ගන්නේ නම් ජය ලබන්නා ද උත්සාහ නොකරයි. පරාජය ලබන්නා ද උත්සාහ නොකරයි. කල්තියාම සිදුවන දේ පිළිබඳ දැන ගත් විට පිරිසක් සතුටු වන අතර තවත් පිරිසක් දුක් වනු ඇත. මෙමගින් මෙලොව මිනිසුන්ගේ සියලූ ක්‍රියා අඩපණ වනු ඇත. අල්ලාහ් 'කළා කද්රය' මිනිසුන්ගෙන් සඟවා ඇත්තේ මිනිසුන් ඉපැයීමට ද කළ යුතු ක්‍රියාකාරකම් වලට අලස නොවීමට ද නිරන්තරව උත්සාහවන්තව කටයුතු කළ යුතුය යන්න ද පෙන්වීමටය.

අපට 'කළා කද්ර්' සඟවා තිබීම මගින් අල්ලාහ් ප්‍රධාන කරුණු 4 ක් හඟවන්නේ ය.

1. අපි නොකඩවා උත්සාහ කළ යුතු වෙමු.
2. අපි කළා කද්ර් පිළිගත යුතු වෙමු.
3. අල්ලාහ්ට ස්තුතිවන්ත විය යුතු වෙමු.
4. ඉවසීමෙන් සිටිය යුතු වෙමු.

අප 'කළා කද්ර්' පිළිගන්නා විට.

•  සතුටුදායක අවස්ථාවල දී අල්ලාහ්ට ස්තුති කරන්නෙමු.
• කනගාටුදායක අවස්ථාවල දී අපි ඉවසීමෙන් දරා ගනිමු.
• එමගින් අපි අල්ලාහ්ගෙන් උසස් තත්ත්වයක් ලබා ගනිමු.