රහ්මත්පුර ස්වාභාවිකව ම සුන්දර ගම්මානයකි. එහෙත් එම ගම්මානයේ වාසය කරන්නන්ට ඒ පිළිබඳව හැඟීමක් නොතිබිණි. ඔවුන්ගේ ගතිපැවතුම් නිසා එම ගම්මානයේ සුන්දරත්වයට හානි සිදු විය. ඔවුහු වාතය හා ජලය අපවිත්‍ර කළෝ යග ගම්වැසියෝ දුගඳ වූ වාතය ආශ්වාස කළෝ ය. ගඟේ වතුර අපවිත්‍ර වූ නිසා ඔවුන්ට එම ජලය උපයෝගී කර ගැනීමට නොහැකි වී තිබිණි. එම ගම්මානයේ සිටි කුඩා දරුවාගේ පටන් වැඩිහිටියන් දක්වා සියලූ දෙනා වරින් වර ඩෙංගු, මැලේරියා යනාදි සෞඛ්‍යමය රෝග ගැටලූ රාශියකට මුහුණ දෙමින් සිටියෝ ය.

මස්ජිදයේ සේවය කිරීම සඳහා අලූතින් ඉමාම්වරයෙක් පැමිණියේ ය. ඉමාම්තුමා එම ගම්මානයේ දුක්ඛිත තත්ත්වය දැක කනගාටු වූයේ ය.

මක්නිසා ද යත්; ජනයා එම ගම්මානයේ ප්‍රධාන මංසන්ධියේ අපද්‍රව්‍ය ඉවතලමින් සිටියෝ ය. සමහරු අපද්‍රව්‍ය පොලිතීන් මලූවල බහා වීදියේ දෙපස වීසිකර යන්නෝ ය. බල්ලන් සහ කපුටන් ඒවා ඇද දැමීම නිසා එම වීථීවල දෙපස අපවිත්‍ර වී තිබිණ. මේ නිසා වීථීයේ ගමන් කරන්නෝ හා පදිකයෝ අති මහත් දුෂ්කරතාවකට පත් වූවෝ ය. මෙම කුණු කසළ නිසා මුළු ගම්මානය පුරා ම දුගඳ හමමින් තිබිණි.

තව ද එම ගම්වැසියෝ නිවසේ අපවිත්‍ර ජලය කිසිදු පැකිළීමකින් තොරව ගඟට ම මුදා හැරියෝ ය. මේ හේතුවෙන් ගඟේ ජලය අපවිත්‍ර විය. සැම තැන පොලිතීන් මලූ හා කැඩුණු බිඳුණු ප්ලාස්ටික් භාණ්ඩ ද ටින් ද පොල් කටු ද වීසි කර තිබුණි. ගම්වැසියෝ දිවා කාලයේ මැසි උවදුරින් ද රාත්‍රියේ දී මදුරු උවදුරින් ද පීඩාවට පත්වූවෝ ය.

මේ සියල්ල කෙරෙහි අවධානය යොමු කළ මස්ජිදයේ නවක ඉමාම්තුමා මෙම ගම්මානයේ ම නැවතී සේවය කරනවා ද නැතහොත් වෙනත් ගම්මානයකට යනවා දැයි කල්පනා කළේය. තමා ගම්මාන යෙන් පිටවනවාට වඩා ගම්මානය යහපත් තත්ත්වයකට ගෙන ඒම වැදගත් සේවයකැයි තීරණය කළේ ය.

සිකුරාදා දිනයේ ඉමාම්තුමා තම කුත්බා දේශනයේ දී අප ජීවත් වන වටපිටාව ශුද්ධ පවිත්‍රව තබා ගැනීමේ වැදගත්කම පිළිබඳ විශේෂ දේශනයක් කළේ ය. එහි දී ගමෙහි ජනතාව කුණු කසළ බැහැර කිරීමට කටයුතු කළ ආකාරය අල්ලාහ්ට පිළිකුල් සහගත වන බව එතුමා පැහැදිලි කළේ ය. මෙම ගම්මානයට මලක්වරුන් පැමිණිය යුතු නම් මෙම ගම්මානය පිරිසිදු කළ යුතු යැයි කීවේ ය. අල් කුර්ආන් වැකි ද හදීස් ද ගෙන හැර පෑවේ ය. කුණු කසළ හරියාකාරව බැහැර නොකළේ නම් එමගින් ඇති වන දුර්විපාක ද පැහැදිලි කළේ ය. ඒ පිළිබඳව අවවාද ද කළේ ය.

• පිරිසිදුකම ඊමානයේ අඩකි. (හදීස්)
• පාරේ ඇති හානිකර ගල් මුල් ඉවත් කිරීම ද ඊමානයට අයත් වන්නකි. (හදීස්)
• අල්ලාහ් ප්‍රිය කරන්නේ තව්බා කරන්නන් හා පිරිසිදුව සිටින්නන් ය. (අල් කුර්ආන්)

මෙම දේශනයෙන් පසු ජනතාව පිබිදුණහ. ගමෙහි සමහර තරුණයෝ හා වැදගත් උදවිය ඉමාම්තුමා හමුවූහ. එතුමා සමග සාකච්ඡා කළෝ ය. අවසානයේ දී දින දෙකක ශ්‍රමදානයක් සූදානම් කර ගම ශුද්ධ පවිත්‍ර කිරීමට තීරණය කළෝ ය. ඒ සඳහා දින ද තීරණය කළෝ ය.

ගම්වාසීහු සියලූ දෙනා එම ශ්‍රමදානයට උද්‍යෝගයෙන් සහභාගි වූවෝ ය. ගැහැනු, පිරිමි, ළමුන් ආදි වශයෙන් සියලූ දෙනා දායක වූවෝ ය. ඊට සහභාගී වන්නට නොහැකි වූවෝ තමන් වෙනුවෙන් වැඩ කිරීමට වෙනත් අය යවා තැබුවෝ ය.

ශ්‍රමදානයේ දී වැඩිහිටියෝ තැනින් තැන වළවල් කැපුවෝ ය. පසුව හන්දියේ තැනින් තැන ගොඩ ගසා තිබූ කුණු කසළ ගෙනැවිත් එහි දැමුවෝ ය. පසුව පස් දමා එම වළවල් වසා දැමුවෝ ය. ගැහැනුන්ගෙන් සමහරු එහි පල දරන අඹ කොස් හා පේර වැනි පලතුරු පැළ ද සෙවණ ලබා දෙන පැළෑටි ද සිටවූවෝ ය.

කුඩා දරුවෝ පොල් කටු ද ප්ලාස්ටික් භාණ්ඩ ද ටින් ද වෙන් වෙන් වශයෙන් තළා පොඩි කළෝ ය. ඒවායින් සමහර දේ කොටස් වශයෙන් ගිනි තැබුවෝ ය. පිරිමින්ගෙන් සමහරු ගඟට යන පාර පිරිසිදු කළෝ ය. ගඟ අයිනෙහි දමා තිබූ අපද්‍රව්‍ය කසළ ඉවත් කළෝ ය. නිවසින් බැහැර වන අපවිත්‍ර ජලය ගඟට යැවීමට කටයුතු කළ අය හඳුනාගෙන ඔවුන්ට උපදෙස් ලබා දීම ද සිදුවිය. මේ අයුරින් පළමු දිනයේ ශ්‍රමදාන කටයුතු අවසන් විය.

දෙවන දිනයේ බහුතරයක් දෙනා තම නිවස අවට පිරිසිදු කිරීමෙහි නිරත වූවෝ ය. නිවසින් පිට තිබූ කුණු කසළ ද නිවස තුළ එකතු වන අනවශ්‍ය දේ ද තම තමන්ගේ නිවස අසල ගොඩ ගසා සමහර දේට ගිනි තැබුවෝ ය. අපවිත්‍ර බැහැර කිරීම සඳහා සමහරු තම නිවෙස් මායිම තුළ වළවල් කැපුවෝ ය. තවත් සමහරු එම අපවිත්‍ර ජලය නැවත භාවිත කිරීම සඳහා කාණු කපා නිවසේ වත්තට හැරවූවෝ ය. මෙසේ දෙවන දිනයේ දී ශ්‍රමදාන කටයුතු සාර්ථක ලෙස නිමා විය.

මස්ජිදයේ ඉමාම්තුමා සෑම නිවසක ම එකතු වන කුණු කසළ බැහැර කිරීම සඳහා ක්‍රමයක් කියා දුන්නේ ය. ගම්වාසීන් විසින් ඒ අනුව සෑම නිවෙසක ම මිදුලේ බඳුන් දෙකක් තබන ලදි. එක් කූඩයක දිරාපත් වන කුණු කසළ ද අනිත් බඳුනේ දිරාපත් නොවන කුණු කසළ ද වෙන් වෙන් වශයෙන් දැමූ අතර කූඩය පිරෙන විට දිරාපත් වන කසළ කුඹුරු අයිනෙහි කපා තිබූ වළවල්වල වළලන ලදි. දිරාපත් නොවන ප්ලාස්ටික් හා පොලිතීන් ද්‍රව්‍ය ඒවා එකතු කිරීමට පැමිණෙන්නන් වෙත භාර දීම සිදු කෙරිණි.

රහ්මත් පුරය නව පෙනුමක් ගත්තේ ය. එය ජනතා ප්‍රසාදය ලත් පිරිසිදු ගම්මානයක් විය. ගම්වැසියෝ සතියකට දිනයක් වෙන් කර ගමෙහි පවිත්‍රතා කටයුතුවල නිරත වීමට පුරුදු වූහ. සිටවූ පැළ පල දරමින් තිබිණිග ගමේ ජනතාව ප්‍රීතියට පත් වූවෝ යග එමෙන්ම ඉමාම්තුමාට මුළුමනින් ම අවනත වූවෝ ය. සලාතය වෙනුවෙන් අදාන් පවසන විට ජනතාව මස්ජිදයට ගොස් ජමාඅතයත් සමග සලාතය ඉටු කිරීමෙන් සතුටට පත් වූවෝ ය.

රහ්මත් පුරය දැන් අල්ලාහ්ගේ රහ්මතය ලැබූ ගම්මානයක් බවට පත් විය.