21 - සරල බව සහ අරපිරිමැස්ම
නබිවරුන් සියලූ දෙනා ම සරල අරපිරිමැස්මෙන් යුතු ජීවිත ගත කර ආදර්ශවත් වී ඇත. නබි සල්ලල්ලාහු අලෙයිහි වසල්ලම්තුමාණෝ මිනිස් සමාජයට මඟ පෙන්වන්නකු ලෙස යවන ලදහ. එතුමා අලංකාරවත් ආදර්ශ පෙන්වා දී ඇත. එය පහත සඳහන් අල් කුර්ආන් වදනෙන් පැහැදිලි වේ. "නියත වශයෙන් ම අල්ලාහ්ගේ දූතයා සතුව අගනා ආදර්ශ ඇත. (33:21) අල්ලාහ් මාගේ බාහිර පෙනුම අලංකාර ලෙස ඇති සේ ම ගුණාංග ද අලංකාර කරනු මැනව" යැයි නබි සල්ලල්ලාහු අලෙයිහි වසල්ලම්තුමා ප්‍රාර්ථනා කර ඇත.
නබි සල්ලල්ලාහු අලෙයිහි වසල්ලම්තුමාගේ යහ ගුණාංග අතරින් සරල බව හා අරපිරිමැස්ම වැදගත් ස්ථානයක් හිමි කර ගන්නේ ය. සරල බව යනු දුප්පතෙකු ලෙස ජීවත් වීම නොව ආඩම්බර නොවී ජීවත්වීම යග අරපිරිමැස්ම යනු මසුරුකම නොව අවශ්‍යතාවට සරිලන පරිදි වියදම් කිරීම හා නිරහංකාර ව ජීවත්වීම ය.
උදාහරණයක් ලෙස නබි සුලෙයිමාන් අලෙයිහිස්ලාම් තුමා මහා කෝටිපතියකු ලෙස හා සර්ව බලධාරි පාලකයකු ලෙස සිටිය ද සරලව අරපිරිමැස්මෙන් ජිවත් වූ බව අල්ලාහ් සඳහන් කර ඇත.
එනිසා ජීවිතය තෘප්තිමත් ලෙස පවත්වා ගැනීම සඳහා සරල බව හා අරපිරිමැස්ම අත්‍යවශ්‍ය ගුණාංග දෙකක් ලෙස පවතී.
නබි සල්ලල්ලාහු අලෛහි වසල්ලම්තුමාණෝ වත්කම් තිබිය දී පවා ආඩම්බරකම වළක්වා ගත්තෝ ය. එතුමා ඉස්ලාමීය රාජ්‍යයේ නායකයා විය. එතුමා සතුව දේපොළ තිබුණු නමුත් ඒවා තම යහපත වෙනුවෙන් භාවිත නොකළේ ය. සමාජ ශුභසිද්ධිය සඳහා ම භාවිත කළේ ය. ධන සම්පත් යනු සුරක්ෂිත ලෙස භාවිත කිරීම සඳහා අල්ලාහ් විසින් දෙනු ලැබූ දායාදයකි. එය ඉපැයීම ද වියදම් කිරීම ද හලාල් ආකාරයට සිදුවිය යුතු ය. මෙයට ආදර්ශවත් අයෙකු ලෙස නබි සල්ලල්ලාහු අලෙයිහි වසල්ලම්තුමා සිටියේ ය.
එතුමාගේ සරල ජීවිතය පිළිබඳ නිදසුන් කිහිපයකට අවධානය යොමු කරමු. ආයිෂා රලියල්ලාහු අන්හාතුමිය නබි සල්ලල්ලාහු අලෙයිහි වසල්ලම්තුමාණන්ගේ ආදරණීය බිරිඳ වූවා ය. නබි සල්ලල්ලාහු අලෛහි වසල්ලම්තුමාණන්ගේ සරල ජීවිතය පිළිබඳව එතුමිය මෙසේ පැවසුවාය. "රටඉඳි හා ජලය පමණක් අපගේ ආහාරය ලෙස තිබිණි. සමහර අවස්ථාවල අසල්වැසි නිවෙස්වල සිටි මිතුරෝ ඔවුන් දොවා ගත් කිරි, තෑගි වශයෙන් අපට ලබා දෙතිග අපි ඒවා පානය කළෙමු." (බුහාරි)
නබි සල්ලල්ලාහු අලෛහි වසල්ලම්තුමා සතුව පැදුරක් තිබිණි. දහවල් කාලයේ එතුමා එය දිගහැර වාඩි වෙයි. රාත්‍රි කාලයේ එය දොරක් ලෙස භාවිතයට ගනියි.
එතුමා නිදා ගැනීමට භාවිත කරන පැදුර මත අන් කිසිවක් එළා ගන්නේ නැත. මෙනිසා නින්දෙන් අවදි වූ පසු එතුමාගේ සිරුරෙහි එම පැදුරේ සලකුණු දැකගත හැකි විය. එතුමා තම හිසට සත්ත්ව සමෙන් සාදන ලද කොට්ටයක් තබා ගනියි. දෙපා අසල සත්ත්ව සම් පදම් කිරීමට යොදා ගන්නා කොළ ගොඩක් ගසා තිබිණි. මෙය දුටු උමර් රලියල්ලාහු අන්හුතුමා කඳුළු සලා ඇත්තේ ය.
නබි සල්ලල්ලාහු අලෙයිහි වසල්ලම්තුමා මරුමුවට පත්වන අවස්ථාවේ රත්රන් හෝ රිදී හෝ වහලූන් හෝ ඉතිරි කර ගියේ නැත. ඒ වෙනුවට සුදු බූරුවකු හා භාවිත කරන ලද භාණ්ඩ, දන් දීමක් ලෙස ලැබූ කුඩා ඉඩම් කැබැල්ලක් යනාදිය පමණක් ඉතිරි කර ගියේ යග එබැවින් අපි ද,
අපි අපගේ අවශ්‍යතාව අවමකර තමන් සතුව තිඛෙන දේ ප්‍රයෝජනවත් අයුරින් වියදම් කරමු.
එය අරපිරිමැස්ම යනුවෙන් අවබෝධ කොටගෙන ආඩම්බරකම හා නාස්තිය පිටු දැක ජීවත් වීමට වග බලා ගනිමු.