ඉස්ලාමයේ මූලික යුතුකම්වලින් සලාතය දෙවන යුතුකම වේ. ඉස්ලාමය වැලඳ ගත් අය මුලින් ම ඉටු කළ යුතු යුතුකම වන්නේ මෙම සලාතය යි. "සැබවින් ම සලාතය විශ්වාස කළ අයට වේලාවක් නියම කරන ලද අනිවාර්ය වූවක් වන්නේ ය" (4:103) යනුවෙන් අල් කුරානයේ සඳහන් වේ.

සලාතය පෙර සිටි නබිවරුන් කෙරෙහි ද ඔවුන්ගේ ජනතාව කෙරෙහි ද යුතුකමක් විය. එම නබිවරු සලාතය ඉටු කරමින් පැමිණියා පමණක් නොව තම සමූහයාට ද සලාතය ඉටු කරන ලෙස අණ කළෝ ය. නබි ඉබ්රාහීම් අලෙයිහිස් සලාම්තුමා, නබි ෂුඅයිබ් අලෙයිහිස් සලාම්තුමා, නබි මූසා අලෙයිහිස් සලාම්තුමා, නබි හාරූන් අලෙයිහිස් සලාම්තුමා, නබි සකරියියා අලෙයිහිස් සලාම්තුමා, නබි ඊසා අලෙයිහිස් සලාම්තුමා, යනාදි අය තම සමූහයාට සලාතය ඉටු කරන ලෙස අණ කළ බව අල් කුර්ආනයේ සඳහන් වේ. නබිවරුන් සියලූ දෙනා තම සමූහයාට සලාතය පිළිබඳව දේශනා කිරීම මගින් එහි වැදගත්කම මනා ලෙස නිරූපණය වේ.

තව ද සලාතය මිනිසුන්ගේ මෙලොව හා පරලොව ජීවිතයේ දියුණුවට මග සලසා දෙයි. අල් කුර්ආනය, ජය ලබා ගත් මුඃමින්වරයකුගේ ලක්ෂණ සඳහන් කරන විට මුලින් ම සඳහන් කරන්නේ සලාතය පිළිබඳව ය.

"සැබවින්ම විශ්වාසිකයෝ ජයග්‍රහණය ලැබුවෝ ය. ඔවුහු කවරහු ද යත් තම සලාතයෙහි අල්ලහාට බියෙන් නැඹුරු වන්නෝ වෙති" (23:1-21)

"සලාතය ස්වර්ගයේ යතුර වේ. කවරෙක් උදේ සවස (සලාත් කිරීම සඳහා) මස්ජිදයට ගොස් පැමිණේ ද ඒ සෑම විටම අල්ලාහ් ඔහුට ස්වර්ග යේ උසස් ස්ථානයක් පිළියෙල කරයි" (බුහාරි). යැයි නබි සල්ලල්ලාහු අලෙයිහි වසල්ලම්තුමාණෝ පැවසූහ.

මුස්ලිම්වරයෙක් සලාතය ඉටු කිරීම මගින් බොහෝ ප්‍රයෝජන ලබා ග න්නේ ය. ඔහුගේ සුළු පාප කමා කෙරේ. සලාතය ඉටු කිරීමට යෑම වෙනුවෙන් තබන සැම පියවරක් සඳහා ම ඔහුගේ පාපයක් බැගින් මැකී යන්නේ ය. ඔහු වුලූඃ කරන විට සෑම අවයවයකින් ම, ඒවා මගින් සිදුවූ පාප කමා කෙරෙන්නේ ය.

"පස්වේල් සලාතය ඉටු කිරීම යනු ඔබගේ නිවස ඉදිරියේ ගලන ගංගාවක ඔබ සැම දා පස් වතාවක් නෑම වැනිය" (මුස්ලිම්) යැයි නබි සල්ලල්ලාහු අලෙයිහි වසල්ලම්තුමාණෝ පැවසූහ.

තව ද සලාතය මිනිසා විනයගරුක පුද්ගලයකු කරවන්නේ යග පාප කර්ම සහ අයහපත් ක්‍රියාවන්ගෙන් වළකාලන්නේ ය. "අල්ලාහ් තමන් වෙත නිරතුරුව ම අවධානය යොමු කරමින් සිටින්නේ ය" යන අල්ලාහ් කෙරෙහි වූ භක්තිවන්ත හැඟීම පාපයන්ගෙන් වැළකී ජීවත් වීමට මග සලසන්නේ ය.

"සැබැවින් ම සලාතය නින්දා සහගත හා පිළිකුල් සහගත දැයින් වළකාලන්නේය" (29:45)

මීට අමතරව සලාත් ඉටු කරන්නාට නිතර මලක්වරුන්ගේ දුආ ලැබෙන්නේ ය. සලාත් කරන්නා සිත් සැනසුම ලබා ගන්නේ ය. නීරෝගීභාවය, කලට වේලාවට වැඩ කරන පුරුද්ද ද ඇති වන්නේ ය.

මෙසේ සලාතයේ මහිමය ද මහත් වූ ප්‍රයෝජන ගැන ද ඉගෙන ගත් අපි මෙලොව හා පරලොවෙහි ජයග්‍රහණය ලබා ගැනීම සඳහා සලාතය සුරකිමින් පිළිපදිමු.