සූරතුන් නස්ර් මුස්ලිම් වන අප සැම හොඳින් දන්නා හා කටපාඩම් ඇති කුඩා සූරාවකි. සූරතුන් නස්ර් පරිච්ඡේදය මදනි සූරාවකි. එය ආයත තුනකින් සමන්විත ය. එම සූරාවේ පළමු වැකියේ සඳහන් වන "නස්ර්" යන වචනය මගින් මෙම සූරාව නම් කෙරී ඇත. මෙහි තේරුම 'උපකාරය' වේ. මෙය සම්පූර්ණ වශයෙන් පහළ කරනු ලැබූ සූරාවන්ගෙන් අවසන් සූරාව වන්නේ ය. මෙම සූරාවට පසුව කිසිදු සූරාවක් සම්පූර්ණ වශයෙන් පහළ නොවී ය. දැන් අපි මෙම සූරාව හා එහි අර්ථය දෙස අවධානය යොමු කරමු.

සැමට කරුණාභරිත පරම කරුණාභරිත අල්ලාහ්ගේ නාමයෙන් ආරම්භ කරමි.

1 (නබිවරය) අල්ලාහ්ගේ උපකාරය හා ජයග්‍රහණය පැමිණි කල්හි
2 තව ද අල්ලාහ්ගේ දහම තුළට මිනිසුන් කණ්ඩායම් වශයෙන් පිවිසෙනු නුඹ දකිනු ඇත.
3 එවිට නුඹගේ පරමාධිපතිව ප්‍රශංසා කිරීමෙන් පිවිතුරු කරවු. තව ද ඔහුගෙන් සමාව අයැදිවු. සැබැවින් ම ඔහු පාපොච්චාරණය නිරතුරුව පිළිගන්නා වේ.

මෙම සූරාව හිජ්රි දස වන වසරේ දුල් හජ් මාසයේ අයියාමුත් තෂ්රීක් දිනයන්හි එක් දිනයක මිනාවේ දී පහළ විය. මෙය පහළ වූ අවස්ථාවේ දී 'මට මාගේ මරණය පිළිබඳ දන්වන ලදි. මාගේ ආයු කාලය අවසන් විය' (මුස්නද් අහ්මද්) යැයි නබි සල්ලල්ලාහු අලෛහි වසල්ලම්තුමාණෝ පැවසූහ.

මෙම සූරාව පහළ වීමෙන් පසුව මුහම්මද් සල්ලල්ලාහු අලෛහි වසල්ලම්තුමාණෝ මාස තුනක් පමණක් ජීවත් වූවෝ ය. මෙනිසා මෙම සූරාව සූරතුත් තව්දීඃ (සමුගැනීමේ පරිච්ඡේදය) යැයි ද හැඳින්වේ.

අල්ලාහ්ගේ උදවු උපකාරය සහ ජය ලැබේ ය යන්න ද ජනයා කණ්ඩායම් වශයෙන් ඉස්ලාමයට ඇතුළු වෙති යන සුභාරංචිය ද මෙම සූරාව දන්වයිග. අල්ලාහ්ගේ උපකාරය සහ ඔහු පිරිනැමූ ජයග්‍රහණය යනු ඔහු වෙතින් පැමිණි දායාද වේ. මෙය අල්ලාහ්ගේ උපකාරය මහින් හිමි වූවක් බව මෙම සූරාවේ සඳහන් 'නස්රුල්ලාහ්' (අල්ලාහ්ගේ උපකාරය) යන වචනය පිළිබිඹු කරයි.

මිනිසාට ජය සහ උදවු ලැබෙන විට ඔහු තම ස්වාමියා අමතක නොකළ යුතු යග උඩඟු වීම හෝ මමත්වය ඇති නො විය යුතු ය. එසේ නොවී මේවා ලබා දුන් අල්ලාහ්ට ප්‍රශංසා කළ යුතු ය. ඔහු පිවිතුරු කළ යුතු ය. ඔහු වෙතින් ම පාපොච්චාරණය කළ යුතු ය යන්න ද මෙම සූරාව කියා දෙයි.

මෙම සූරාව පහළ වූවායින් පසුව නබි සල්ලල්ලාහු අලෛහි වසල්ලම් තුමාණෝ 'සුබ්හානල්ලාහි වබිහම්දිහී අස්තඃග්ෆිරුල්ලාහ් වඅතූබු ඉලෙයිහි' යන ප්‍රාර්ථනාව වැඩි වශයෙන් පාරායනය කරන්නකු ලෙස සිටියහ (මුස්නද් අහ්මද්). මෙහි අර්ථය අල්ලාහ්ට ප්‍රශංසා කර ඔහු පිවිතුරු කරමි. අල්ලාහ් වෙත පාපොච්චාරණය කරමි යන්න ය.

එනිසා අපි,

• ජයග්‍රහණය කරන විට අල්ලාහ්ට ප්‍රශංසා කරමු - අල්හම්දු ලිල්ලාහ්
• ඔහු ලබා දුන් දායාදයන්ට ස්තෝත්‍ර කරමු - සුබ්හානල්ලහ්
• ඔහුගෙන් වැඩි වැඩියෙන් පවු කමා කරගනිමු - අස්තඃෆිරුල්ලහ්