අල්ලාහ් අපට දායාද කළ දහම වන අල් කුර්ආනයේ මහිමය අපි ඉගෙන ගන්නෙමු. එහි දේශන කීපයක් හැදෑරීම සඳහා අපි සූරතුල් අස්ර් නම් පරිච්ඡේදය දෙස අවධානය යොමු කරමු.

මෙම සූරතුල් අස්ර් නම් පරිච්ඡේදය මක්කාවේ පහළ විය. එය ආයත් තුනකින් සමන්විත සූරාවකි. මෙහි පළමු වැකියේ සඳහන් වන "අල් අස්ර්" නම් වචනය මෙම සූරාවේ නාමය ලෙස පවතියි. පොදුවේ මෙම "අල් අස්ර්" නම් වචනය 'කාලය' යන අරුත දෙන්නේ ය. අපි මෙම සූරාව හා එහි අරුත ඉගෙන ගනිමු.

සැමට කරුණාභරිත පරම කරුණාභරිත අල්ලාහ්ගේ නාමයෙන් ආරම්භ කරමි.

1. කාලය මත දිවුරමින්
2. සැබැවින් ම මිනිසා අලාභයෙහි ය.
3. (නමුත්) විශ්වාස කළා වූ ද යහකම් කළා වූ ද එකිනෙකාට සත්‍යය පිළිබඳව උපදෙස් දුන්නා වූ ද ඉවසීම පිළිබඳව උපදෙස් දුන්නා වූ ද අය හැර.

මෙම සූරාව මිනිස් ජීවිතයේ ජයග්‍රහණයේ මාවත කුමක් දැයි ඉතා කෙටියෙන් කියා දෙන්නේ යග මේ හේතුවෙන් ඉමාම් ෂාෆිඊ රහ්මතුල්ලාහි අලෙයිහිතුමා, 'මිනිසුන් මෙම සූරාව පිළිබඳ සිතා බැලූවහොත් ඔවුන්ට යහ මඟ කියා දෙන්න එය ම ප්‍රමාණවත් වේ යැයි පවසා ඇත්තේ ය. මෙය මෙම සූරාවේ වැදගත්කම ඉතා මැනවින් පෙන්වා දෙයි.

අද මිනිසා තත්පරය පවා ප්‍රවේශමෙන් භාවිත කර නොයෙක් වාර්තා තබා ඇති බව අපට දැක ගත හැකි ය.

කාලයේ වැදගත්කම වටහා ගෙන එය හරියාකාරව උපයෝගී කර ගන්නට මිනිසා අසමත් වුවහොත් ඔහුට විශාල අලාභයකට මුහුණ දීමට සිදුවේ. මිනිසා අල්ලාහ් පෙන්වා දුන් ආකාරයට කාලය උපයෝගී කරගත හොත් ඔහුගේ කෙටි ආයු කාලය මගින් මෙලොව හා පරලොව ජයග්‍රහණය ලබා ගත හැකි ය. එනිසා අප යහකර්ම කිරීම සඳහා අපගේ කාලය උපයෝගී කර ගත යුතු ය. එය නාස්ති වී යාමට ඉඩ නොදිය යුතු ය.

මිනිසා කෙබඳු ගුණාංග ආරක්ෂා කර ගත යුතු ද යන්න තුන් වන වාක්‍යයේ සඳහන් වන්නේ ය. ඒවා අතරින් මුලින් ම (ඊමාන්) සහ යහකර්ම තිබිය යුතු ය. අල්ලාහ් කෙරෙහි තිබෙන විශ්වාසය හෙවත් ඊමාන් මිනිසාගේ බාහිර හා අභ්‍යන්තර ජීවිතය හැඩ ගස්වන්නේ ය. (ඊමානය හා යහකර්ම එකක් අනෙකෙන් බෙදා වෙන් නොවී එකට බැඳී තිබිය යුතු ය) යහකර්ම යනු ඊමාන් නම් ගසෙහි ඵලදාව වන්නේ ය.

ගසක් අප හඳුනා ගන්නේ එය ලබා දෙන ඵලයෙනි. එලෙස ම ඊමානයේ පාරිශුද්ධත්වය හඳුනා ගන්නේ යහක්‍රියා මගිනි. ජය ලබාගැනීමේ තවත් ගුණාංගයක් වන්නේ සත්‍යය හා ඉවසීම මගින් කෙනකු තවත් කෙනකුට උපදෙස් දීම ය. ඊමානයේ හා යහකර්මවල සුවය විඳින මුස්ලිම්වරයකු තම සුවය අන් අයට ද බෙදා දෙන්නකු විය යුතු ය. ඔහු තම වටපිටාවේ සිටින්නන්ට ඊමානය පිළිබඳව හා යහක්‍රියා කිරීම පිළිබඳව පවසන්නකු ලෙස ද නරක වළක්වන්නකු ලෙස ද සිටිය යුතු ය.

එනිසා අපි අපගේ,

• ආයු කාලය ජයග්‍රහණයේ මාවතක් ලෙස පත් කර ගනිමු.
• අල්ලාහ් කෙරෙහි විශ්වාසය තබා යහකර්මවල නිරත වෙමු.
• ඊමානය හා යහකර්ම පිළිබඳව අන් අයට ද කියා දෙමු.