සවස් කාලයේ ඈන් සහ ඉසුරු මිදුලේ සෙල්ලම් කරමින් සිටි තැනට මව සිනහ මුසු මුහුණින් පැමිණියා ය.

 මව :    සෙල්ලම් කළා ඇති පුතේ. දෙන්නා ම ගිහින් මුහුණ කට සෝදලා පල්ලියට යන්න ලෑස්ති වෙන්න.

ඉසුරු : ඇයි අම්මේ, මේ වේලාවට පල්ලියට  යන්නේ? හෙට නේ දිව්‍ය සත්ප්‍රසාධ මංගල්‍යය තියෙන්නේ. හෙට ම පල්ලියට යමුකො.

මව :    ඒ වුණාට පුතේ, අපි හොඳ සූදානමකින් මංගල්‍යයට සහභාගි වෙන්න ඕනෑ.

ඈන් :   අපි ඒ සඳහා මොනවා ද කරන්න ඕනේ අම්මේ?

මව :    අපි සමගි සන්ධානයේ දේව ප්‍රසාද නිධානය තුළින් හොඳ පාපොච්චාරණයක් කර ගන්න ඕනෑ. එවිට අපට දිව්‍ය සත්ප්‍රසාධ වහනසේ ලබා ගන්නට සුදුස්සන් වෙන්න පුළුවනි. අද පල්ලියේ පාපොච්චාරණය දෙනවා කියලා පියතුමා කිවුවා.

ඉසුරු : අම්මේ, අපි පව් කරලා නැහැනේ. පාපෝච්චාරණය කරන්න ම ඕනේ ද? පුජාව පටන් ගන්න වෙලාවෙත් පව්වලට මනස්ථාප වී සමාව ලබා ගැනීමට යාච්ඤාවක් කියනවනේ.

මව :    අපි පව් කරලා නැති වුණත් අපේ අතින් නොදැනුම්වත්ව සුළු සුළු පව් සිදුවෙන්න පුළුවන්. පාපෝච්චාරණය කළොත් අපට එම පව්වලට සමාව ලබා ගන්න පුළුවනි. පව්වලින් වැළකී සිටින්නටත් ශක්තිය ලැබෙනවා.

ඈන් :   අපි යමු අම්මේ පල්ලියට. තාත්තටත් වැඩ ඇරිලා කෙළින්ම පල්ලියට එන්න කියන්න.

මව :    එහෙම නම් ඔය දෙන්නා ගිහින් සූදානම් වෙන්නකෝ. පුතාලා අතින් සිදුවෙලා තියෙන පව් මතක් කර ගන්නකෝ. ඒවාට පසුතැවෙන්න ඕනෑ. එම පව් නැවත කරන්නේ නැහැ කියලා සිතා ගන්නත් ඕනෑ.

(මව සමග ඈන් සහ ඉසුරු කතා කරමින් දේවස්ථානය වෙත ළඟා වෙද්දී පියා ද පැමිණ ස්ටින බව දැක ඔවුහු සතුටට පත් වුහ. පාපෝච්චාරණය කර අවසන් වී සියලූ දෙනා ම නිවස කරා යන අතර තුර ....)

පියා :   පාපෝච්චාරණය කළාට පස්සේ මට පුදුම සැනසීමක් සිතට දැනුණා. මට දැන් තේරෙනවා, එහා වත්තේ ඉන්න මගේ මල්ලිත් එක්ක තරහ වෙලා ඉන්න එක වැරදියි  කියලා. මම මගේ මල්ලිට සමාව දීලා සමාදාන වෙනවා.

ඈන් :   අනේ ඔව් තාත්තේ. අපේ පව්වලටත් අපට අද සමාව ලැබුණනේ. අපිත් බාපප්ලාට සමාව දීලා ආයේ තරහා නොවී ඉඳිමු.

මව :    අපි සැම දෙනාට ම හෙට සතුටින් දිව්‍ය සත්ප්‍රසාධ මංගල්‍යයට සහභාගි වෙන්න පුළුවනි. ගෞරවයෙන් සහභක්තියෙන් දිව්‍ය සත්ප්‍රසාද වහන්සේ ලබා ගන්නත් හැකි වෙන

ඉසුරු :  දිව්‍ය සත්ප්‍රසාද වහන්සේ ලබා ගැනීමෙන් පසු අප ‍ජේසුස් වහන්සේට ගොඩක් සමීප වෙනවා. ඔවුන් වහන්සේ අපට හොඳ මඟපෙන්වීමක් ලබා දෙනවා.

මව :    පුතේ, දිව්‍ය සත්ප්‍රසාද වහන්සේ ලබා ගත් පසු අපිත් අපේ යුතුකම් ඉටු කරන්න ඕනෑ. පල්ලිය අසලින් යන සැම විට ම පල්ලිය ඇතුළට ගොස් දිව්‍ය සත්ප්‍රසාද මණ්ඩපයේ වැඩ සිටින ජීවමාන ජේසුස් වහන්සේට භක්තියෙන් යාච්ඤාවක් කියන්න අමතක කරන්න එපා. සැම මොහොතක ම දිව්‍ය සත්ප්‍රසාද වහන්සේ ඉදිරියෙ දණින් වැටී අපගේ උතුම් ගෞරවය සහ ආදරය පුද කරන්න ඕනෑ.

ඈන් :   සඳුදා මම පාසලට ගියා ම ගුරුතුමියට කියන්න හිතාගෙන ඉන්නවා, නැවතත් අපට පාපෝච්චාරණය කර ගන්න පියතුමාගෙන් දිනයක් ලබා දෙන්න කියලා. එවිට පන්යේ ඉන්න අපේ යහළුවන්ටත් අවස්ථාවක් ලැබෙනවා හොඳ පාපෝච්චාරණයක් කරගන්න. ඒ වගේ ම පිරිසිදු සිතින් දිව්‍ය සත්ප්‍රසාද වහන්සේ ලබා ගන්නත් හැකි වෙනවා.

පසු දින මව, පියා සහ දරු දෙදෙනා දිව්‍ය සත්ප්‍රසාද මංගල්‍යයට උනන්දුවෙන් සහභාගි වුහ. ඔවුන් විසින් ඉතා ම ගෞරවයෙන් සහ ආදරයෙන් දිව්‍ය සත්ප්‍රසාද වහන්සේ තම ජීවිතයට ලබා ගන්නා ලදි.