ගුරුතුමිය : දුවලා පුතාලාට මතක ද අපි ගිය සතියේ ලස්සන පාඩමක් ඉගෙන ගත්තා?

ඇන්ටන් : ඔව් ටීචර්, මට මතකයි. අසීමිත දේව ආදරය තමයි පාඩමේ නම.

ගුරුතුමිය : මොනවා ගැන ද පාඩමේ සඳහන් වුණේ?

ඈන් : දස පනතේ පළමු පනත් තුන පිළිබඳවයි.

ගුරුතුමිය : එහෙනම්, අපි අද ඉතිරි පනත් හත පිළිබඳව ඉගෙන ගනිමු. බලන්න මේ ලස්සන පින්තූර දිහා.

4. මවිපියන්ට සංග්‍රහ කරන්න

මහන්සි  වී වැඩ කරන තාත්තාට ජේසු කුමරු උදවු වෙනවා. (ශු. ලුක් 2 : 51 - 52) ඒ වගේ ම තමයි මරියත තුමියටත් උදවු වුණා. ඉතිං අපිත් කුඩා කල සිට ම දෙමවුපියන්ට කීකරුවීමට පුරුදු වෙමු! ගෞරව කරමු.

5. ජිවිත විනාශ නොකරන්න

මිනී නොමරන්න, මිනී මරන කවරකු වුව ද විනිශ්චයට යටත් වනු ඇතැයි පැරැන්නන්ට කී බව ඔබ අසා ඇත. (ශු. මතෙව් 5 : 21)

මේ ආකාරයට ජේසුස් වහන්සේ නිතර ම ප්‍රකාශ කළේ ජීවිත විනාශ කිරීම නොකළ යුතු දෙයක් බවයි. ඒ වගේ ම මේ වටිනා ජීවිතය අපි  ආරක්ෂා කර ගනිමු.

6. කාමමිථාචාරය නොකරන්න

9. පරදාර ආලය නොකරන්න

මේ දේව පනත් තුළ වැරදි ලෙස හැසිරීම හොඳ නැති බව අපට මතක් කර දෙනවා. පව්කාර ස්ත්‍රියට ජේසුස් වහන්සේ සමාවෙ දුන්නා (ශු. ජොහාන් 8 : 11). ඒ නිසා ම ඇය යහපත් කෙනෙක් වුවා. පුංචි ඔබත් කුඩා කල සිට ම පිරිසිදු පැවැත්මෙන් ජීවත වෙන්න ඕනෑ. ආදරයෙන් තමන් රැක බලා ගන්න ඕනෑ.

7. සොරකම් නොකරන්න

8. බොරු සාක්ෂි නොකියන්න

10. අන් වස්තු ආශා නොකරන්න

සාකෙවුස් කියන්නේ වැරදි ලෙස මිනිසුන්ගේ බදු අය කර ගත් කෙනෙක්. එහෙත් ජේසුස් වහන්සේගේ හමුවීමෙන් පසු ඔහු මුළුමනින් වෙනස් වී යහපත් පුද්ගලයෙක් වුණා තමන් සතු දේ දිළිඳුන්ට බෙදා දුන්නා (ශු. ලුක් 19 : 8 - 9). ඉතිං අපිත් අනෙක් අයගේ දේවල් ගැන ආශා නොකරමු. අවංකව ජීවත් වීමට පුරුදු වෙමු.

දේව දරුවකු ලෙස ජීවත් වීමේ දී දේව පනත් ආරක්ෂා කළ යුතු ය. දෙමවුපියන්ට, වැඩිහිටියන්ට, අසල්වැසියන්ට හා අසරණ අයට ආදරය දැක්වීම, උදවු කිරීම තුළින් දේව පනත් පිළිපැදිය යුතු ය.