1 සාමුවෙල් 1 : 21 - 28

හන්නා සහ එල්කානා දෙවිදුන්ට ප්‍රේම කළ අය වුහ. අවුරුදු පතා ෂිලෝහි දී දෙවියන් වහන්සේට නමස්කාර කරන්නටත්, පුද පුජා පවත්වන්කටත් ඔවුහු පුරුදු වී සිටියහ. එහෙත් ඔවුන්ට දරුවකු නොසිටි බැවින් හන්නා බොහෝ දුක් වුවා ය. දෙවිඳුන් ඉදිරියේ ඇය මහත් ඕනෑකමින් යාච්ඤා ඉල්ලීම් පුද කළා ය.

දිනක් හන්නා ෂිලෝහි නමස්කාර ස්ථානයේ දී, "සියලු බලැති සමිඳාණන් වහන්ස, ඔබේ මෙහෙකාරිය වන මගේ දුක දෙස හොඟඳින් බලා මා සිහිකර, මා අමතක නොකර, මට පිරිමි දරුවකු දෙන සේක් නම්, මම ඔහුගේ මුළු ජීවිත කාලය ම ඔබට කැප කරන්නෙමි," යනුවෙන් යාච්ඤා කළා ය. දෙවිදුන් හන්නාගේ යාච්ඤාව ඇසු සේක. කලක් ගත වු පසු දෙවියන් වහන්සේ හන්නි හා එල්කානාට බිලිඳු පුතකු දුන් සේක. ඇය ඔහුට " සාමුවෙල් " යන නාමය තැබුවා ය. "සාමුවෙල්" යන නමෙහි අර්ථය, "සමිඳාණන් වහන්සේගෙන් ඉල්ලා ගත්" යන්නයි.

හන්නා බිලිඳු දරුවා ඉතා ආදරයෙන් රැක බලා ගත්තා ය. දරුවා මවගෙන් කිරි බිවූ කාලය අවසන් විය. ඇය දෙවියන් වහන්සේට ෂිලෝහි දී කළ පොරොන්දුව ඉටු කිරීමට සූදානම් වූවා ය.

ඔවුහු ෂිලෝහි පිහිටි දේව මාලිගාවට පැමිණ තමන් ගෙනා පූජා ද්‍රව්‍ය ඔප්පු කළහ. පසුව ඔවුහු සාමුවෙල්, ඒලි පුජකයා වෙත ගෙනාවෝ ය. හන්නා, ඒලී පුජකයාට මෙසේ පැවසුවා ය. "මේ දරුවා දෙන ලෙස මම සමිඳාණන් වහන්සේට යාච්ඤා කළෙමි. සමිඳාණන් වහන්සේ ද මා උන්වහන්සේගෙන් ඉල්ලූ ඉල්ලීමට මට ඉටු කළ සේක. එබැවින් මම ද ඔහු සමිඳාණන් වහන්සේට දෙන්නෙමි. ඔහු ජීවත්ව සිටින තෙක් සමිඳාණන් වහන්සේට කැප ය."

දෙවියන් වහන්සේ හන්නාගේ යාච්ඤාවට පිළිතුරු ලබා දුන් සේක. හන්නා සහ එල්කානා දෙවියන් වහන්වහන්සේගේන් ලැබූ ආශීර්වාදයට යහපත් ප්‍රතිචාර ලබා දුන්නො ය. ඔවුහු දෙවිඳුන්ට වූ පොරොන්දුව ඉෂ්ට කළෝ ය. හන්නා තමන් ලද එක ම පුත්‍රයා දේව සේවයට කැප කිරීමට තරම් ත්‍යාගශීලී වුවා ය. එමෙන් ම ඇය දෙවිදුන්ට වූ පොරොන්දුව ද ඉෂ්ට කළා ය.

අපගේ ජීවිතවලටත් දෙවියන් වහන්සේ වටිනා ආශීර්වාද රැසක් ලබා දී තිබේ. හන්නා හා එල්කානා මෙන් අප ද දෙවිදුන්ලෙන් ලැබු ආශීර්වාදවලට යහපත් ප්‍රතිචාර දැක්විය යුතු ය.

දෙවිදුන්ගේ ආශීර්වාදය ලබා ගනිමු. යහපත් ප්‍රතිචාර දක්වමු!