උත්පත්ති 1 : 27 - 28 

ගුරුතුමිය: ජේසු පිහිටයි දරුවනේ...! සුබ උදෑසනක් ඔබ සියලූෙ දෙනාට ම...!

සිසුන්: ජේසු පිහිටයි... සුභ උදෑසනක් ගුරුතුමී!

ගුරුතුමිය: දරුවනේ, අද මම ඔයාලා සියලූ දෙනාට ම ශුද්ධ බයිබලයේ උත්පත්ති 1:27 හා 28 පාඨ පිළිබඳව පැහැදිලි කිරීමක් කරන්නයි බලාපොරොත්තු වෙන්නේ. ශුද්ධ බයිබලයේ උත්පත්ති 1:27 පළමු බයිබල් පාඨය කියවීමට මම ශලෝමිට අවස්ථාව ලබා දෙනවා.

ශලෝමි: "දෙවියන් වහන්සේ තම ස්වරූපය අනුව මිනිසා මැවූ සේක. දෙවියන් වහන්සේගේ ම ස ස්වරූපයෙන් අනුව ඔවුන් මවා වදාළ සේක. පුරුෂයා ද ස්ත්‍රිය ද වශයෙන් ඔවුන් මැවු සේක."
           (උත්පත්ති 1:27)

ගුරුතුමිය: ස්තුතියි ශලෝමි... අද අප විසින් අසන ලද බයිබල් පාඨය සුවිශේෂ බයිබල් පාඨයක්... ඒ අනුව දේව මැවිල්ලේ මුදුන් මල්කඩ වන්නේ පුරුෂයා හා ස්ත්‍රියයි. දෙවිඳුන් ඔවුන්ට ලබා දුන් වටිනාකම පැහැදිලි කිරීමට මම ප්‍රදර්ශන පත්‍රිකාවක්  සුදානම් කරගෙන පැමිණියා. අපි මේ ප්‍රදර්ශන පත්‍රිකාවකාවට අවධානය යොමු කරමු.

මෙලෙස දෙවි පියාණන් වහන්සේ  මැවු නිර්මාණ අතර විස්මිත හා අසමසම නිර්මාණය වන්නේ පුරුෂයා හා ස්ත්‍රියයි. දෙවියන් වහන්සේ මනුෂ්‍යයාට වගකීම් රැසක් ලබා දෙනවා. එම වගකීම් මොනවා දැයි සොයා බැලීම සඳහා අපි, උත්පත්ති 1:28 බයිබල් පාඨය කියවා බලමු.

ශලෝමි: "දෙවියන් වහන්සේ ඔවුන්ට ආසිරි පතමින් නුඹලා දරු සම්පත් ලබා වැඩි වර්ධනය වී, පොළොව පුරා පැතිර එය යටත් කර ගන්න. මුහුදේ මසුන් කෙරෙහි ද අහසේ පක්ෂීන කෙරෙහි ද බලය පවත්වන්නැ"යි  ඔවුන්ට වදාළ සේක.
            (උත්පත්ති 1:28)

ගුරුතුමිය: ස්තුතියි ශලෝමි...! දෙවියන් වහන්සේ තමන් වහන්සේ විසින් නිර්මාණය කරන ලද උතුම් ම මැවිල්ල වන පුරුෂයාට හා ස්ත්‍රියට ආශීර්වාද කර ප්‍රධාන වගකීම් තුනක් ඔවුන්ට පවරනවා. එම වගකීම් ලියු පුවරු තුන ප්‍රදර්ශනය කිරීමට ස්නේහාත්, තිළිණත්, නයෝමිත් සූදානමින් සිටිනවා.

මනුෂ්‍යයාට ඇති ඉමහත් ප්‍රේමය නිසා මෙලොව භාරකාරත්වය ලබා දුන් දෙවි පියාණන් වහන්සේ අපට පවරා තිබෙන මෙම වගකීම් නිසි ලෙස ඉටුකිරීම අපගේ යුතුකමක් වෙනවා.

එකිනෙකාට වෙන් වෙන් වශයෙන් දෙවිඳුන් ලබා දුන් ස්ත්‍රී පුරුෂ බව තුළ යහපත් කිතුනු ජීවිතයක් ගත කිරීම දෙවිඳුන් අපගෙන් බලාපොරොත්තු වෙනවා. මෙම වගකීම් නිසි ලෙස ඉටු කිරීමට අපට අවශ්‍ය කරන දේව මඟපෙන්වීම ඉල්ලා අපි යාච්ඤා කරමු.ජේසු පිහිටයි දරුවනේ.

සිසුන්: ජේසු පිහිටයි ගුරුතුමී.

මම දෙවිඳුන්ට වටිනා ගැහැනු දරුවෙක් වෙමි!
මම දෙවිඳුන්ට වටිනා පිරිමි දරුවෙක් වෙමි!
අපි දෙවි පියාණන් වහන්සේ පැවරූ වගකීම් නිසි ලෙස ඉටු කරමු!