තිසර, පැතුම්, විහඟ, රන්දි හා ඉසාරා එක ම පන්තියේ ඉගෙනුම ලබන යහළුවෝ වෙති. ඔවුහු සවසට සෙල්ලම් කරන්නෙත් එකට ම ය. දරුවන්ගේ එකමුතුකම නිසා ම ඔවුන්ගේ දෙමාපියෝ ද හිතවන්තයෝ ය.

"අම්මේ, ලබන ඉරිදා තිසරගේ උපන් දිනය. තිසරගේ අම්මා සවසට පන්සලේ බෝධි පූජාවක් තියන්න සූදානම් කරලා. අපිටත් එන්න කිවුවා,” යැයි විහඟ කීවේ ය.

ඒක නම් බොහොම හොඳ වැඩක් පුතේ, අපි හැමෝ ම ඒ පින්කමට යමු,” යැයි විහඟගේ අම්මා එය අගය කරමින් කැමැත්ත පළ කළා ය.

දෙමාපියෝ බෝධි පූජාවට අවශ්‍ය ද්‍රව්‍ය සූදානම් කර ගත්හ. පැතුම්ගේ අම්මා කොඩි කිහිපයක් ද, රන්දිගේ අම්මා මල් මාලා ද සකස් කර ගත්හ. දරුවෝ එක් වී මල් නෙළා ගත්හ.
පුතාගේ උපන් දිනය දා බෝධි පූජා පින්කමක් කරන බව තිසරගේ අම්මා ලොකු හාමුදුරුවන් වහන්සේ දැනුම්වත් කර අවසර ලබාගෙන තිබුණි. පිරිසිදු සංවර සුදු ඇඳුමින් සැරසුණු සියලූ දෙනා ම කල්වේලා ඇති ව විහාරස්ථානය වෙත පියමං කළහ. ඔවුන් විහාරස්ථානය වෙත පියමං කරන විට ලොකු හාමුදුරුවන් වහන්සේ බෝ මළුවේ සක්මන් කරමින් සිටියහ. ඔවුහු හාමුදුරුවන් වහන්සේට පස`ග පිහිටුවා වන්දනා කළහ. එවිට උන්වහන්සේ ඔවුනට "සුවපත් වේවා!” යි ආශීර්වාද කළහ.

"ආ.... අද තිසර පුතාගෙ උපන් දිනේට බෝධි පූජා පින්කමක් පවත්වන්න යොදා ගත්තා නේද?”

"එහෙමයි අපේ හාමුදුරුවනේ,” යැයි තිසරගේ තාත්තා පැවසුවේ ය. "එහෙම නම් පූජාව සූදානම් කරලා දැනුම් දෙන්නකෝ. මම පොඩි හාමුදුරුවන්ට පවරන්නම් බෝධි පූජාව පවත්වන්න,” යි කියමින් ලොකු හාමුදුරුවෝ ආවාස ගෙය වෙත වැඩියහ.

තාත්තලා සමග එක්ව දරුවෝ චෛත්‍ය මළුව, බෝධි මළුව හා විහාර මන්දිරය ඇමද පිරිසිදු කළහ; පහන් වැටවල් හා හඳුන්කූරු දල්වන බඳුන් ද පිරිසිදු කළහ. ඉන් අනතුරුව දෑත් ධෝවනය කරගත් දරුවෝ මල්වට්ටි අලංකාර ලෙස සකස් කළහ. ඒ අතරතුර අම්මලා ගිලන්පස පිළියෙල කළහ.

පැතුම්ගේ අම්මා තමන් සකස් කරගෙන ආ කොඩි බෝ මළුව වටා එල්ලීමට දූ පුතුන්ට දුන්නා ය.

දරුවෝ එම කොඩිවල ලියා තිබූ බොදු වදන් කියවන්නට වූහ.

"ඉසාරා, මේ අපි ඉගෙන ගත්ත බොදු වදන් නේද?” රන්දි කීවා ය.

"ඔව්, කොඩිවල ඒවා ලියුවා ම හැමෝ ම කියවනවනේ. ඒ නිසා අපේ අම්මා කිවුවා කොඩිවල බොදු වදන්, ගාථා ලියන එක හොඳයි කියලා,” යැයි පැතුම් කීවේ ය.

පසු ව සැම දෙනා ම එක්ව පහන් දල්වා හඳුන්කූරු පත්තු කළහ. තිසර හා යහළුවෝ පිළිවෙළින් වෙහෙර වහන්සේට, බෝධීන් වහන්සේට හා පිළිම වහන්සේට ගිලන් පස හා පූජා ද්‍රව්‍ය තැන්පත් කළහ. ඉන්පසුව ඔවුහු පැන් කළ රැගෙන බෝධීන් වහන්සේ වටා පැදකුණු කරමින් බෝධීන් වහන්සේ නෑවූහ.

"පුතේ තිසර, පැතුම් එක්ක ගිහින් බෝධි පූජාව පවත්වන්න පොඩි හාමුදුරුවන් වහන්සේ වැඩම කරගෙන එන්න,” යැයි තිසරගේ අම්මා කීවා ය.

"අවසරයි, අපේ හාමුදුරුවනේ, පූජාව සූදානම් කළා,” යැයි තිසර කීවේ ය.

"පූජා ද්‍රව්‍ය ත්‍රිවිධ බෝධීන්ට තැන්පත් කළා ද?”

"එහෙමයි, අපේ හාමුදුරුවනේ”යි පැතුම් කීවේ ය.

"එහෙනම් යමු දරුවනේ,” යි කියමින් වටාපත ද රැගෙන පොඩි හාමුදුරුවෝ බෝ මළුව වෙත වැඩියහ.

තිසර හා පැතුම් පොඩි හාමුදුරුවන් වහන්සේට පිටුපසින් ගමන් කළහ.

පොඩි හාමුදුරුවන් වහන්සේ බෝධි පූජාව පවත්වා උපන් දිනයට බෞද්ධ වතාවත් අනුගමනය කිරීමේ වටිනාකම ගැන කරුණු පහදා දෙමින් කෙටි අනුශාසනාවක් පැවැත්වූහ.

"අද තිසරගෙ දෙමවුපියෝ හොඳ උපන් දින උත්සවයක් පැවැත්වූවා. මේ පින්කම අපි හැමෝට ම හොඳ ආදර්ශයක්,” යැයි ලොකු හමුදුරුවෝ ප්‍රකාශ කළහ. තිසර උන්වහන්සේට පිරිකර පූජා කළේ ය. හමුදුරුවන් වහන්සේ හැම දෙනාට ම නිදුක් නීරෝගී සුවය පතමින් දීර්ඝායුෂ ප්‍රාර්ථනා කළහ. උන්වහන්සේ සෙත් පිරිත් සජ්®ායනා කර ආශීර්වාද කරමින්, සියලූ දෙනාගේ දකුණු අත් වල පිරිත් නූල් ගැට ගැසූහ. සියලූ දෙනා "සීලවන්තං ගුණවන්තං” ගාථාව කියමින් උන්වහන්සේට වන්දනා කළහ.

දරුවෝ හැම දෙනා ම තම දෙමාපියන්ට වඳින ගාථා කියා වන්දනා කළෝ ය. එවිට දෙමාපියෝ, ‘සෙත් වේවා!’, ‘දළදා සමිඳුගේ පිහිටයි!’, ‘බෝ සමිඳුගේ පිහිටයි!’ ආදි වශයෙන් දරුවනට ආශීර්වාද කළහ.