17 - පාසලේ ශ්‍රමදානය
උදෑසන රැස්වීමේ දී සියලූ ම සිසුහු විදුහල්පතිතුමාගේ කතාව ඉතාමත් ඕනෑකමින් අසා සිටියහ. "සුභ උදෑසනක් වේවා! - ආයුබෝවන් දරුවනි.”
"හෙට අපි යොදාගෙන තියෙන ශ්‍රමදානය ගැනයි මම අද කතා කරන්නේ. ශ්‍රමය කියන්නේ අපේ මහන්සිය! අපේ ශක්තිය. දානය කියන්නේ දීම. ශ්‍රමදානය කියන්නේ ශ්‍රමය නොමිලේ ලබා දීමයි. අපි අපේ ශක්තිය යොදවලා මහන්සි වෙලා වැඩ කරනවා. තමාට කිසි ම ලාභයක් බලාපොරොත්තු නොවී යම් වැඩක් කිරීම ශ්‍රමදානය ලෙස
හඳුන්වන්න පුළුවන්.
හෙට අපේ පාසලේ සිදු කෙරෙන්නේ ශ්‍රමදානයක්. මේ දරුවනුත්, දෙමාපියනුත්, පාසල් ගුරුවරුනුත්, මමත් මේ කටයුත්තට සහභාගි වෙන්නේ අප හැම දෙනාගේ ම ශ්‍රමය පාසල වෙනුවෙන් ලබා දීමටයි.
ශ්‍රමදානයක ප්‍රයෝජන කීපයක් තියෙනවා. එකක් තමයි කවුරුත් සමගියෙන් එක් ව වැඩ කිරීමට හුරුවීම. අනෙක තමයි යමක් සැලසුමක් ඇතුව කිරීම සඳහා හුරුවක් ලැබීම. මේක දරුවන්ට බොහොම ප්‍රයෝජනවත් දෙයක්. ශ්‍රමදානයක දී එක එක අයට ඕන ඕන විදියට, හිතන හිතන විදියට වැඩ කරන්නේ නැහැ. කණ්ඩායමක් එකතු වෙලා වැඩ ඛෙදා ගන්නවා. ඒ නිසා කරන වැඩේ සාර්ථක වෙනවා. ඒ වගේ ම අඩු පාඩුවක් නැති ව හෝ අවම අඩු පාඩු සහිත ව හෝ වැඩක් අවසන් කරන්න පුළුවන් වෙනවා. ඒ වගේ ම ඒ සඳහා යන මුදලත් ඉතිරි වෙනවා.
ශ්‍රමදානයට සහභාගි වීම පින්කමක්. පින් සිදුවන දේවල් කිරීම වැදගත්. පින්වලින් අපේ සිතත් සතුටු වෙනවා. පාසල පිරිසිදු වෙලා ලස්සන වෙලා අඩුපාඩු නැති වෙලා තියෙනවා දකින්න ලැබීමත් අපේ සතුටට හේතු වෙනවා. හෙට ශ්‍රමදානයේ දී කළ යුතු දේ ගැන නියෝජ්‍ය විදුහල්පතිතුමා කියලා දේවී" කියමින් විදුහල්පතිතුමා කතාව අවසන් කළ අතර, නියෝජ්‍ය විදුහල්පතිතුමා කතාව ආරම්භ කළේ ය.
"ආයුබෝවන් දරුවනේ, හෙට මේ දරුවෝ පාසලට එනකොට අම්මා හරි, තාත්තා හරි, වෙනත් වැඩිහිටියෙක් හරි එක්ක එන්න. පාසල් වත්තේ තියෙන අනවශ්‍ය ගස්වැල් කපා ඉවත් කරන්න වෙනවා. ගස්වල අතු ඉති පාහින්න වෙනවා. ඒ සඳහා අවශ්‍ය උපකරණත් ගේන්න වෙනවා.
ඩෙංගු මදුරු උවදුර ගැන අපි කවුරුත් දන්නවා. අපේ පාසලේ පොලිතීන්, ප්ලාස්ටික් භාවිතයෙන් තොර වැඩසටහනක් ක්‍රියාත්මක වෙනවනේ. ඒ වුණත් හෙට අපි තව දුරටත් ඩෙංගු මදුරුවන් බෝවීමට හැකි ස්ථාන ගැන සොයා බලා ඒවා ඉවත් කරන්න කටයුතු කරන්න ඕන.
ශ්‍රමදානයෙන් පස්සෙ අපි පාසලේ ඔසු උයනක් සකස් කිරීමට කටයුතු යොදලා තියෙනවා. ඖෂධ පැළ රෝපණය කරන්න කැමැති දරුවන් පැළ ගෙනැවිත් හෙට උදේට පන්ති භාර ගුරුවරුන්ට භාර දෙන්න. ශ්‍රමදානයට සහභාගි වෙන අය වෙනුවෙන් පාසලේ ආදි ශිෂ්‍ය සංගමයෙන් සංග්‍රහයකුත් ලබා දෙනවා. ශ්‍රමදානය සාර්ථක කර ගන්න
හැම දෙනා ම දායක වෙන්න.”
රැස්වීම අවසානයේ නියමිත පන්ති කරා ගිය සිසු දරුවන්ගේ බලාපොරොත්තුව වූයේ හෙට දවස ගැන ය.
සිසු දරුවන් සමග පැමිණි දෙමාපිය වැඩිහිටියන් නිසා පාසල අලූත් ස්වභාවයක් ගෙන තිබුණි. චාමර පැමිණ සිටියේ අම්මාත්, තාත්තාත් සමග ය.
මහ පාරේ සිට පාසලට පැමිණෙන පාර සහ අවට ප්‍රදේශයත්, මුළු පාසල් වත්තත් කොටස්වලට වෙන් කර ඒ ඒ ශ්‍රේණිවලට පිරිසිදු කිරීමට භාර විය. චාමර ඉගෙනුම ලබන 5 ශ්‍රේණියට පැවරී තිබුණේ පාසලේ බුදු මැඳුරත්, ඒ අවට ප්‍රදේශයත් පිරිසිදු කිරීමට ය.
බිත්තිවලත්, වහලෙත් බැඳී තිබුණු මකුළු දැල් කඩා දමා ඉන් පසුව බුදු පිළිමයෙහි දූවිලි පිසදා දෙමවුපියෝ එය ජලයෙන් ධෝවනය කළහ. තෙල් රැගෙන ආ හිස් බෝතල් ද, මල් වට්ටි කිහිපයක් ද, මැටි පහන් ද, බුද්ධ පූජාව තැබීමට භාවිත කළ භාජන කිහිපයක් ද එම ස්ථානයෙන් ඉවත් කෙරිණි. අවශ්‍ය ඒවා පමණක් සෝදා පිරිසිදු කර මේසය මත තබන ලදි.
චාමරත්, අචලාත් බුදු මැදුරේ මේසයට දමා තිබූ ඉටිරෙද්ද සෝදා රැගෙන ආහ. බිම හොඳින් අතු ගා පසු ව වතුරෙන් සෝදන ලදි. බුදු මැඳුරේ ජනෙල් සහ දොරත් දූවිලි ඉවත් වන සේ හොඳින් පිස දැමිණි.
බුදු මැඳුර අවට පිරිසිදු කිරීම භාර වූ දෙමවුපියන් විසින් අනවශ්‍ය ගස් වැල් කපා දමා ඉතිරි ගස්වල අතු ඉති පාහින ලදි. කපන ලද ශාක කොටස් එක තැනකට ගොඩ ගසන ලදි.
චාමරත්, යහළුවෝත් එක් වී බුදු මැඳුර අවට තැනින් තැන තිබූ කුඩා පැළ වර්ග ගලවා ඉවත් කර මිදුල අතු ගෑවෝ ය. දාස්පෙති, කූඩලූ, කපුරු, අටපෙතියා ආදි පැළ වර්ග කිහිපයක් බුදු මැඳුර වටේට සිටුවන ලදි.
පන්තිය භාර ගුරුතුමිය ද දරුවන් හා දෙමාපියන් සමග මහත් උනන්දුවකින් කටයුතු කළා ය. චාමර ඇතුළු යහළුවෝ තම කටයුතු නිමා වූ පසු අනෙක් යහළුවන් යෙදී සිටි ශ්‍රමදාන කටයුතුවලට සහාය වූහ. පාසලට පැමිණෙන පාර දෙපස ඉතා හොඳින් පිරිසිදු කරන ලදි.
සියලූ ම පන්ති කාමරවල මකුළු දැල් කඩා දොර ජනෙල් දූවිලි පිසදා ඩෙස් පුටු ඉවත් කර පන්ති කාමර සෝදා තිබිණ. විදුහල්පතිතුමාගේ කාර්යාලය, ගුරු විවේකාගාරය මෙන් ම අනෙකුත් ගොඩනැගිලි සියල්ල ම අලූත් මුහුණුවරක් ගත්තේ ය. වහලවල කැඩුණු බිඳුණු තැන් ද සකසා තිබිණ. ශ්‍රමදානය අවසානයේ සංග්‍රහය භුක්ති විඳීම සඳහා සියලූ දෙනාට ම කැඳවීමක් ලැබුණි. කිරිබත්, කැවුම්, කෙසෙල් ආදියෙන් යුත් සංග්‍රහය සියලූ දෙනාගේ සතුටට හේතු විය.
පාසලට අලූතෙන් ම ඔසු උයනක් ලැබිණ. දරුවන් විසින් ගෙනෙන ලද ඔසු පැළ රෝපණය කොට ඔසු උයන සකස් කිරීමේ දී ගුරුවරු සහ විදුහල්පතිතුමා දෙමාපියන්ට විශාල සහයෝගයක් ලබා දුන්හ.
ඔසු උයන වටා අලූතෙන් වැටක් බැඳිණ. අවශ්‍ය කාබනික පොහොර, වතුර ආදිය දමා ඔසු පැළ වවා ගැනීමේ කාර්යය පාසලේ සියලූ ම දරුවන්ට පැවරිණ. එකතු කරන ලද පොලිතීන්, ප්ලාස්ටික් ආදිය පාසලින් ඉවතට ගෙන යාම සඳහා එක් පසෙක ගොඩ ගැසිණ. ශ්‍රමදානය අවසන් කළ පසු දෙමවුපියන් සහ දරුවන් ඇමතූ විදුහල්පතිතුමා පාසලට උදවු කිරීම ගැන සියලූ දෙනාට ම ස්තුති කළේ ය.
"අද දවසේ තමන්ගේ දෛනික කටයුතු පසෙකලා පාසලට ඇවිත් උදවු කරපු මේ දෙමවුපියන්ට බොහොම ස්තූතියි. දරුවන්ගේ ඉගෙනීමට අත හිත දෙනවා වගේ ම පාසලත් ආරක්ෂා කර ගන්න ඔබ සියලූ දෙනා ම ගන්නා උත්සාහයට මම ගෞරව කරනවා.”
"දරුවෝ හැම දෙනා ම තමන්ගේ පාසල රැකගන්න ඕන. කිසි ම කෙනෙක් කොළ කෑලි වගේ දේවල් බිම දමලා පාසල අපිරිසිදු කරන්න එපා. පොලිතීන්, ප්ලාස්ටික් පාසලට ගෙන ඒම නතර කරන්න ඕන. ඔසු උයන රැක බලා ගැනීම මේ හැම දරුවකුගෙ ම වගකීමක්. තමන් ඉගෙන ගන්න පාසල ආරක්ෂා කිරීම සැම දරුවකුගෙ ම යුතුකමක්. මේ හැම දෙයක් ම අයිති දරුවන්ටයි. අපි අපේ පාසල රැකගනිමු!” යි විදුහල්පතිතුමා කතාව අවසන් කළේ ය.