එදා ඉරිදා දවසකි. මම උදෑසනින් ම අවදි වී දහම් පාසල් යාමට සූදානම් වුණෙමි. බුද්ධ වන්දනාව සඳහා මල් වට්ටියක් ද සූදානම් කර ගත් මම අම්මා සමග දහම් පාසල වෙත ගියෙමි. මගේ අම්මා ද දහම් පාසලේ ගුරු මෑණියක ලෙස කටයුතු කරන්නීය.

බුද්ධ වන්දනාව අවසානයේ, ළඟ එන පොසොන් පොහොය පිළිබඳව ස්වාමීන් වහන්සේ අප දැනුම්වත් කළහ. එදින සිල් සමාදන් වන උදවියට ඇප උපස්ථාන කිරීම සඳහා දහම් පාසලේ දරුවන් සහභාගි කර ගැනීමට අදහස් කරන බව ද උන්වහන්සේ ප්‍රකාශ කළහ. ඇදුරු මඩුල්ලේ හා දෙමාපිය සහාය ඇතිව දවස පුරා ම සිසුන් ඒ සඳහා යොමු කරවීමට බලාපොරොත්තු වන බව උන්වහන්සේ තව දුරටත් ප්‍රකාශ කළහ.

ස්වාමීන් වහන්සේගේ අනුශාසකත්වයෙන් දහම් පාසලේ ප්‍රධානාචාර්යතුමා හා එක් ව ගුරුමෑණිවරු හා පියවරු පොසොන් පොහොය වැඩ කටයුතු සංවිධානය කළහ.

නිවෙස්වල සිටින අත්තම්මලා, සීයලා, අම්මලා, තාත්තලා එදිනට සිල් සමාදන් වීම සඳහා සහභාගි කරවන ලෙස ද ගුරු මෑණිවරු අප දැනුම්වත් කළෝ ය.

ප්‍රධානාචාර්යතුමා හා ගුරු මණ්ඩලය සංවිධානය කරගත් පරිදි දෙමාපිය හමුව පවත්වා පොහෝ දින කළ යුතු කාර්යයන් පිළිබඳ සාකච්ඡා කෙරුණි. සිල් සමාදන් වන පිරිසට අවශ්‍ය දානාදියත්, ඔසුපැන් සකස් කරන ආකාරයත් දෙමාපියන් හා එක් ව සැලසුම් කෙරිණි.

පොසොන් පොහොය උදා විය. මම උදෑසන ම අවදි වුණෙමි. අත්තම්මා ද සීයා ද සිල් සමාදන් වීමට යාම සඳහා සූදානම් වූහ.

"පුතාටත් අද සිල් සමාදන් වෙන්න තිබුණා නේද?” අත්තම්මා ඇසුවා ය.

"අද මට සිල් සමාදන් වෙන්න බැහැනේ අත්තම්මේ. අද සිල් සමාදන් වන උදවියට උපස්ථාන කරන්නේ අපේ දහම් පාසලේ අය. මට ඒ වතාවත්වලට සහභාගි වෙන්න තියෙනවා,” යි මම කීවෙමි.

"බොහොම හොඳ පින්කමක් පුතේ ඒක. සිල් සමාදන් වුණ උවසු උවැසියන්ට දානය දීම, දන් පිළිගැන්වීම, ඇප උපස්ථාන කිරීම බොහොම හොඳ වැඩක්. ඒ වගේ ම පුතේ සිල් සමාදන් වෙලා උපස්ථාන කරන්නත් කිසි ම බාධාවක් නැහැ. එහෙම උපස්ථාන කරන එක තවත් වටිනවා,” යැයි සීයා කීවේ ය.

සිල් සමාදන් වීම සඳහා සුදු ඇඳුමින් සැරසුණු අත්තම්මාත්, සීයාත් සමග මම පන්සල වෙත පියමං කළෙමි.

පන්සල වෙත අප ළඟා වන විට මගේ යහළුවෝ ද ඒ අයගේ වැඩිහිටියන් සමග විහාරස්ථානය වෙත එමින් සිටියහ. ධර්මශාලාව වෙත ගොස් අත්තම්මාටත් සීයාටත් අසුන් ගැනීමට සලස්වා දෙදෙනාටම දණගසා වැන්දෙමි. ඒ දෙදෙනා, "මගේ පුතාට තෙරුවන් සරණයි” යනුවෙන් ආශීර්වාද කළහ.

ස්වාමීන් වහන්සේ වැඩම කර, පිරිස සිල් සමාදන් කරවා බුද්ධ පූජාව පැවැත්වූ සේක. ඉන් අනතුරුව හීල් දානය පිළිගැන්වීමේ කටයුතු සිදු විය. අපි දානය පිළිගැන්වීමේ දී උපාසක පිරිසට දන් පිඟන් දෝතින් ම ලබා දී වන්දනා කළෙමු. පැන් අවශ්‍ය උදවියට උණු පැන් හා සිසිල් පැන් ලබා දුන්නෙමු.

හීල් දානය අවස්ථාවේ දී මෙන් ම දහවල් දානය අවස්ථාවේ දී ද අපි ඉතා ඕනෑකමින් හා ගෞරවයෙන් සිල්වත් ඇත්තන්ගේ වතාවත් නොපිරිහෙලා ඉටු කළෙමු.

ගිලන්පස සඳහා බෙලිමල් වතුර හා හකුරු කැබැල්ලක් බැගින් සිල්ගත් උපාසක උපාසිකාවන්ට පිළිගැන්වූයෙමු. වැඩිහිටියන් පවසා සිටියේ ඛෙලිමල් වැනි ඖෂධ ලබාදීමෙන් අප සැමට නීරෝගී සුවය හා දීර්ඝායුෂ ලැඛෙන බව ය.

එදින බෝධි වන්දනාවේ දී නායක ස්වාමීන් වහන්සේ සිල්ගත් අයට ඇප උපස්ථාන කිරීමේ ආනිශංස සිහිපත් කරමින් ප්‍රශංසාත්මක දේශනාවක් පැවැත්වූහ. දරුවන්ට ප්‍රායෝගික අත්දැකීම් ලබා දෙන මෙවැනි කටයුතුවලට දරුවන් හුරුකරවීම ගැන දහම් පාසලේ ප්‍රධානාචාර්යවරයා ඇතුළු ගුරු මණ්ඩලය ද දෙමාපියන්ට ස්තුති කළහ.

අපේ සීයා ද පිරිස අමතා කතා කරමින් දරුවන් කුඩා කල සිට ම මෙවැනි කටයුතුවලට යොමු කරවීම ගැන ස්වාමීන් වහන්සේට ගෞරවය පිරිනැමුවේ ය¦ දහම් පාසලේ සියලූ දෙනාටත්, දෙමාපියන්ටත්, දූ පුතුන්ටත් ප්‍රශංසා කළේ ය.