ජලය හා නජීසය - "පිරිසිදුකම ඊමානයේ කොටසකි" යන්න නබි වදනකි. ඉස්ලාමය පිරිසිදුකම අගයන දහමකි. එය පිරිසිදුව සිටින්නන් ප්‍රිය කරයි. ඉස්ලාමයේ පිරිසිදුකම ඉබාදතයන් හා බැඳී පවති. අර්කානුල් ඉස්ලාමයේ අඩංගු ඉබාදත් සහ අනෙකුත් දේ පිළිගැනීමට ඇති කොන්දේසිය වශයෙන් ඉස්ලාම් සළකන්නේ පිරිසිදුකම ය. එනිසා අල්ලාහ් ද පිරිසිදුව සිටින අය ප්‍රිය කරන බව අල්කුර්ආනය පවසයි. අභ්‍යන්තරව මෙන්ම බාහිරව ද පිරිසිදුව තිබීම අත්තහාරත් නමින් හැඳින් වේ.
ඊර්ෂ්‍යාව, වංචාව, ආඩම්බරකම, අහංකාරකම, ලෝබකම, මූනිච්ඡාව, කපටිකම ආදී පහත් ගතිගුණවලින් අපි අපගේ සිත පිරිසිදු කර ගැනීම අභ්‍යන්තර පාරිශුද්ධතාව නම් වේ. අල්කුර්ආන් පාරායනය, දික්ර් කිරීම, තස්බීහ් කිරීම, පව් සමාව අයැදීම, සලවාත් පාරායනය වැනි දෑ සිත පිරිසිදු කරන යහක්‍රියාවන් ය.
නජීස්වලින් සිරුර, ඇඳුම්, පදිංචි ස්ථානය, වටාපිටාව යනාදිය පිරිසිදුව තබා ගැනීම බාහිර පිරිසිදුකම නම් වේ. දෛනික කටයුතුවල දී පිරිසිදුකම රැකගැනීම අනිවාර්ය වන්නේ ය. පිරිසිදුකම රැකීමට මිනිසා නජීස්වලින් වැළකී සිටිය යුතු ය. එනිසා නජීසය ඉවත් කරන ආකාරය පදනම් කරගෙන එය කොටස් තුනකට බෙදේ.
දැඩි නජීස් - බල්ලන්ගේ හා ඌරන්ගේ කෙළ මෙයට උදාහරණ වන්නේ ය. මෙම නජීසය පිරිසිදු කිරීම සඳහා හත් වතාවක් ජලය යොදා සේදිය යුතුයි. එයින් එක් වතාවක් පිරිසිදු පස් භාවිතා කළ යුතු ය.
සාමාන්‍ය නජීස් - ලේ, වමනය, මත්පැන්, මළ, මූත්‍ර, කුණු, කෙළ යනාදිය මෙම වර්ගයට අයත් ය. මෙම නජීසය පිරිසිදු කරන අවස්ථාවේ දී නජීස් තැවරුණු ස්ථානය පළමුව පිරිසිදු ජලයෙන් සේදිය යුතු ය. මේ සඳහා සබන් හෝ සෝදන කුඩු යොදා ගැනීමට පුළුවන.
සැහැල්ලූ නජීස් - වයස අවුරුදු දෙක සම්පූර්ණ නොවූ මව් කිරි පමණක් ආහාර වශයෙන් ගන්නා කුඩා පිරිමි දරුවන්ගේ මූත්‍රා මෙම වර්ගයට අයත් ය. මෙය පිරිසිදු කිරීම සඳහා ඒ මතට ජලය ඉසීම පමණක් ප්‍රමාණවත් ය.
ජලය හා එහි වර්ග - ජලය අල්ලාහ් විසින් ලබා දෙන ලද දායාදයකි. තමාව පිරිසිදුව තබා ගැනීම සඳහා මිනිසාට ජලය අවශ්‍යය. ජලයේ ස්වභාවය සහ ධාරිතාව පදනම් කොටගෙන එය කොටස් තුනකට බෙදෙයි.
මාඋන් තහූර් (අති පිරිසිදු ජලය) - මෙ වැනි ජලය ස්වාභාවයෙන් ම පිරිසිදු ය. එහෙයින් මෙය අපිරිසිදු දෑ පිරිසිදු කිරීම සඳහා යොදා ගත හැකිය. නෑම, වුලු කිරීම, බීම, නජීස් පිරිසිදු කිරීම වැනි සියලූ අවශ්‍යතා සඳහා මෙය භාවිත කරයි. මෙම ජලයට උදාහරණ වශයෙන් මුහුදු ජලය වැසි ජලය, වැව් ජලය, ගංගා ජලය, උල්පත් ජලය, ළිං ජලය වැනි ජල වර්ග සඳහන් කළ හැකි ය.
මාඋන් තාහිර් (පිරිසිදු ජලය) - මෙවැනි ජලය පිරිසිදු වුව ද අන් දේවල් පිරිසිදු කළ හැකි ස්වාභාවයකින් තොරය. උදාහරණ වශයෙන් තේ, කෝපි, තැඹිලි වතුර, පිනිදිය, සිසිල් බීම යනාදිය සඳහන් කළ හැකි ය.
මාඋන් නජීස් (අපිරිසිදු ජලය) - ලීටර 210 ට අඩු ජලයෙහි නජීස් වන ද්‍රව්‍ය මිශ්‍ර වීමෙන් එහි පාට, රසය හා සුවඳ යනාදිය වෙනස් වන නිසා එම ජලය මෙම වර්ගයට අයත් වේ. මෙය කිසිදු අවශ්‍යතාවයක් සඳහා භාවිතා නොකළ යුතු ය. උදාහරණ වශයෙන් අපවිත්‍ර ජලය, මූත්‍ර යනාදිය සඳහන් කළ හැකි ය.