18 - අල්කුර්ආනය පාරායනය කරමු 1
( අවසාන සූරා තුන )
සූරතුල් ඉහ්ලාස්, සූරතුල් ෆලක්, සූරතුන් නාස්
අල් කුර්ආනයේ අවසන් සූරා තුන මෙම සූරා ය. මේවා පාරායනයෙන් අධික ආනිශංස ලැබේ. සෑම සලාතයක ම අවසානයේ මෙම සූරා පාරායනය කරන ලෙස නබි සල්ලල්ලහු අලෛහි වසල්ලම් තුමා අණ කළෝ ය. මෙම සූරා උදේ සවස සහ බොහෝ සුන්නත් සලාතය න්වලට පසුව ද පාරායනය කරන සූරාවන් වේ. "නබි සල්ලල්ලහු අලෛහි වසල්ලම් තුමා දිනපතා නිදා ගන්නා විට මෙම සූරාවන් තුන තෙවතාවක් බැගින් පාරායනය කොට, තම දෑතේ අල්ලෙහි පිඹ, තමාගේ මුළු ශරීරය ම පිරිමදිතියි" යනුවෙන් ආයිෂා රළියල්ලාහු අන්හා තුමිය දැනුම් දෙන්නී ය. (බුහාරී)
"මෙම රාත්‍රියේ පහළ වූ වාක්‍ය මෙන් වාක්‍යයන් මා මීට පෙර පහළ වනු දැක නැත්තෙමි. ඒවා සූරතුල් ඉහ්ලාස්, සූරතුල් ෆලක් සහ සූරතුන් නාස්, වේ" යැයි යනුවෙන් නබි සල්ලල්ලහු අලෛහි වසල්ලම් තුමාණෝ පැවසූහ.
සූරතුල් ඉහ්ලාස්
අල් කුර්ආනයේ අන්තර් ගත 112 වන සූරාව සූරතුල් ඉහ්ලාස් වේ. මෙය වාක්‍ය 4 කින් සමන්විත ඉතා කුඩා සූරාවකි. මෙය මක්කාවේ පහළ වූ මක්කී සූරාවකි. මෙම සූරාව අල්ලාහ් ඒකයා බවත්, සැබෑ දෙවියා ඔහු බවත් තහවුරු කරන්නේ ය. එබැවින් මෙයට සූරතුල් අහද්, සූරතුල් තව්හීද් යන නම් ද ඇත. "ඉහ්ලාස්" නමැති අරාබි වචනයේ අර්ථය "පිවිතුරු බව" යන්නයි. අල්ලාහ් සියලූ ෂිර්කයන්වලින් පරිශුද්ධ වූවෙකි. "ඔහුට මව්, පිය, සහෝදර සහෝදරියන් යන කිසිවෙකු නොමැත. එසේ ම කිසිවෙකුගෙන් කිසිදු අවශ්‍යතාවයක් අල්ලාහ්ට නොමැත" යනුවෙන් මෙම සූරාව කෙටියෙන් විස්තර කරයි.
මක්කාවේ ජීවත් වූ කාෆිර්වරු නබි සල්ලල්ලහු අලෛහි වසල්ලම් තුමාණන් වෙත පැමිණ, ඔබ පවසන දෙවියා කෙබඳූ පුද්ගලයෙකු දැයි විමසූ විට එයට පිළිතුරු වශයෙන් මෙම සූරාව පහළ විය. (තිර්මිදි) මෙය අල් කුආනයේ තුනෙන් එකකට සම වේ යැයි නබි සල්ලල්ලහු අලෛහි වසල්ලම් තුමාණෝ පැවසූහ. (බුහාරි)
සූරාව හා එහි අර්ථය
අසීමිත කරුණාවන්ත, අපරිමිත සෙනෙහෙවන්ත අල්ලාහ්ගේ නාමයෙන් (ආරම්භ කරමි.)
- (නබිවරයාණනි!) මිනිසුන් බලා ඔබ (මෙසේ) පවසන්න. අල්ලාහ් ඒකයකි.
- (එම) අල්ලාහ් (කිසිවෙකුගේ) අවශ්‍යතාවයන් නොමැත්තෙකි. (සියලූ දෑ ඔහුගේ දායාදයන් අපේක‍ෂා කරති.)
- ඔහු ව (කිසිවෙකු) වැදුවේ නැත. (කිසිවකු විසින්) වදනු ලැබුවේ ද නැත. (එබැවින් ඔහුට පියකු නැත. පරම්පරාවක් ද නොමැත)
- ඔහුට සමාන කිසිවක් ද නොමැත.
සූරතුල් ෆලක්
අල් කුර්ආනයේ අන්තර්ගත 113 වන සූරාව මෙය වේ. මෙය වාක්‍ය පහකින් සමන්විත මක්කී සූරාවකි. "ෆලක්" යන අරාබි පදයේ තේරුම හිමිදිරි උදෑසන යන්නයි. මෙම සූරාව අන්ධකාරයේ හානිවලිනුත්, ඊර්ෂ්‍යාකාරයන් හා හූනියම්කරුවන්ගෙන් ආරක‍ෂාව පතන අයුරින් සැකසී ඇත.
සූරාව හා එහි අර්ථය
අසීමිත කරුණාවන්ත, අපරිමිත සෙනෙහෙවන්ත අල්ලාහ්ගේ නාමයෙන් (ආරම්භ කරමි.)
- (නබිවරයාණනි! ඔබ ප්‍රාර්ථනා කොට) පවසන්න හිමිදිරියේ නාථයාගෙන් මම ආරක‍ෂාව පතමි.
- ඔහු මැවූ දේවල හානියෙන් ද.
- (සියල්ල) සඟවාලීම සඳහා පැතිරී යන අන්ධකාරයේ හානියෙනුත්
- ගැට දමා පිඹින (හූනියම් කරන) කාන්තාවන්ගේ හානියෙනුත්
- ඊර්ෂ්‍යාකරුවන්, ඊර්ෂ්‍යා කිරීමෙන් ඇති වන හානියෙනුත් (ආරක‍ෂාව පතමු)
සූරතුන් නාස්
අල් කුර්ආනයේ අන්තර් ගත 114 වන හා අවසාන සූරාව මෙය වන්නේ ය. මෙය වාක්‍ය හයකින් සමන්විත මක්කී සූරාවකි. "නාස්" යන අරාබි පදයේ අර්ථය "මිනිසුන්" යන්න ය. මෙම සූරාව නපුරු මිනිසුන් හා ජින්වරුන් මෙන් ම සිතෙහි උපදින සැකයන්ගෙන් ද ආරක‍ෂාව පතන අයුරින් සැකසී තිබේ.
සූරාව හා එහි අර්ථය
අසීමිත කරුණාවන්ත, අපරිමිත සෙනෙහෙවන්ත අල්ලාහ්ගේ නාමයෙන්
(ආරම්භ කරමි.)
- (නබි වරයාණෙනි! ප්‍රාර්ථනා කොට) ඔබ පවසන්න. මිනිසුන්ගේ නාථයාගෙන් මම ආරක‍ෂාව පතමි.
- (ඔහු ය) මිනිසුන්ගේ (සැබෑ) රජු.
- (ඔහු ය) මිනිසුන්ගේ (වැඳීමට සුදුසු සැබෑ) නාථයා.
- මිනිසුන්ගේ සිත් තුළ (අනවශ්‍ය)සැකයන් ඇතිකොට සැඟවී යන දුර්ගුණ ඇති අයගේ හානියෙනුත් (ආරක‍ෂාව පතමි)
- එවන් දුර්ගුණ ඇත්තෝ ජින්වරුන් අතර ද සිටිති. මිනිසුන් අතර ද සිටිති.