19 - අල්කුර්ආනය පාරායනය කරමු 2
(සූරතුල් ෆීල්)
සූරතුල් ෆීල් මක්කාවේ පහළ වු වාක්‍ය 5 න් සමන්විත මක්කී සූරාවක් වන්නේ ය. නබිතුමා ඉපදුණු වර්ෂයේ සිදු වු ඉතා වැදගත් සිදුවීමක් සිහිපත් කරනා අයුරින් මෙම සූරාව සැකසී ඇත.
අබ්රහා රජු කඃබාවට ඊර්ෂ්‍යා කළේය. ජනතාව සමූහ වශයෙන් පැමිණ එය වන්දනාමාන කිරීම ඔහු ප්‍රිය නොකළේ ය. එබැවින් කඃබාවට වඩා අලංකාර සිද්ධස්ථානයක් නිර්මාණය කළේ ය. එය කෙරෙහි ජනයා ඒකරාශී කිරීමට නන් අයුරින් උත්සාහ කළේ ය. නමුත් කිසිවෙක් එහි නො ගියේ ය.
එනිසා අවසාන වශයෙන් කඃබාවට පහර දී විනාශ කිරීමට සැලසුම් කළේ ය. ඒ සඳහා ශක්තිමත් ඇත් සේනාවක් නිර්මාණය කොට කඃබාව විනාශ කිරීම පිණිස මක්කාවට යැවීය.
එනමුත් අල්ලාහ් තම දේවස්ථානය විනාශ කිරීම සඳහා පැමිණි අබ්රහාගේ ඇත් සේනාව කුඩා කුරුලූ රංචුවක් මගින් විනාශ කළේ ය. මෙම කුරුල්ලෝ කුඩා ගල් කැට ඇතුන් වෙත දැමුවෝ ය. එමගින් ඇත් සේනාවෝ දැවී විනාශ වූහ.
අල්ලාහ් අබ්රහා හා ඔහුගේ ඇත් සේනාව විනාශ කළේ ය. අල්ලාහ්ගේ ශක්තිය හා හැකියාවත්, කඃබාවේ පූජනීයත්වයත් මෙමගින් පෙන්නුම් කෙරේ. "ෆීල්" යන්නෙහි අරුත ඇතා වේ. නබිතුමා ඉපදුණු වසර (ආමුල් ෆීල්) "ඇත් වසර යනුවෙන් හඳුන්වනු ලබන්නේ මේ නිසා ය.
සූරාව හා එහි අර්ථය
අසීමිත කරුණාවන්ත, අපරිමිත සෙනෙහෙවන්ත අල්ලාහ්ගේ නාමයෙන් (ආරම්භ කරමි.)
- (නබිවරයාණෙනි! අබ්රහාගේ) ඇත් සේනාව ඔබගේ නාථයාණන් කෙලෙස (විනාශ) කළේ දැයි ඔබ (සිතා නොබැලූවෙහි ද?)
- ඔවුන්ගේ කුමන්ත්‍රණය ඔහු නාස්ති නොකළේ ද ?
- ඔහු ඔවුන් වෙත අබාබීල් කුරුල්ලන් සමූහ වශයෙන් එවනු ලැබී ය.
- (ගිනියම් වු) කුඩා ගල් කැට ඔවුන් වෙත හෙලනු ලැබී ය.
- එමගින්, ඔහු ඔවුන්ව කුරුල්ලන් කොටමින් කෑ කරල් බවට පත්කොට (විනාශ කළේය)