ගුරුවරිය :- අස්සලාමු අලෛකුම් වරහ්මතුල්ලාහි වබරකාතුහූ

ශිෂ්‍යාවෝ :- වඅලෛකුමුස්සලාම් වරහ්මතුල්ලාහි වබරකාතුහූ

ගුරුවරිය:- දරුවනි! අපි සියලු දෙනාම මුඃමින්වරු නේ ද? මුඃමින් කියන්නේ කාටද කියලා කියන්න පුළුවන් ඔයගොල්ලන්ගෙන් කොයි කෙනාට ද?

අර්වා :- ටීචර් මම දන්නවා. අපේ උම්මා මට කියා දීලා තියෙනවා. මම කියන්න ද?

ගුරුවරිය :- හොඳයි ටිකක් හයියෙන් කතා කරන්න අර්වා.

අර්වා :- ආමන්තුබිල්ලාහ්වල අඩංගු කරුණු විශ්වාස කරන අය මුඃමින් වෙනවා.

ගුරුවරිය :- අර්වා ඔබ හරි. බාරකල්ලාහු ලකි (අල්ලාහ් ඔබට බරකත් කරත්වා).

ළමයිනි! අර්වා කිව්වා වගේ ආමන්තුබිල්ලාහ් යන්නෙහි අඩංගු කරුණු හය සැකයෙන් තොරව විශ්වාස කරන්නා මුඃමින් වෙනවා. අද පාඩමේ දී අපි මෙම කරුණු හය ඇතුළත් මූලිකාංග තුනක් කෙටියෙන් සළකා බලමු.

අමානා :- ටීචර්, ඊමානයේ කරුණු හයෙන් කරුණු තුනක් ගැන අද විස්තරාත්මකව කියා දෙනවා එහෙම නේද?

ගුරුවරිය :- නෑ දුවේ! එම කරුණු හය මෙම කරුණු තුනෙහි ඇතුළත් වෙනවා. ඒවා තව්හීද්, රිසාලත් සහ මආද් ය.

සයිනබ්:- එම පද වල තේරුම් මොනවා ද?

ගුරුවරිය:- තව්හීද් කියන්නේ ඒකත්වය, රිසාලත් කියන්නේ දූතභාවයට, මආද් කියන්නේ නැවත නැගිටුවන කියාමා දිනයට ය.

ෂයිමා :- මේවායේ තේරුම තවත් විස්තර කරල කියල දෙන්න ගුරුතුමියනි

ගුරුතුමිය:- හොඳයි ෂයිමා අල්ලාහ් අපව මැව්වේ ය. ඔහු ඒකයාය. නැමදුමට හා උදව් පැතීමට සුදුස්සා ඔහු පමණි. ඔහු අසමසමය. ඔහුට සහායකයකු ද නොවේ. ඔහු කිසිදු අවශ්‍යතාවක් ඇත්තකු නොවේ. කිසිවක් හලාල් හෝ හරාම් බවට පත්කිරීම ඔහු සතු අයිතිය වන්නේ ය. කුසල් අකුසල් යන සියල්ල ලැබෙන්නේ ඔහුගෙන් ය. මෙලෙස විශ්වාස කිරීම තව්හීදය (ඒකත්වය) වන්නේ ය.

අර්වා :- තව්හීදයට විරුද්ධ පදය ෂිර්ක් කියල උම්මා අපට කියා දීල තියෙනවා. ඒකේ තේරුම සම කිරීම නේද ටීචර් ?

ගුරුතුමිය :- ඔව් ඒක හරි. ඒ නිසා තමයි, අල්ලාහ්ට තව දෙයක් සම කරන්නන්ට මුෂ්රික්වරු කියල හඳුන්වනු ලබන්නෙ. හොඳයි, අපි රිසාලත් හෙවත් දූත මෙහෙවර ගැන බලමු. මිනිසුන් මැවූ අල්ලාහ් ඔහු මෙලොව ජීවත් විය යුතු ආකාරය ගැනත් මග පෙන්වූයේ ය. අල්ලාහ්ගේ එම මගපෙන්විම ආගම් නම් වේ. මෙම ආගම් දේශනා කිරීම සඳහා අල්ලාහ් මිනිසුන් අතරින් යහපත් අය සහ සුදුසු අය තෝරා ගත්තේ ය. අපි "නබිවරු" යැයි හඳුන්වන්නේ ඔවුන් ය. ඔවුනතර සිටි විශේෂිත නබිවරු "රසූල්වරු" යැයි හඳුන්වනු ලබති.

දරුවනි! මලාඉකවරුන් අතරින් වැදගත්ම මලාඉකවරයා වන්නේ ජිබ්රීල් අලෛහිස්සලාම් තුමාය. අල්ලාහ් ආගම් සහ සුහුෆ් පහළ කළේ මෙතුමා හරහා ය. අපි "රිසාලත්" "දූත මෙහෙවර" යැයි හඳුන්වන්නේ මෙයයි.

අර්වා :- ගුරුතුමියනි, ජිබ්රීල් අලයිහිස්සලාම් තුමා නබිවරුන්ට වහී ගෙනෙන බව උම්මා කිව්වා. ඒකට නේ ද ඔබතුමිය රිසාලත් කිව්වේ ?

ගුරුතුමිය :- "මාෂා අල්ලාහ්" අර්වා ඔබ කිව්වා හරි. ඔබගේ උම්මා ඔබට හුඟාක් ආගමික කරුණු කියා දීලා තිබෙන බව පේනවා. දරුවනි, ඔබත් අර්වා වගේ ආගමික කරුණු දෙමව්පියන්ගෙන් අහල ඉගෙන ගන්නත්, පොත් පත් කියවා දැන ගන්නත් වෑයම් කළ යුතුයි. ආදරණීය දරුවනි! ඔබ එහෙම කරනවා නේ ද?

ශිෂ්‍යාවෝ :- ඉන්ෂා අල්ලාහ් ගුරුතුමියනි! අනිවාර්යයෙන් ම අපි එහෙම කරනවා.

ගුරුතුමිය :- දරුවනි! දැන් 'මආද්' යනුවෙන් කියන කියාමා දිනය පිළිබඳ විශ්වාසය ගැන බලමු. මරණයත් සමග මිනිස් ජීවිතය අවසන් වන්නේ නැත. කබ්ර් හි මිනිස්සු නැවත වාරයක් නැගිටවනු ලබති. ඔවුහු මුන්කර් -නකීර් යන මලාඉකාවරුන් විසින් ප්‍රශ්න කරනු ලබති. ප්‍රශ්න කිරීමෙන් පසුව කබ්ර් ජීවිතය ස්වර්ගයේ උයනක් ලෙස හෝ නිරයේ අගාධයක් ලෙසට පත්වේ.

ඉල්මා :- ගුරුතුමියනි! දෙවන සූර් පිඹීම සමග මිනිසුන් මහ්ෂර් පිටියේ දී රැස් කරනු ලබන බව රසානා ගුරුතුමිය කිව්වා. ඒ කබ්ර් ජීවිතයෙන් පසුව නේ ද?

ගුරුතුමිය :- ප්‍රථම සූර් පිඹීමත් සමග ලෝක විනාශය ආරම්භ වෙනවා. සියලූම ජීවිහු මැරී යනවා. නියමිත කාලයේ දී දෙවන සූර් පිඹීමත් සමග මළ අය පණ ලැබ නැගිටිති. ඔවුහූ මහ්ෂර් නම් පිටියේ රැස් කරනු ලබති. ඉන් පසු ප්‍රශ්න ඇසීම සිදුකෙරේ. පින් කළ අය ස්වර්ගයටත් පව් කළ අය නිරයටත් යවනු ලබති. මෙම කරුණු සියල්ලට ම මආද් යැයි කියන්නෙමු.

දැන් තව්හීද් රිසාලත් සහ මආද් යන පදවල අර්ථය ඔබට පැහැදිලිව දැන ගන්නට ලැබුණා.

ඉන්ෂා අල්ලාහ් ඊළඟ පාඩමෙන් හමුවෙමු.

ශිෂ්‍යාවෝ: ජසාකල්ලාහු හයිරන්