11 - සව්මය රකිමු
"විශ්වාසවන්තයනි! ඔබ දේව බැතිබිය ඇති අය බවට පත් වීම සඳහා ඔබට පෙර සිටි අයට සව්මය නියම කළාක් මෙන්, ඔබට ද සව්මය අනිවාර්ය කර ඇත" (2:183)
ඉහත සඳහන් අල් කුර්ආන් වැකිය මගින් සව්මය ඉස්ලාමයේ ප්‍රධාන යුතුකම්වලින් එකක් වන බව පැහැදිලි වන්නේ ය. ඉස්ලාමීය අවුරුදු ක්‍රමය අනුව නවවන මාසය වන රමළාන් මාසයේ දී මුස්ලිම්වරු ෆර්ල් වූ මෙම සව්මය රකිති. මෙම මාසයේ දී සව්මය රකින සෑම මුස්ලිම්වරයකු ම ෆජ්ර් උදාවන අවස්ථාවේ සිට ඉර බැස යන මොහොත තෙක් කිසිඳු ආහාරයක් හෝ පානයක් නො ගෙන සව්මය බිඳවන කාර්යයන්හි නොයෙදී තමාව පාලනය කරමින් සව්මය ඉටු කළ යුතු ය.
සව්මයේ ෆර්ලයන් දෙකකි.
- "අල්ලාහ් වෙනුවෙන් සව්මය ඉටු කරන්නෙමි" යන සිතුවිල්ල (නියියතය) සිතෙහි අදිඨන් කර ගැනීම.
- සහර් අවසන් වූ අවස්ථාවේ සිට සව්මය අවසන් වන්නාවූ එනම් ඉර බැස යන මොහොත තෙක් සව්මය බිඳවන කිසි දු කටයුත්තක නො යෙදී සිටීම.
නිසි වයසට එළෙඹි නිරෝගී මුස්ලිම්වරුන් සියල්ලන් ම සව්මය රැකීම අනිවාර්ය වන්නේ ය. එසේම සාධාරණ හේතුවක් නොමැති ව සව්මය නොරැක සිටීම ද වරදකි.
සව්මයේ ප්‍රධාන අරමුණ බිය බැතිකම තහවුරු කිරීම වුව ද එමගින් ශාරීරික සෞඛ්‍යය ළඟාකර ගැනීම, සිත සංවරකර ගැනීම, අසීරුතාවයන් විඳ දරා ගැනීම, සකසුරුවම, අන් අයගේ දුක වටහා ගැනීම, දුප්පතුන්ගේ කුසගින්න වටහා ගැනීම, සදකා දීම වැනි අවශ්‍යතා ද මනාව ඉටු කෙරේ. සව්මය රකින කාලය තුළ හලාල් වූ අනුමත දේවලින් වැළකී සිටීමට පුරුදු වීමෙන්, හරාම් වූ කරුණු ජීවිතය පුරාම වළක්වා ගැනීමේ චිත්ත ධෛර්යය ළඟා කරගැනීමේ පුහුණුව ලබා දෙන්නේ ය. මෙම මාසයේ දී දුආවන් පිළිගනු ලබන්නේ ය. ස්වර්ගය අලංකාර ලෙස සරසනු ලබන්නේ ය. නිරය වසනු ලබන්නේ ය. කලබල ඇතිකරන ෂෛතාන්වරුන් පාලනය කර දම්වැල් දමනු ලබන්නෝ ය.
එහෙයින් මෙම මාසයේ අප යහක්‍රියා කර යහඵල අත්කර ගැනීමට වෑයම් කළ යුතු ය. අප වෙනුවෙන්, අපගේ සමාජය වෙනුවෙන් හා අපගේ රට වෙනුවෙන් අල්ලාහ්ගෙන් දුආ කළ යුතුය. සහර් වේලාවේ දී තහජ්ජුද් සලාතය ඉටු කළ යුතුය. සව්මය නිමා කරන වේලෙහි සව්මයෙහි යෙදුන අසල් වැසියන්, යහළුවන් නෑදෑයින් අප සමග එකතු කරගත යුතුය. වැඩි වැඩියෙන් පුණ්‍ය කටයුතුවල යෙදිය යුතුය. මක්නිසා ද යත් මෙම මාසයේ දී සුළි සුළඟක් මෙන් නබිතුමා සදකා දීමෙහි නියැලූණු බව ඉස්ලාමිය ඉතිහාසය අපට පවසන්නේ ය.
රමළාන් මාසයේ "ලෛලතුල් කද්ර්" යැයි රාත්‍රියක් ඇත. එය මාස දහසකට වඩා උතුම් ය. අල් කුර්ආනය පහළ කරනු ලැබුවේ මෙම මාසයේ දී ය. එනිසා අප මෙම මාසයේ අල් කුර්ආනය වැඩි වැඩියෙන් පාරායනය කළ යුතු ය. එහි මාර්ගෝපදේශයන් වටහා ගෙන දායාදයන් වැඩි වැඩියෙන් ලබා ගැනීම කෙරෙහි යොමු විය යුතු ය.
තවද විශේෂයෙන් ම පාප ක්‍රියාවලින් වැළකී සිටිය යුතු ය. අනවශ්‍ය කතාබහෙන් හා අනවශ්‍ය රණ්ඩු දබරවල පැටලී අපගේ සව්මයේ අගය අඩු කරගැනීමෙන් වැළකී සිටිය යුතුයි. කවරකු හෝ බැන වදින්නේ නම් හෝ ගැටුමට සැරසුණේ "නම් මම සව්මය රකින්නෙක්මි" යැයි කියමින් ඉවත් ව සිටිය යුතු බව ඉස්ලාමය අවධාරණය කරයි.
"කවුරු අසභ්‍ය වචනවලින් හා ඒ හා සම්බන්ධ ක්‍රියාවලින් වැළකී නොසිටී ද එවැන්නකු නොකා නොබී සිටීමෙන් අල්ලාහ්ට කිසිදු අවශ්‍යතාවක් නැතැයි" නබි සල්ලල්ලාහු අලෛහි වසල්ලම් තුමා වදාරා ඇත. (බුහාරි)
සව්මය පළිහකැයි නබි සල්ලල්ලාහු අලෛහි වසල්ලම් තුමා වදාළ පරිදි පාපී ක්‍රියාවලින් වැළකී සිටීමටත්, ෂෛතාන්ගේ පෙළඹ වීම් නිසා ඇති වන හානිවලින් ආරක‍ෂා වීමටත් මෙම පළිහ අපට උදව් වන්නේ ය. මෙසේ දෙලොවෙහි ම අපරිමිත ප්‍රයෝජනයක් ලබා දෙන ෆර්ල් වූ සව්මය මෙන් ම සුන්නත් වූ සව්මය ද රැකීම වැදගත් ය. මක් නිසා ද යත් අපගේ ෆර්ල් වූ සව්ම්වල ඇති වන අඩුපාඩුකම් එමගින් පූරණය කරන අතර අල්ලාහ් සමග ඇති අපගේ සමීපතාවයද වැඩි වන්නේ ය.