මුහම්මද් සල්ලල්ලාහු අලෛහි වසල්ලම් තුමාගේ උපත හා තරුණ විය

නබි සල්ලල්ලාහු අලෛහි වසල්ලම් තුමාණන් ඉපදීමට දින කිහිපයකට පෙර යෙමන් දේශයේ රජු වන 'අබ්රහා' විශාල සේනාවක් සමග කඃබාවට පහර දීම සඳහා පැමිණියේ ය. නමුත් අල්ලාහු තආලා අබාබීල් නමැති කුඩා පක‍ෂීන් මගින් එම සේනාව විනාශ කළේ ය. මෙම විශ්මිත සිදුවීම සිදු වූ වර්ෂය "ඇත් වසර" (ආමුල් ෆීල්- නම් වේ. මෙම වසරේ රබීඋල් අව්වල් මස සඳු දින හිමිදිරි උදෑසන නබිතුමාණෝ ඉපදුණාහ. මෙය ක්‍රි.ව. 571 වන වසර ලෙස ගණනය කොට ඇත. නබි සල්ලල්ලාහු අලෛහි වසල්ලම් තුමා ගේ පියා ගේ නම අබ්දුල්ලාහ් ය. මවගේ නම ආමිනා ය.

නබි සල්ලල්ලාහු අලෛහි වසල්ලම් තුමා ඉපදීමට පෙර එතුමාගේ පියා මරණයට පත් වූහ. පසුව අරාබිවරුන්ගේ සිරිතට අනුකූල ව කිරි දී හදා වඩා ගැනීම සඳහා හලීමතුස් සඃදියියා නමැති ගැමි කාන්තාවට භාර දෙන ලදි. වසර 4ක් පමණ හලිමා තුමියගේ රැකවරණය යටතේ හැදී දැඩි වී පසු ව එතුමා මව වූ ආමිනාට භාරදෙනු ලැබූහ.

නබි සල්ලල්ලාහු අලෛහි වසල්ලම් තුමා තම මව සමග වයස අවුරුදු 6 දී ඥාතීන් හමුවීම සඳහා යත්රිබයට ගියේ ය. එහි සිට මක්කාවට එන අතරතුර අෆ්රා නමැති ස්ථානයේ දී තම මව වෆාත් වූවා ය. අනතුරුව සීයා වන අබ්දුල් මුත්තලිබ් විසින් කුඩා මුහම්මද්ට රැකවරණය දෙන ලදී. වයස අටේ දී සීයා අබ්දුල් මුත්තලිබ් ද මරණයට පත් විය. ඉන්පසුව එතුමා මහප්පා වූ අබුතාලිබ්ගේ රැකවරණයට පත් විය.

අබුතාලිබ් දුප්පතෙකු වුවත් කුඩා මුහම්මද්ට තම දරුවන්ට වඩා සෙනෙහසත් රැකවරණයත් ලබා දුන්නේ ය. ඥාති සොහොයුරන් සමග එක්ව නබි සල්ලල්ලාහු අලෛහි වසල්ලම් තුමා අබුතාලිබ් ගේ එළුවන් රැක බලා ගත්තේ ය.

එතුමා තම 12වන වියේ දී මහප්පා වු අබුතාලිබ් සමග සිරියාවට වෙළඳාමේ ගියේ ය. දකුණු සිරියාව ආසන්නයේ "බුස්රා" නමැති ස්ථානයේ ක්‍රිස්තියානි පූජකවරයෙකු වු "බුහයිරා" නමැත්තාට නුබුව්වතයේ ලක‍ෂණ කුඩා මුහම්මද් ගෙන් දිස් විය. එබැවින් එම පූජක තුමා කුඩා මුහම්මද් ව පිළිගෙන ගරු බුහුමන් දක්වා සංග්‍රහ කළේ ය. යුදෙව්වන් ගෙන් මෙම දරුවාට අනතුරු සිදුවිය හැකි බවට අවවාද කොට ඔහුව නැවතත් මක්කාවට රැගෙන යන ලෙස ඔහු අබුතාලිබ්ට දැන්වූයේ ය.

නබි සල්ලල්ලාහු අලෛහි වසල්ලම් තුමාණන් ඉපදී හැදී වැඩුණු අරාබියාවේ එදා ජීවත් වු මිනිස්සු අඥානයේ ගිලී සිටියහ. ඔවුහු මත්පැන් පානය කිරීම, සූදු කෙළීම, මංකොල්ල කෑම, පලිගැනීම වැනි අකුසල්වල නොඅඩු ව යෙදුණහ. ඔවුහු ගස්, ඉර, හඳ, තාරකා, ගින්දර ආදී අල්ලාහ්ගේ මැවීම් වන්දනාමාන කළහ.

ක්‍රමවත් පවුල් දිවියක් හෝ සමාජ ක්‍රමයක් එහි දක්නට නොවී ය. කාන්තාවන්ට ම්ලේච්ඡ ලෙස සලකන ලදි. ජනයා ගෝත්‍ර වශයෙන් බෙදී වෙන්වී සිටියහ. සුළු කාරණාවක් හේතු කොට ගෙන වුව ද එම ගෝත්‍ර අතර සටන් ඇති විය.
බහුතර ජනයා ලිවීමට හෝ කියවීමට නොදත් "උම්මි" වරු වූහ. මෙවැනි ලක‍ෂණයන්ගෙන් සමන්විත වූ එදා අරාබියේ සමාජ තත්ත්වය "අයියාමුල් ජාහිලියියා" හෙවත් අඥානයේ යුගය ලෙස නම් කෙරේ.

අයහපත් පරිසරයක් පවැති මක්කාවේ ජීවත් වු කුඩා මුහම්මද් කුඩා කල සිට ම යහගුණ පිරි අයෙක් වූයේ ය. කිසිදු කෙනෙකුට හෝ කිසිදු ජීවියෙකුට හෝ වද හිංසා නොකළේ ය. එදා අරාබිවරුන් විසින් කරන ලද පාපී ක්‍රියාවන්,
විනෝද ක්‍රියා හා නාස්තිකාරි ක්‍රිඩාවන් යනාදී කිසිවක එතුමා නිරත නොවි ය. පිළිම වන්දනය පිළිකුල් කළ එතුමා අන් අයට ආදර්ශවත්, යහගුණයන් ගෙන් පිරිපුන් ව ජීවත් විය.

මුහම්මද් බොරු කීමෙන් වැළකී සිටියේ ය. ඔහු සැමවිටම සත්‍යය කතා කළේ ය. මෙනිසා ඔහු "අස්සාදික්" "සත්‍යවන්තයා" යන නම් ලද්දේ ය. කිසිවෙකුටත් ද්‍රෝහිකම් නොකළ එතුමා අවංක ව හා විශ්වාසවන්ත ව කටයුතු කළේ ය. මේ නිසා එතුමාණෝ "අල්අමීන්" "විශ්වාසවන්තයා" යනුවෙන් ද අමතනු ලැබූහ.

තරුණවිය

තරුණ වියේ දී මුහම්මද් සල්ලල්ලාහු අලෛහි වසල්ලම් තුමාණෝ මඩෙහි පිපුණු නෙළුමක් බඳු වූහ. එතුමාණෝ තම වටපිටාව තුළ කිසිවිටෙකත් අලසව කල් නොගෙවූහ. දහවල් කාලය වෙහෙස වී ඉපැයීම් සඳහා ගත කළ එතුමාණෝ
රාත්‍රි කාලයේ තම සමාජය පිළිබඳ ව මෙනෙහි කරමින් කාලය ගත කළහ. එතුමා එදා සමාජයේ දක්නට තිබූ වැරදි ක්‍රියාවන්ට යොමු වී නොමග ගියේ නැත. එතුමා සියල්ලන් විසින්ම කරුණාවෙන් හා ගෞරවයෙන් සලකනු ලැබීය.

හර්බුල් ෆුජ්ජාර් සහ හිල්ෆුල් ෆුලුල් බිහිවීම

අරාබියේ ජනයා ගෝත්‍ර වශයෙන් බෙදී ජීවත් වූහ. මෙම ගෝත්‍රිකයන් අතර තරඟකාරිත්වය, ඊර්ෂ්‍යාව, ක්‍රෝධය, වංචාව යනාදිය පැවති‚. සුළු කරුණක් මුල්කරගෙන වසර ගණනාවක් තිස්සේ සටන් කළෝ ය. සතුරන් ගෙන් පළිගැනීමේ දී දයානුකම්පාවෙන් තොරව කටයුතු කළෝ ය. මෙලෙස වසර ගණනාවක් ම මක්කාවේ හර්බුල් ෆුජ්ජාර් නම් සටන පැවතිණි. මෙම සටන් නිසා මක්කා වැසියන් ගේ ජන ජීවිතයට හා සම්පත්වලට බලවත් හානි සිදු විය.

මේ පිළිබඳ ව අවබෝධ කරගත් යහපත් ආකල්ප වලින් යුත් නායකයෝ මක්කාව යළි ගොඩනැගීම සඳහා සැළසුම් සකස් කළහ. අර්ථ විරහිත සටන් යළි ඇති නොවීම සහතික කිරීම සඳහා සමාජ ශුභසාධන සැලසුමක් ගොඩ නැගූහ. එය "හිල්ෆුල් ෆුලුල්" යනුවෙන් ඉතිහාසගත විය. අසාධාරණ සටන්වලට සහභාගී වීමෙන් වැළකී සිටි නබි සල්ලල්ලාහු අ‍ලෛහි වසල්ලම් තුමාණෝ සටනින් අනතුරුව ගොඩනැගුණු සමාජ ශුභසාධන සැලසුම්වලට උද්යෝගයෙන් යුතුව සහභාගී වූහ.

විවාහය

නබි සල්ලල්ලාහු අලෛහි වසල්ලම් තුමා තම තරුණ වියේ දී වෙළෙඳ කටයුතු වල නිරත විය. විශ්වාසවන්ත සත්‍යවාදී අවංකභාවයෙන් යුත් වෙළෙන්ඳකු වූ එතුමා කදීජා නමැති කාන්තාවගේ ව්‍යාපාරයේ කොටස්කරුවෙක් වූයේ ය. අවංක ව කටයුතු කළ එතුමා අධික ලෙස ලාභ ලැබී ය. නබිතුමාගේ යහ ගුණාංගයන් ගෙන් ආකර්ෂණය වූ කදීජා තුමිය එතුමා ව විවාහ කර ගැනීමට කැමති වූවා ය. පවුලේ කැමැත්ත ඇතිව විවාහය සිදු කරන ලදී. එවිට නබි සල්ලල්ලාහු අලෛහි වසල්ලම් තුමාගේ වයස අවුරුදු 25ක් වූ අතර, කදීජා තුමියගේ වයස අවුරුදු 40ක් විය.

කඃබා ප්‍රතිසංස්කරණය

නබි සල්ලල්ලාහු අලෛහි වසල්ලම් තුමාට වයස අවුරුදු 35 දී කඃබා ප්‍රතිසංස්කරණ ක්‍රියාවලිය සිදු විය. එවිට ස්වර්ගයෙන් පහළ වූ හජරුල් අස්වද් ගල තැන්පත් කිරීම සම්බන‍ධයෙන් ගෝත්‍රික නායකයන් අතර මතභේද ඇති විය. නැවතී තිබූ ගෝත්‍රික සටන් නැවත ඇති වේදෝ යි බියක් පැතිරිණි.

එය වළකාගත යුතුය යන පොදු සම්මතයකට කුරෛෂිවරු එළඹූ හ. එනම් කවරෙකු මුලින් කඃබාවට පැමිණේ ද ඔහුගේ අදහසට අනුව කටයුතු කරමු යන පොදු එකඟතාවයට පැමිණියෝ ය. පසුදින සියලූ දෙනා බලා සිටි එම පුද්ගලයා කඃබාවට ආවේ ය. ඒ මුහම්මද් නම් තරුණයා ය.

මක්කාවේ අති යහපත්ම පුද්ගලයා පැමිණි බව පවසා ගෝත්‍රික නායකයෝ සතුටින් ඉපිලූණා හ. යුක්ති සහගත අපක‍ෂපාතී තීන්දුවක් ලැබේ යයි විශ්වාස කළහ. ඔවුන් අපේක‍ෂා කළ අයුරින් මුහම්මද් සල්ලල්ලාහු අලෛහි වසල්ලම් තුමාණෝ තීන්දුවක් ඉදිරිපත් කළහ. එම ගල එක් සළුවක් මත තබා ගෝත්‍රික නායකයින්ට එම සළුවේ කොන්වලින් අල්ලා එසවීමට සැලැස්විය. එලෙස ඔවුන් විසින් ඔසවන ලදී. ගල තැන්පත් කළ යුතු ස්ථානයට පැමිණි විට මුහම්මද් සල්ලල්ලාහු අලෛහි වසල්ලම් තුමාණන් විසින් සළුව මත තිබු ගල අදාළ ස්ථානයේ තැන්පත් කරනු ලැබීය. මෙම බුද්ධිමත් තීරණය මක්කා ව නොසන්සුන්තාවයෙන් ආරක්ෂා කළේ ය.