5 - විවිධාකාර දේව මැවිල්ල
මෙම විරිඳු පෙළ තාලයට ගායනා කරන්න.
නුඹලා දරු සම්පත් ලැබ - පොළෝ තලය යටතට ගෙන
බලය පවත්වන්න කියා - දෙවි සමිඳුන් පැවසු සේක//
බීජ සහිත ධාන්‍ය ඵල - දරනා සැම ගස් පැළෑටි
නුඹලාගේ අහර පිණිස - වේවා පැවසූ දෙවිඳුන්//
ඒදන්හී උයන තනා - මිනිසා එහි පදිංචි කර
වගා කරලා රැක බලන්න - දෙවි සමිඳුන් භාර කළා//
දෙවිඳු මැව්ව සැම දේට ම - වඩා උතුම් මිනිස් දිවිය
ගුණ දහමින් පිරිලා අපි - ගරුසරු දක්වා සුරකිමු //
කුරුලූ රෑන් සමනළයින් - මාළු පැටව් සියලූ සතුන්
ලෝකය ලස්සන කරනවා - තුති දෙමු සැමදා රැකගමු//
ජලයෙන් විදුලිය ලබනවා - මුහුදු වතුර ලූණු හදනවා
ගස් පැළෑටි බෙහෙත් දෙනවා - දෙව් ආසිරි අප ලබනවා//
ඇළ දොළ ගංඟා දිය ඇලි - අප කෙත් වතු සරු කරනවා
නෑම බීම සඳහා ගන්න - පිරිසිදු බව රැක ගතයුතු//
නොදිරන දෑ ඈත් කරමු - දිරනා කුණු එකට ගනිමු
පොහොර සදා පස සරු කර - වගා වැඩට සහයක් දෙමු//
ගස් සිටවා මල් හදලා - එළවළු පලතුරු වවලා
පාසල නිවස ද පල්ලිය - හරි ලස්සන තැනක් කරමු//
අයියා අක්කා නංගී මල්ලී - මව්පියො අපි සැම එක් වෙමු
පරිසර හිතකාමි වෙමින් - ලෝකය ලස්සන කරවමු//
ආදම් සහ ඒවට දෙවියන් වහන්සේ පවසන්නේ කුමක් දැයි බලමු.
දෙවියන් වහන්සේ මිනිසාට ආදරය නිසා, ඔවුන් වහන්සේ මිනිසාට පැවරූ වගකීම් කිහිපයක් ඉහත ශුද්ධ ලියවිලි පාඨවලින් ඉදිරිපත් කරයි. ඒවා නම්;
- දරු සම්පත් ලැබීමට
- පොළොව පුරා පැතිර යාමට
- මාළුන්, කුරුල්ලන්, සියලූ සතුන් යනාදිය පාලනය කිරීම හෙවත් රැක බලා ගනිමින්, වර්ධනය කරමින්, මානව අවශ්‍යතා සඳහා යොදා ගැනීමට
- පොළොව වගා කිරීමට
- වගාවෙන් ලැබෙන අස්වැන්න ප්‍රයෝජනයට ගැනීමට.
දෙවියන් වහන්සේ මිනිසාට මේ ලෝකය භාර දුන්නේ, මැවිල්ල වර්ධනය කර ඉන් නිසි ප්‍රයෝජන ගැනීම සඳහා ය. එය අපගේ වගකීම යි. දේව මැවිල්ල ආරක්ෂා කිරීම මිනිසා සතු වගකීමකි. එහෙත් අද මිනිසා මැවිල්ල ආරක්ෂා කිරීමට අපොහොසත් වී ඇත.
උදාහරණ :- පරිසර දූෂණය, වනාන්තර විනාශය, පොලිතින් භාවිතය, කැලි කසළ ක්‍රමවත් ව බැහැර නොකිරීම, වායු දූෂණය, ජල දූෂණය
සම්පත් සංරක්ෂණය කිරීම හා වැඩි දියුණු කිරීම අත්‍යවශ්‍ය ය. එම නිසා දේව මැවිල්ල සුරැකීමට අවැසි පියවර ගැනීමට උනන්දුවෙන් කටයුතු කරමු. විවිධාකාර දේව මැවිලි අපට ලබා දුන් දෙවියන් වහන්සේට තුති ප්‍රශංසා කරමු.