අක්කා - ඔයා දන්නවාද මල්ලී, ලෝකයේ වැඩි ම භාෂා ගණනකට පරිවර්තනය කරලා තියෙන පොත මොකක් ද කියලා?

මල්ලී - අපොයි! ඔව්, බයිබලයනේ.

අක්කා - හා! හා! එහෙම කියන්න එපා. බයිබලය කියන්නේ ශුද්ධ ග්‍රන්ථයක්. එය කිතුනු අපේ පූජනීය ග්‍රන්ථය යි. අපි එයට කියන්න ඕනේ ශුද්ධ බයිබලය කියල. එහි දේව වචනය අඩංගු වෙලා තියනවා. එම නිසා අපි ශුද්ධ බයිබලය ගෞරවාන්විත ව තැන්පත් කරන්නත් පරිහරණය කරන්නත් ඕනේ; ඒ වගේ ම අත් දෙකෙන් ම අරගෙන දෙන්නත් පුරුදු වෙන්න ඕනේ.

මල්ලී - එතකොට ශුද්ධ බයිබලය පොත් රාක්කේ තියන්නේ නැද්ද අක්කේ?

අක්කා - ඔව් මල්ලී, අපි වෙනත් පොතක්වත් ශුද්ධ බයිබලය උඩ තියන්න හොඳ නැහැ. වෙන ම තැනක, පිරිසිදු ව මල් තියලා, පහනක් තියලා, තියන්න ඕනේ. අපිත් එහෙම කරමු.

මල්ලී - ශුද්ධ බයිබලය මෙච්චර ලොකු පොතක් වුණේ කොහොමද අක්කේ?

අක්කා - ශුද්ධ බයිබලයේ ගැලවීමේ ඉතිහාසය පිළිබඳ ව තොරතුරු ඇතුළත් වෙනවා. එය හරියට පුස්තකාලයක් වගේ මල්ලි; එහි පොත් 73ක් තියනවා. එය පැරණි ගිවිසුම හා නව ගිවිසුම යනුවෙන් ප්‍රධාන කොටස් දෙකකට බෙදන්නත් පුළුවන්.

මල්ලී - ඇයි අක්කේ, එහෙම කොටස් දෙකක් තියෙන්නේ?

අක්කා - පුරාණ ගිවිසුමේ ක්‍රිස්තුන් වහන්සේ ඉපදීමට පෙර යුගය ගැන විස්තර තියනවා. නව ගිවිසුමේ සඳහන් වන්නේ ක්‍රිස්තුන් වහන්සේ හා මුල් සභාව පිළිබඳ ව යි. දෙවියන් වහන්සේ ඓතිහාසික සිදුවීම් ආදිපිතෘවරුන් හා දිවැසිවරුන් මගින් අනාවරණය කළ ආකාරය පැරණි ගිවිසුමේ අන්තර්ගත වෙනවා. එහි පොත් 46ක් තිබෙනවා. නව ගිවිසුමේ සඳහන් වන්නේ, ක්‍රිස්තුන් වහන්සේ තුළින් දෙවියන් වහන්සේගේ අනාවරණයේ පූර්ණත්වය සිදු වූ ආකාරය යි. ඔවුන් වහන්සේ කරණ කොට ගෙන මිනිස් සංහතියට ම ගැලවීම උදා වූ ආකාරයත් එහි ඇතුළත් වෙනවා. නව ගිවිසුමේ පොත් 27ක් ඇතුළත් වෙනවා. එය අවුරුදු 1000කටත් වැඩි කාලයක් තුළ කතුවරුන් ගණනාවකගේ දායකත්වයෙන් ලියා තියනවා.

මල්ලී - එතකොට ශුද්ධ බයිබලය බොහොම වටිනා පොතක් නේද?

අක්කා - ඔව්, කිතුනු අපගේ ජීවිතයේ විශ්වාසයේ හා බලාපොරොත්තුවේ පදනම වන්නේ ශුද්ධ බයිබලය යි. ඒ නිසා සැම කිතුනු නිවසක ම ශුද්ධ බයිබලය තියෙන්න ඕනේ.