4 - අසිරිමත් කිතු උපත
ගාබ්‍රියෙල් දේව දූතයා
ගාබ්‍රියෙල් දේව දූතයා දෙවියන් වහන්සේට සේවය කරන, සුබ ආරංචි ගෙනෙන දූතයා සේ හඳුන්වනු ලැබේ. ජේසුස් වහන්සේගේ උපත සඳහා මරියතුමිය ව තෝරා ගත් බව එතුමියට දැනුම් දුන්නේ ගාබ්‍රියෙල් දේව දූතයා ය. ළදරුවාගේ නම ජේසුස් විය යුතු බව ද එතුමාණෝ මිදුම්කරුවාණෝ බව ද දේව දූතයා විසින් ප්‍රකාශ කරන ලදි. (ශු. මතෙව් 1:21) දේව දූතයකු මෙම උපත දැනුම් දීම තුළින් ම උපතේ සුවිශේෂී බව ප්‍රකාශ වෙයි. ජේසුස් වහන්සේගේ උත්පත්තිය සම්බන්ධ ව එඬේරුන්ට දැනුම් දීම කරනු ලැබූයේ දේව දූත සමූහයක් මගිනි. මෙයින් ද අපට පෙනෙන්නේ ජේසුස් වහන්සේගේ උපතේ ඇති සුවිශේෂී භාවය යි.
මරියතුමිය හා ජෝසෙප්තුමා
ගාබ්‍රියෙල් දේව දූතයා දැනුම් දුන් ලෙස ජේසුස් වහන්සේගේ උපත සඳහා තමන් ව තෝරා ගත් බව ඇසූ කළ මරියතුමිය බියවූවාය. කැළඹුණා ය. නමුත් එතුමිය දේව කැමැත්තට එකඟ වෙමින් නිහතමානී ව යටත් වූවා ය.
ජෝසෙප්තුමා මෙම සුවිශේෂි දරු උපත සඳහා දේව අණට කීකරු වෙමින් මරියතුමිය රැකබලා ගත් බව පැහැදිලි ය.
එඬේරුන්
ජේසුස් වහන්සේගේ උපත දේව දූතයන් මුලින් ම දැනුම් දෙනු ලැබුවේ එඬේරුන්ට ය. එය විශේෂ කරුණක් වන්නේ ප්‍රථමයෙන් එම උපත පිළිබඳ ශුභාරංචිය එකළ සමාජයේ පිළිගැනිමට ලක් නොකළ දුප්පත් එඬේරුන්ට දැනුම් දුන් බැවිනි. පණිවුඩය ලද විගස ම ඔවුහු ඊට ප්‍රතිචාර දක්වමින් බෙත්ලෙහෙමට පැමිණ බිළිඳු ජේසුස් වහන්සේ මරියතුමිය හා ජෝසෙප්තුමා බැහැදැක නමස්කාර කළ හ. මෙම සුවිශේෂී බිළිඳා ඔවුහු දුටු හ. ඉන් අපට මෙම උපතේ සුවිශේෂි භාවය වඩා දැකිය හැකි ය.
ශාස්ත්‍රවන්තයින්ට මග පෙන්වූ විශේෂ තාරකාව
ජේසුස් වහන්සේගේ උපතේ සුවිශේෂී බව ශ්‍රාස්ත්‍රවන්තයින් විසින් වටහා ගනු ලැබුවේ අහසේ පෑවූ තාරකාව මගිනි.
මෙම තාරකාව ඔවුන්ට බෙත්ලෙහෙම කරා ගමන් කිරීමට මග පෙන්වා තිබේ. මොවුහු රත්තරන්, තුවරලා හා ගන්ධරස පුදා ජේසු බිළිඳාණන්ට නමස්කාර කළහ. ශාස්ත්‍රවන්තයන්ගේ නමස්කාරයත් මග පෙන්වූ තාරකාවත් ජේසුස් වහන්සේගේ උපතේ සුවිශේෂී භාවය සඳහා තවත් සාක්ෂ්‍ය වේ.
ගව ඔරුව
ජේසුස් වහන්සේ නිසි ලෙස හඳුනා ගැනීමට දේව දූතයින් දුන් ලකුණ වූයේ "රෙදි වලින් ඔතා ගවයින් කන ඔරුවක බාවා ඇති බිළිඳකු" යන්න යි.
මෙය ඉතා වැදගත් වන්නේ දේව පුත්‍රයා දිළිඳු දරුවකු ලෙස ඉපදීමත් බෙත්ලෙහෙම් නගරයේ නවාතැන් පලක් නොලැබී, ගව මඩුවක උපත ලබන්නට සිදුවීමත් ය.
ජේසුස් වහන්සේගේ උත්පත්තිය පිළිබඳ සිද්ධීන් අතර දේව දූතයන් ගැයූ ගීතිකාව උතුම් අර්ථයක් ප්‍රකාශ කරයි.
මෙලෙස ජේසුස් වහන්සේගේ උපතේ සුවිශේෂී බව වටහා ගනිමින් අප ද අපගේ ප්‍රතිචාරය දැක්විය යුතු ය. දේව දූතයින් ගැයූ ලෙසට උන්වහන්සේගේ උපත මුළු ලෝකයටම සාමය ගෙන දෙන උපතක් ලෙසට හඳුන්වා දිය හැකි ය. දෙවියන් වහන්සේ හා මිනිසා අතරත් මිනිසා හා මිනිසා අතරත් අසමගිය දුරු කරන්නටත් බිඳුණු සබඳතා ගොඩ නගන්නටත් ජේසුස් වහන්සේගේ උපතින් හැකි විය. එතුමා සාමයේ කුමාරයා සේ හඳුන්වනු ලබයි. සාමය නොමැති හදවත්වලට සාමයත් කොන් කරනු ලැබූ, පීඩාවට ලක් කරනු ලැබූ අයගේ ජීවිතවලට බලාපොරොත්තුවත් ජේසුස් වහන්සේ ගෙන ආ සේක. එදා එතුමන් උපත ලැබූ ජන සමාජයට සාමය ලැබුණේ යම් සේ ද අද සමාජයට ද ජේසුස් වහන්සේගේ උපත තුළින් සාමයේ පණිවුඩය ගෙන එනු ලබයි.
