මේ පොරොන්දුව ඉටු වූ බව ඔබ දන්නවා ද ?

ජේසුස් වහන්සේ පැවසූ ලෙස ම ස්වර්ගාරෝහණයෙන් දින දහයකට පසු ජුදෙව්වන්ගේ පෙන්තකොස්ත මංගල්‍ය දවසේ ශ්‍රාවකයෝ ශුද්ධාත්ම බලය ලැබූ හ . ඒ මොහොතේ පටන් දේව සැලැස්ම අනුව ශුභාරංචිය ප්‍රකාශ කරමින්, ඔවුහූ බලවත් ව ජේසුස් වහන්සේ වෙනුවෙන් සාක්ෂි දැරූ හ.

මෙම ශුභාරංචි පණිවුඩය සමාරිය කරා ගෙන ගිය ආකාරය මෙම පාඩමෙන් අපි විමසා බලන්නෙමු. ඒ බාරදූර සේවයට පිලිප් තුමා දායක වූ අන්දම ලිපිය කියවීමෙන් අපට වැටහෙනු ඇත.

දයාබර සහෝදරයා /සහෝදරිය,

මම ග්‍රීක බස කතා කරන ජුදෙව්වෙක්. මා ජේසුස් වහන්සේගේ අනුගාමිකයෙක් ව සිටියා. උන්වහන්සේ ස්වර්ගයට ඔසවා ගනු ලැබ දින දහයකට පසු ගෝල පිරිස ඇතුළු අනුගාමිකයන් උඩුමහලක යාච්ඤා කරමින් සිටිය දී ශුද්ධාත්ම බලයෙන් ශක්තිමත් කරනු ලැබුවා . උන්වහන්සේ වදාළ ලෙස අපි සියළු දෙනා ම ශුභ අස්න පිළිගැන්වීමට නිර්භීත ව උනන්දු ආත්මයෙන් ක්‍රියා කළා. ජෙරුසලම් සභාවේ නායකයා වූයේ සීමොන් පේදුරුතුමා ය. ග්‍රීක බස කථා කළ ජුදෙව්වන්ගේ වැන්දඹුවන්ට, යුතු ලෙස සහනාධාර බෙදා දෙන්නට උපස්ථායකයන් සත් දෙනකු මුල් සභාව විසින් තෝරා පත් කළා. ඒ අවස්ථාවේ ඔවුන් අතර මා ද උපස්ථායකයකු ලෙස තේරී පත් වුණා.

ස්තේපන් තුමා අපගේ මූලිකයා වුණා. එතුමා ඉතා ම බලවත් ලෙස ක්‍රිස්තුස් වහන්සේ ගැන දේශනා කළ නිසා, ඇතැම් ජුදෙව්වරු ඊර්ෂ්‍යාවෙන් එතුමාට ගල් ගසා මරණයට පත් කළා. මෙම මරණයට පසු, අනුගාමිකයෝ බොහෝ දෙනෙක් ශුභාරංචිය රැගෙන විවිධ පළාත් කරා විසිර ගියා. ඔවුන් ඒ ඒ ප්‍රදේශවල ශුභාරංචිය ප්‍රකාශ කළා . ශුද්ධාත්මයාණන් වහන්සේ මා ගෙන ගියේ සමාරියට යි . ජුදෙව් හා සමාරිය ජනතාව අතර මිත්‍රත්වයක් තිබුණේ නැහැ. මා ජුදෙව්වකු වුවත්, ආත්මයාණන් වහන්සේ මා බලවත් කර සමාරියේ සේවයට යොමු කළා.

අන්‍ය ජාතීන් ලෙස සළකනු ලැබූ සමාරිත ජනතාව, ක්‍රිස්තුස් වහන්සේගේ ශුභාරංචිය, විශ්වාසයෙන් පිළිගත්තා. රෝගීන්, කොරුන්, අංශභාග රෝගින් සුවය ලැබුවා. අශුද්ධාත්ම පවා දුරු කීරිමට ශුද්ධාත්මයාණන් වහන්සේ මට උපකාර කළා. අදහා ගත් සියල්ලෝ ම බෞතීස්මය ලැබුවා. සමාරියේ නුවර මහත් ප්‍රීතියක් ඇති වුණා. පේදුරුතුමා හා ජොහාන්තුමා සමාරියට පැමිණ, අදහා ගත් අය වෙනුවෙන් යාච්ඤා කළ විට ඒ අය ශුද්ධාත්මය අත්දැක්කා.

ඉන්පසු ස්වාමින්වහන්සේගේ දූතයෙක් මට කථා කර "දකුණු දෙස ජෙරුසලමේ සිට ගාසාවට බසින පාරට යන්න." යි පැවසුවා. මා දූත හඬට කීකරු ව එම පාරට ගියා.

පුදුමයක් ! පාළු පාරක, රථයක වාඩි වී ගමන් ගත් පුද්ගලයකු මා දුටුවා. එම රථය අසලට යන්නට ශුද්ධාත්මයාණන් වහන්සේ මට මග පෙන්වූවා. ඔහු රථය තුළ හඬ නගා පොතක් කියවමින් සිටියා.

මෙන්න බලන්න ඔහු කියැවූ යෙසායා ග්‍රන්ථයේ ශුද්ධ ලියවිලි

මේ වචන ඇසුණු විට, ඔහු හා කථා කරන්නට ශුද්ධාත්මයාණන් වහන්සේ මට මග පෙන්වූවා. මා රථය ළඟට ම දුව ගොස් ඔහු කියවන දේ තේරෙනවා දැයි ඇසුවා. ඔහුගේ පිළිතුර වුණේ "යමෙක් මග පෙන්නුවොත් මිස මට තේරුම් ගත හැක්කේ කෙසේ ද "යන්න යි.

රථයට නැගී හිඳගන්නට ඔහු මගෙන් ඉල්ලා සිටියා. ශුද්ධාත්ම මඟ පෙන්වීම අනුව, ඒ ආරාධනාව පිළිගත් මා, ඔහු ළඟින් ම හිඳ ගත්තා. ඔහුට නොතේරෙන ශුද්ධ ලියවිල්ල පහදා දුන්නා. එහි සඳහන් වූයේ දුක් උසුලන සේවකයා ගැන අනාවැකිය යි. එය ජේසුස් වහන්සේගේ දුක්විදීම, මරණය උත්ථානය, තුළින් සම්පූර්ණ වුණා. ඒ සියල්ල මා ඔහුට පැහැදිලි කළ විට, ශුද්ධ ලියවිලි පාඨය වටහා ගෙන පිළිගත්තා. රථය ගමන් කරද්දි ම අසළ ජලය තිබූ ස්ථානයක් දුටු ඔහු බෞතීස්ම කරන ලෙස මගෙන් ඉල්ලා සිටියා. "ඔබ ජේසුස් වහන්සේ අදහන්නෙහි ද ?" මා ඇසූ විට, ඔහු ප්‍රීතියෙන් "ජේසුස් ක්‍රිස්තුස් වහන්සේ දේව පුත්‍රයා බව අදහමි"යි ප්‍රකාශ කළා. මා ද ඒ මොහොතේ දී ම ඔහු බෞතීස්ම කළා. ඔහු තුළ ශුද්ධාත්මයාණන් වහන්සේ වැඩ සිටින බව ඔහුගේ මුහුණින් නික්මුණු ආලෝකයෙන් ම පැහැදිලි වුණා. ඔහු රථයට නැගීි එතියෝපිය කරා ගමන් කළේ ශුභාරංචියේ ප්‍රීතිමත් පණිවුඩයත් රැගෙන යි.

මෙම පුද්ගලයා කවුදැ යි දැන ගැනීමට ඔබත් කැමති ඇති?

ඔහුගෙන් ම මම ඒ ගැන දැන ගතිමි. ඔහු එතියෝපියේ කන්දකි නම් රැජින යටතේ සේවය කළ, ඇගේ වස්තුවේ අධිකාරි වූ රාජ්‍ය නිළධාරියෙක්. ඔහු වන්දනාව පිණිස ජෙරුසලමට ගොස් ආපසු සිය රට බලා ගමන් කරද්දී තමයි මට මුණ ගැසුණේ. සමාරිතයන් වැනි කොන් වූ ජනතාවට හා රාජ්‍ය නිළධාරියාට ශුභාරංචිය පැහැදිලි කිරීමට ශුද්ධාත්මයාණන් වහන්සේ ගේ මග පෙන්වීම ගැන මට සන්තෝෂ යි. දෙවියන් වහන්සේගේ අරමුණ සියළු ජාතීන් අතර සුභාරංචිය ව්‍යාප්ත කිරීම බව මට මෙම සිද්ධියෙන් පැහැදිලි වුණා. ඒ ගැන මට ප්‍රීතියි.

මේ
ඔබේ හිතාදර
පිලිප්

උපස්ථායක පිලිප්තුමා ශුද්ධාත්ම මග පෙන්වීම අනුව ප්‍රිතියෙන් හා බලයෙන් ක්‍රියා කළ ආකාරය පිළිබඳ ව වැදගත් පාඩමක් අපි මෙම පාඩමෙන් ඉගෙන ගතිමු. එමෙන්ම අපට එහි උතුම් පණිවිඩයක් ද දී ඇත. මේ උතුම් සුබ හසුන අන්‍යයන්ට ප්‍රකාශ කරන්නට දෙවියන් වහන්සේ භාර දී ඇත්තේ අපට ය. අප ද ඒ කැඳවීමට කීකරු ව ඉදිරියට යමු. ශුද්ධාත්මයාණන් වහන්සේ බලවත් ලෙස අප ව ඒ සඳහා යොදවන බව සහතික ය.