ඔබ නිවසේ තනි ව සිටිය දී නෑදෑ පිරිසක් පැමිණියේ යැයි සිතන්න. ඔවුන්ට තේ පිළියෙල කර දීමට ඔබට සිදු වනු ඇත. මෙහි දී ඔබ පියවර අනුගමනය කරමින් තේ කෝප්පයක් පිළියෙල කළ යුතු ය.
තවත් අවස්ථාවක දී ඔබට අතුරුපස සඳහා පලතුරු සලාදයක් සෑදීමට හෝ උපන් දිනයක් සඳහා කේක් එකක් සෑදීමට සිදුවනු ඇත. මේ සියලූ අවස්ථාවල දී සිදු වනුයේ ගැටලූ විසඳීමකි. එය ඔබ ගණිතය පාඩමේ දී සිදු කළ ඍජුකෝණාස්‍රයක වර්ගඵලය සෙවීම සමඟ සසඳා බලන්න.
අරමුණක් ඇති විට යම් යම් ක්‍රියාවලිවල නිරත වී එය ඉටු කර ගැනීම අප නිතර ම සිදු කරන්නකි. එනම් එදිනෙදා ජීවිතයේ දී අප බොහෝ විට සිදු කරනුයේ ගැටලූ විසඳීමයි.
ගැටලූවක් විසඳීම
ගැටලූවක් විසඳීමට ප්‍රථම ගැටලූව හොඳීන් විශ්ලේෂණය කළ යුතු ය. එවිට ගැටලූව විසදන අයුරු පිළිබඳ මනා අවබෝධයක් ලබා ගත හැකි ය. සෑම ගැටලූ විසඳීමකට ම ආදානයක් ප්‍රතිදානයක් හා සැකසීමක් ඇත.
ආදානය : ගැටලූව විසඳීම සදහා ඇතුළත් කරන දේ
ක්‍රියාවලිය : ගැටලූව විසඳීම සදහා අනුගමනය කරන ක්‍රියාවලිය
ප්‍රතිදානය : ගැටලූව විසඳීමෙන් පසු ලැබෙන ප්‍රතිඵලය
මේ අනුව වට්ටෝරුවකට අනුව අන්තර්ගතයන් සැකසීම ගැටලූ විසඳීම බව ඔබට වැටහෙනු ඇත.
උදාහරණ 01
පලතුරු සලාදයක් සෑදීමට අදාළ ආදානය, ක්‍රියාවලිය හා ප්‍රතිදානය පහත පරිදි වේ.
ආදානය : විවිධ පලතුරු වර්ග,
ක්‍රියාවලිය : පලතුරු සේදීම, පලතුරු කැපීම, කලවම් කිරීම
ප්‍රතිදානය : පලතුරු සලාදය
උදාහරණ 02
ඍජුකෝණාශ්‍රයක වර්ගඵලය සෙවිමට අදාළ ආදානය, ක්‍රියාවලිය හා ප්‍රතිදානය පහත පරිදි වේ.
ආදාන : ඍජුකෝණාශ්‍රයේ දිග, ඍජුකෝණාශ්‍රයේ පළල
ක්‍රියාවලිය : දිග x පළල
ප්‍රතිදානය : ඍජුකෝණාශ්‍රයේ වර්ගඵලය