යෙදුම් මෘදුකාංග භාවිත කිරීමේ දී මූලික වශයෙන් යතුරු පුවරුව (keyboard) සහ මූසිකය (mouse) යොදා ගනී. එමනිසා යෙදුම් මෘදුකාංග භාවිත කරමින් විවිධ කාර්ය ඉටුකර ගැනීම සඳහා පළමුවෙන් ම මූසිකය හා යතුරු පුවරුව පිළිබඳව පැහැදිලි අවබෝධයක් ලබාගත යුතු ය. ඒවා හසුරුවන ආකාරය ද නිවැරදි ව පුහුණු විය යුතු ය.

4.2.1 මූසිකය භාවිතය

පරිගණක තිරයේ දිස්වන ඊ හිස (pointer) පාලනය කිරීම මූසිකය එහා මෙහා යැවීම මගින් සිදු කළ හැකි ය. එසේම ගොනු, ගොනු බහලූම් විවෘත කිරීම, මෙනු විවෘත කර ගැනීම, විධාන තේරීම ආදිය මූසිකයේ බොත්තම් මගින් ඉටු කර ගනී.

මූසිකයේ ප්‍රධාන කොටස්

සාමාන්‍යයෙන් මූසිකය වම් සහ දකුණු බොත්තම්වලින් ද මැදින් ඇති කුඩා රෝදයකින් ද සමන්විත වේ.

මූසික වර්ග කිහිපයක් භාවිතයේ පවතින අතර ඒවා හඳුනා ගනිමු.

මූසිකයේ කාර්ය

මූසිකය භාවිතයෙන් පරිගණක තිරය මත බොහෝ කාර්ය සිදු කළ හැකි ය. ඒවා මූලික වශයෙන් පහත කොටස් තුන යටතට ගැනේ.

උදාහරණ

• අවශ්‍ය දේ තේරීම (select)
• අවශ්‍ය දේ විවෘත කර ගැනීම (open)
• අවශ්‍ය දේ එහා මෙහා ගෙනයාම (move)

අවශ්‍ය දේ තේරීම (Select)

මේ සඳහා මූසික තුඩ අවශ්‍ය අයිතමය (item) වෙත ගෙන ගොස් එක් වරක් මූසිකයේ වම් බොත්තම ක්ලික් (click) කළ යුතු ය. එවිට එම අයිතමය අනෙකුත් අයිතමවලින් වෙනස්ව ඉස්මතු කර (highlight) පෙන්වයි.

අවශ්‍ය දේ විවෘත කර ගැනීම (open)

1 ක්‍රමය

වම් බොත්තම දෙවරක් ක්ලික් (double click) කිරීමෙන් අදාළ අයිකනයක නිරූපණය කරන මෘදුකාංගය හෝ ගොනුව විවෘත කර ගැනීමට හැකි වේ.

2 ක්‍රමය

අවශ්‍ය අයිකනය මත දකුණු බොත්තම වරක් ක්ලික් කිරීමෙන් ලැඛෙන මෙනුවේ 'Open' විධානය තෝරා ගත යුතු ය.

අවශ්‍ය දේ එහා මෙහා ගෙනයාම (move)

වම් බොත්තම ක්ලික් කරගෙන ඇදගෙන ගොස් අතහැරීම සිදු කළ යුතු ය.

මීට අමතරව කාර්ය කවුළුවක් තුළ ඉහළ පහළ යාම සඳහා මූසිකයේ රෝදය (scroll) යොදා ගනී. මෙහිදී මූසිකය මැද තිබෙන රෝදය කැරකැවීම මගින් පිටුවක ඉහළ පහළ යාම සඳහා මෙය භාවිත කරයි.

මූසිකය නිවැරදිව භාවිත කරමු

මූසිකය භාවිත කිරීමේ දී එය නිවැරදිව අල්ලා ගැනීමට අප පුරුදු විය යුතු ය. මූසිකය වැරදි ආකාරයට හැසිරවීම මගින් අපගේ අත්වල වේදනා සහ අපහසුතා ඇති විය හැකි ය.

4.2.2 යතුරු පුවරුව

විවිධාකාර වූ යතුරුපුවරු අතර රැහැන් සහිත යතුරු පුවරු, රැහැන් රහිත යතුරු පුවරු හා ස්පර්ශක යතුරු පුවරුව දැකිය හැකි ය.

යතුරු පුවරුවේ ඇති යතුරු වර්ග හා ඒවායේ කාර්යය

යතුරු පුවරු නිවැරදි ව භාවිත කරමු

යතුරු පුවරුව නිවැරදි ව භාවිත නොකිරීමෙන් ඇඟිලිවල හා මැණික් කටුවේ අපහසුතා ඇති විය හැකි ය.

යතුරු ලියනය කිරීමේ දී යතුරු පුවරුව මත අත තබන ආකාරය පහත රූපයේ දක්වා ඇත.