මෙහිදී විවිධ යෙදුම් මෘදුකාංග අතරින් කිහිපයක් පිළිබඳ අදහසක් ලබා දීමට බලාපොරොත්තු වන අතර ශ්‍රව්‍ය හා දෘශ්‍ය මෘදුකාංග පිළිබඳ ව වැඩිදුර සාකච්ඡා කිරීමට බලාපොරොත්තු වේ.
චිත්‍රක මෘදුකාංග
අතීතයේ දී මිනිසා විසින් චිත්‍ර තම අතින් නිර්මාණය කරන ලදී.
මෙසේ අතින් නිමවුණු චිත්‍ර පසුකාලීනව පරිගණකය භාවිතයෙන් නිර්මාණය කිරීම සඳහා මෘදුකාංග බිහි විය.
චිත්‍ර හා රූප සටහන් පරිගණකය ආශ්‍රයෙන් ඇඳ ගැනීමට අවශ්‍ය වූ විට විවිධ මෘදුකාංග භාවිතයට ගනියි. මෙසේ භාවිත කරන මෘදුකාංග චිත්‍රක (graphic) මෘදුකාංග ලෙස හඳුන්වයි.
වදන් සැකසුම් මෘදුකාංග
අපට එදිනෙදා ජීවිතයේ දී අවශ්‍ය වන ලිපි ලේඛන ආදිය සකස් කර ගබඩා කර ගැනීමට භාවිත කරන මෘදුකාංග වදන් සැකසුම් (word processing) මෘදුකාංග ලෙස හඳුන්වයි.
ශ්‍රව්‍ය හා දෘශ්‍ය සංස්කරණ මෘදුකාංග
ශ්‍රව්‍ය පටිගත කිරීම් හා වීඩියෝ පටිගත කිරීම්වල සංස්කරණ කටයුතු සඳහා ඊට අදාළ වූ මෘදුකාංග නිපදවා තිබේ. එම මෘදුකාංග හරහා විවිධ කටයුතු බොහෝමයක් සිදු කරගත හැකි ය.
ශ්‍රව්‍ය පට හා දෘශ්‍ය පට නිර්මාණය කිරීමට සහ සංස්කරණය කිරීමට භාවිත කරන විවිධ මෘදුකාංග අතරින් ශ්‍රව්‍ය පට සංස්කරණය සඳහා ම සැකසූ මෘදුකාංග ශ්‍රව්‍ය සංස්කරණ (audio editing) මෘදුකාංග ලෙස හඳුන්වන අතර වීඩියෝ පට සංස්කරණය සඳහා සකසා ඇති මෘදුකාංග වීඩියෝ සංස්කරණ (video editing) මෘදුකාංග ලෙස හඳුන්වයි.
ශ්‍රව්‍ය හා දෘශ්‍ය ගොනු නිර්මාණය
ශ්‍රව්‍ය හා වීඩියෝ පට සංස්කරණය කිරීමේ දී මෙන් ම පටිගත කිරීමේ දී ද ආචාර ධර්මවලට අනුකූලව කටයුතු කිරීම ඉතා වැදගත් වේ.