17 - ඒක දේව වන්දනාව
ඉහත සඳහන් ශුද්ධ ලියවිලි පාඨය කියවා පහත සඳහන් පින්තූර නම් කරන්න.
දිනක් ශුද්ධ වූ අගස්තීනු මුනිතුමා වෙරළක ඇවිදිමින් ශුද්ධ ත්‍රිත්වය පිළිබඳ අභිරහස වටහා ගැනීමට උත්සාහ කරමින් සිටියේ ය. එම අවස්ථාවේ දී වෙරළෙහි සිටි කුඩා දරුවෙකු ඔබ මොබ දුවමින් මුහුදේ ඇති ජලය සිප්පි කටුවකින් රැගෙනවිත් මුහුදු වෙරළේ ඇති කුඩා වළකට වත්කරන ආකාරය අගුස්තීනු මුනිතුමා දුටුවේ ය. එකෙණෙහි ම එතුමා, කුඩා දරුවා අමතා, "දරුවා ඔබ කරන්නේ කුමක් දැ"යි ඇසී ය. කුඩා දරුවා උත්තර දෙමින් "මම මේ මහ මුහුදේ ජලය සියල්ල මෙම වළට පුරවන්න උත්සාහ කරන්නෙමි"යි පිළිතුරු දුන්නේ ය. අගුස්තීනු මුනිතුමා උත්තර දෙමින් "මෙය ඔබට කළ හැකි කාර්යයක් ද? මෙම මහා සාගරයේ වතුර මේ කුඩා වළකට දැමිය හැකි ද? එය ඔබට කිසි කලෙක කළ නොහැකි ය"යි පවසමින් සිනාසුණේ ය. දරුවා උත්තර දෙමින් "ඔබ සිතන දේත් එබන්දකි. ඔබට මෙම අභිරහස වටහා ගැනීම අපහසුයැ"යි පවසා නොපෙනී ගියේ ය. ත්‍රිත්වික දෙවියන් වහන්සේගේ මහිමාන්විත බව හා උත්කෘෂ්ට බව කරණ කොට ගෙන ඔවුන් වහන්සේ වටහා ගැනීම මිනිස් මනසට කළ නොහැකි දෙයකි.
ශුද්ධ ලියවිල්ලෙන් ත්‍රිත්වික දෙවියන් වහන්සේට වන්දනාව
මෙම ශුද්ධ ලියවිලි පාඨයෙන් ක්‍රිස්තුන් වහන්සේ අපට පෙන්වා දෙන්නේ දේව වචනය හොඳින් අවබෝධ කර ගෙන දෙවියන් වහන්සේට පමණක් වන්දනා කළ යුතු බව යි. එමෙන් ම, බලය හෝ යස ඉසුරුවලට වහල් නොවී එක ම ඇදහිල්ලකින්, එක ම දෙවියන් වහන්සේට පමණක් වන්දනා කළ යුතු බව කි්‍රස්තුන් වහන්සේ තරයේ පෙන්වා දෙන සේක.
ශුද්ධ ත්‍රිත්වයෙහි මෙහි වහන්සේලා තිදෙනෙක් සිටියත් වැඩ සිටින්නේ එක ම දෙවි කෙනෙකි. උන්වහන්සේ ත්‍රිත්වික දෙවියන් වහන්සේ ය. මෙය කතෝලික විශ්වාසය යි. ශුද්ධ ත්‍රිත්විය අභිරහසකි. එය වටහා ගත හැක්කේ විශ්වාසයෙන් පමණි.
අපි සැවොම ත්‍රිත්වික දෙවියන් වහන්සේට පමණක් වන්දනා නමස්කාර කළ යුතු ය. පුරාණ ගිවිසුමේ නික්මයාම ග්‍රන්ථයේ සඳහන් වන දස පනතෙහි පළමු වන පනතින් දක්වනුයේ ද ඒක දේව වන්දනාව පිළිබඳ ව ය. කිතුනුවන්ගේ ජීවිතයේ කේන්ද්‍රීය අභිරහස වනුයේ ශුද්ධ ත්‍රිත්වය ය. දේව පුත්‍රයා මාංශගතවීමෙන් මනුෂ්‍යයාට දෙවියන් වහන්සේගේ ප්‍රේමය පෙන්නුම් කරයි. තව ද පියාණන් වහන්සේ, පුත්‍රයාණන් වහන්සේ හා ශුද්ධාත්මයාණන් වහන්සේ එක ම දෙවියන් වහන්සේ ය. ක්‍රිස්තුන් වහන්සේගෙන් පසු පියාණන් වහන්සේ විසින් ශුද්ධාත්මයාණන් වහන්සේ එවන ලදි. එබැවින් ශුද්ධාත්මයාණන් වහන්සේ පියාණන් හා පුත්‍රයාණන් වහන්සේ සමග වන්දනාවත් මහිමයත් ලබන සේක.
ත්‍රිත්වික දෙවියන් වහන්සේගේ කාර්යයන්
පිතා, පුත්‍රයා හා ශුද්ධාත්මයාණන් යන වහන්සේලාට විවිධ කාර්යයන් පැවරී ඇත.
පියාණන් වහන්සේගේ කාර්යභාරය
පියාණන් වහන්සේට විශ්වය මවා පරිපාලනය කිරීමේ කාර්ය පැවරී ඇත. උත්පත්ති පොතේ මැවීමේ කතාවෙන් එය පැහැදිලි කෙරේ.
විශ්වයේ පාලකයාණෝ ද උන්වහන්සේ ය.
පුත්‍රයාණන් වහන්සේගේ කාර්යභාරය
පුත්‍රයාණන් වහන්සේට විශ්වය ගලවා ගැනීමේ කාර්යය හිමි ය. මිනිසාගේ ප්‍රථම අකීකරුකමේ පාපය හේතු කොට ගෙන ගැලවීමේ කාර්ය සඳහා ජේසුස් වහන්සේ දේව අභිමතය පරිදි මෙලොවට වැඩිය සේක. තම දුක් විදීම හා මරණය තුළින් මිනිසා පාපයෙන් ගලවා ගත් සේක. ඒ තුළින් මිදීමත් පව් කමාවත් අපට ලැබී ඇත.
ශුද්ධාත්මයාණන් වහන්සේගේ කාර්යභාරය
ශුද්ධාත්මයාණන් වහන්සේට විශ්වය ශුද්ධවත් කිරීමේ කාර්යය හිමි විය. ප්‍රසාද ස්නාපනය ලැබූ සියල්ලන් තුළ ම ශුද්ධාත්මයාණන් වහන්සේ ක්‍රියාත්මක වෙමින් ශුද්ධවත් කරන සේක. ශුද්ධාත්මයාණන් වහන්සේ අපගේ හදවත්වල වැඩ වාසය කරන සේක. එම නිසා ප්‍රසාද ස්නාපනය ලැබූවත් ශුද්ධාත්මයාණන් වහන්සේ වැඩ වාසය කරන දේව මාලිගා වේ.
ත්‍රිත්වික දෙවියන් වහන්සේ හා ප්‍රසාද ස්නාපනය
අප ප්‍රසාද ස්නාපනය ලැබුවේ ද ශුද්ධ ත්‍රිත්වයේ නාමයෙනි. "..............(නම) පියාණන්ගේ ද පුත්‍රයාණන්ගේ ද ශුද්ධාත්මයාණන්ගේ ද නාමයෙන් මම ඔබ බෞතීස්ම කරමි" කියමින් ඔබ ප්‍රසාද ස්නාපනය කරනු ලැබිණි. එමෙන් ම ප්‍රසාද ස්නාපන පොරොන්දුවෙන් ද ත්‍රිත්වික දෙවියන් වහන්සේ විශ්වාස කරන බව ඔබ වෙනුවෙන් දෙමවුපියොත් ඥාන මවුපියොත් පොරොන්දු වූහ.
පූජාප්‍රසාදිතුමා : අහසත් පොළොවත් මවා වදාළ සියලූ බලැති දෙවි පියාණන් වහන්සේ කෙරෙහි ඔබ විශ්වාස කරන්නහු ද?
සියල්ලෝ : අපි විශ්වාස කරමු.
පූජාප්‍රසාදිතුමා : කන්‍ය මරියෝත්මාවන්ගෙන් ඉපිද, කුරුසියෙහි මරණයෙන් හා මහිමාන්විත උත්ථානය මගින් අප ගළවා ගත්, දෙවියන් වහන්සේගේ එක ම පුත්‍ර වූ අපගේ ස්වාමින් වූ ජේසුස් වහන්සේ කෙරෙහි ඔබ විශ්වාස කරන්නහු ද?
සියල්ලෝ : අපි විශ්වාස කරමු.
පූජාප්‍රසාදිතුමා : ශුද්ධාත්මයාණන් වහන්සේ කෙරෙහි ද ශුද්ධ වූ සභාව කෙරෙහි ද සාන්තුවරයන්ගේ සමෝසධර්මලාභය කෙරෙහි ද ඔබ විශ්වාස කරන්නහු ද?
සියල්ලෝ : අපි විශ්වාස කරමු.
මෙම පොරොන්දුවලින් පෙන්වනු ලබන්නේ ත්‍රිත්වික දෙවියන් වහන්සේ විශ්වාස කරන බව ය.
ත්‍රිත්වික දෙවියන් වහන්සේ හා පවුල
මිහිපිට වෙසෙන පවුල්වල සේවාවන්
ත්‍රිත්වික දෙවියන් වහන්සේගේ සේවාව මෙන්, පවුලේ ද එකිනෙකාට අනන්‍ය වූ සේවා රාශියක් ඇත. කිතුනු පවුල එක්සත් ව එක්සිත් ව සිටිය යුතු ය. එමෙන් ම ක්‍රිස්තුන් වහන්සේ මෙන් අන්‍යයන්ට ප්‍රේම කරමින් ජීවත් විය යුතු ය. ශුද්ධ ත්‍රිත්වයේ සිටින තැනැන් වහන්සේලා තිදෙනා මෙන් නොබිෙඳන සාංඝික ජීවිතයක් ගත කළ යුතු ය. වහන්සේලා තිදෙනෙක් සිටියත් එක ම දෙවියන් වහන්සේ මෙන් පවුලේ ද සියලූ දෙනාගේ ක්‍රියාකාරිත්වයෙන් එකිනෙකා හා සහයෝගයෙන් සමාදානයෙන් ඉටු කළ යුතු ය. මිහිපිට ශුද්ධ ත්‍රිත්වයේ සංකේතය කිතුනු පවුල විය යුතු ය.