ජේසුස් වහන්සේ ජොර්දාන් නදියේ දී ස්නාවක ජොහන් තුමා අතින් බෞතීස්ම ස්නාපනය ලබා ප්‍රසිද්ධ ජීවිතය හා දූත සේවාව ආරම්භ කළ සේක. ශුද්ධ වූ ලුක් තුමා කරන විස්තරය අනුව ඒ අසිරිමත් අවස්ථාවේ දී ස්වර්ගය විවෘත විය. ශුද්ධාත්මයාණන් වහන්සේ පරවියෙකු මෙන් ජේසුස් වහන්සේ කෙරෙහි පහළ වූ සේක. "ඔබ මාගේ ප්‍රියාදර පුත්‍රයාණෝ ය; ඔබ කෙරෙහි ඉතා ප්‍රසන්න වී සිටිමි"යි අහසින් හඩක් නික්මිණි.

එදා ජේසුස් වහන්සේ ජොර්දාන් නදියේ ප්‍රසාද ස්නාපනය ලැබූ මොහොතේ දී මෙන් ම අප ප්‍රසාද ස්නාපනය ලබද්දී ශුද්ධාත්මයාණන් වහන්සේ අප එකිනෙකා මත පහළ වූ සේක. අප එකිනෙකා ද දේව දරුවන් ලෙස පිළිගැනිණි.

ජොර්දාන් නදියේ දී සිදු වූ ඒ අපූරු අත්දැකීමෙන් පසු ව ජේසුස් වහන්සේ පාළුකරයේ දී දින හතලිහක් යාච්ඤාවෙන්, නිරාහාර ශීලයෙන් හා පරීක්ෂා ජය ගනිමින් දූත සේවාව සඳහා සුදානම් වූ සේක. එය ශුද්ධ වූ ලුක් තුමා මෙසේ වාර්තා කරයි:

පාළුකරයේ දී ජේසුසු වහන්සේ යක්ෂ පරීක්ෂා තුනකට මුහුණ දුන් සේක.

මෙම පරීක්ෂා ජය ගැනීමෙන් පසු ව ජේසුස් වහන්සේ ශුද්ධාත්මානුභාවයෙන් පූර්ණ ව ගලීලයට පෙරළා වැඩම කර සියල්ලන්ගෙන් ප්‍රශංසා ලබමින්, ඔවුන්ගේ ධර්ම ශාලාවල ඉගැන්වූ සේක.

නාසරෙත්හි දේශනාව

ජේසුස් වහන්සේ තමන් ඇති දැඩි වූ නාසරෙත් නුවර ධර්මශාලාවට සිරිත් පරිදි සබත් දින වැඩම කර දිවැසිවර යෙසායාගේ ග්‍රන්ථය පෙරළා තම දූත කාර්යය පිළිබඳ ව සඳහන් ව තිබූ පාඨය කියවූ සේක:

ඉහත ශුද්ධ ලියවිලි පාඨයේ දැක්වෙන පරිදි ජේසුස් වහන්සේගේ දූත කාර්යයේ අරමුණ වන්නේ දිළිදු, වහල්, පීඩිත හා අන්ධ සැමට සුබසෙත උදාකර දීමත් දෙවියන් වහන්සේගේ ආශිර්වාදය ලත් ගැලවීම්දායක වසර ප්‍රකාශ කර සියලූ ජනතාවට ගැලවීම අත්කර දීමත් ය.

අප ද අපගේ බෞතීස්ම කැඳවීමට විශ්වාසී ව ජීවත් විය යුතු ය. එදිනෙදා ජීවිතයේ දී මුහුණ දෙන පරීක්ෂා ජය ගැනීමට කටයුතු කළ යුතු වෙමු. ඒ සඳහා යාච්ඤාවෙන් පරීක්ෂා ජය ගැනීමට සුදානම් විය යුතු වේ. අප සංඝයක් ලෙස ධර්මදූත සේවාවට සහාය දිය යුතු ය.