11 - ජේසුස් වහන්සේ සිදු කළ ප්‍රාතිහාර්යයන්
ප්‍රාතිහාර්ය යනු ස්වභාව ධර්මය තුළ සාමාන්‍යයෙන් සිදු නොවන පුදුම ක්‍රියා ය.
ජේසුස් වහන්සේ සිදු කළ ප්‍රාතිහාර්ය වර්ග හතරකි.
1. ස්වභාව ධර්මය හා සම්බන්ධ ප්‍රාතිහාර්ය - මාරුත දමනය
මාරුත දමනයේ ප්‍රාතිහාර්යයෙන් අපට පෙන්වන්නේ
- ජේසුස් වහන්සේ සැබෑ දේව පුත්‍රයාණන් බවත්
- ස්වභාව ධර්මය පවා උන්වහන්සේට කීකරු වන බවත් ය
එම නිසා අප ද ජේසුස් වහන්සේ විශ්වාස කළ යුතු අතර උන්වහන්සේගේ අණට කීකරු විය යුතු ය. දේව වචනයට එකඟ ව නිතර ම නිවැරදි දෙය පමණක් කිරීමට උත්සාහ කළ යුතු ය. අපගේ විශ්වාසය හීන වී ගෙන යන අවස්ථාවල දී නිරතුරු යාච්ඤා කිරීමෙන් නැවත විශ්වාසය ගොඩනගා ගැනීමට අප උත්සාහ කළ යුතු ය.
2. රෝගීන් සුව කිරීම සම්බන්ධ ප්‍රාතිහාර්ය - සබත් දින කුදු ස්ත්‍රිය සුව කිරීම
මෙම ප්‍රාතිහාර්ය මගින් පෙන්නුම් කරන්නේ ජේසුස් වහන්සේ ඒ ස්ත්‍රියගේ වේදනාව දැක පිහිට වූ ආකාරය යි. අප ද අන් අයගේ දුක වේදනාව හමුවේ දෑස් පියා ගෙන නොසිට ඒ අයට පිහිට විය යුතු ය. ඇයගේ කිසි ම ඉල්ලීමක් නොමැති ඇයට ජේසුස් වහන්සේ දයාව දැක්වූ සේක.
අප නිතර ම රෝගීන් සඳහා යාච්ඤා කළ යුතු ය. ශාරීරික හා මානසික රෝගවලින් පෙළෙන ජනතාව වෙනුවෙන් අපගේ නිරන්තර යාච්ඤාව යොමු කළ යුතු ය. ඔවුන්ගේ එම රෝගී තත්ත්වයන් ඉක්මනින් සුවපත් කරන ලෙස අයැදිය යුතු ය.
3. දුෂ්ටාත්මයන් දුරු කිරීම සම්බන්ධ ප්‍රාතිහාර්ය - ගෙරසේනයේ දුෂ්ටාත්මාවේශ වූවෙකු සුව කිරීම
මෙම ප්‍රාතිහාර්යයෙන් අපට පෙන්වන්නේ දේව පුත්‍ර ජේසුස් වහන්සේගේ බලයට යක්ෂයා පවා මෙල්ල වන බවත් උන්වහන්සේ නිතර ම යක්ෂ බලවේගවලින් මනුෂ්‍යයා බේරා ගන්නා බවත් ය. අප නිතර ම යක්ෂ බලවේගවලට අසු නොවී සිටීමට ජේසුස් වහන්සේට යාච්ඤා කළ යුතු ය. අප නිතර ම දේව ආරක්ෂාවට භාර දිය යුතු ය.
4. මළවුන් උත්ථාන කිරීම - ජායිරස්ගේ දුව උත්ථාන කිරීම
මරණය ජේසුස් වහන්සේට නින්දක් මෙනි. නින්දෙන් අවදි කරන්නාක් මෙන් ජේසුස් වහන්සේ විශ්වාස කරන අය ද උන්වහන්සේ උත්ථාන කරන සේක. එම විශ්වාසය ඇති ව මෙලොව යහපත් ව හා නිදොස් ව ජීවත් වීම අපගේ යුතුකම ය.
අපගේ ජීවිතවල ප්‍රාතිහාර්ය අත්දැකීමට නම්;
- සියල්ල දෙවියන් වහන්සේට කළ හැකි බව විශ්වාස කළ යුතු ය.
- විශ්වාසයෙන් යාච්ඤා කළ යුතු ය.